Kisumwa Kyalondekesa Kwa Nzwá 20:1-15
20 Ngamono anju ya mu tuluka ku dyulu ni sabhi ya dikungu dyazongo, wakwata we lubhambu lwa dikota.
2 O anju ya kwata o kidikixi, o nyoka yokulu, Satanaji o Dyabhu, yu wa mu kutu mu midi ya mivu.
3 Anga u mu takula mu dikungu dyazongo, wajika o dikungu anga utaku kidimbu, phala kasuluke mu kunganala o ifuxi, katé kyanda bhita o midi ya mivu. Kyoso o midi ya mivu ki yanda bhita, mwene anda mujituna kakithangana.
4 Ngamono yandu, o yó axikama-ku a abhana o ungana wa kufundisa. Kyene, ngamono o athu a ajibha* mukonda dya kubhana umbangi walungu ni Jezú, ni mukonda dya kubokela o athu o mak’â Nzambi. Ngamono yó kabhezele o kyama kya muxitu, né ngó o kiteka kyê ni yó katambwile o kidimbu kya kyama bhu mabhômo mâ ni ku maku mâ. Ene avutuka dingi ku mwenyu, atumina kumoxi ni Kidistu mu midi ya mivu.
5 (O madifundu a mukwa kavutuka dingi ku mwenyu, katé kyeji bhita o midi ya mivu.) Didi dyene o difukunukinu dya dyanga.
6 Azediwa o athu a afukununa mu difukunukinu dya dyanga, ene a amono we kala athu azele. O kufwa kwa kayadi kikwala dingi ni kutena kwa ene. Maji ene anda kala akunji a Nzambi ni a Kidistu. Ene anda tumina kumoxi ni Jezú mu midi ya mivu.
7 Kyoso kyanda bhita o midi ya mivu, Satanaji anda mu jituna mu kaleya.
8 Mwene wanda tunda phala kunganala o ifuxi mu ngongo yoso, yene Ngongo ni Mangongo. Enyá wanda kwa bhongolola phala o ita. Ene anda vula kala o museke ku musanza wa kalunga.
9 Ene a dimwange mu ngongo yoso, ya akondoloka o kididi kya athu a asolo* ni mbanza ya zolo Nzambi. Maji-phe ku dyulu kwa lawuka túbhya, anga twa ajikinisa.
10 O Dyabhu yó wakexile mwa nganala, a mu takula mu kizanga kya wama o túbhya ni xôfidi, mwa kexile kyá o kyama kya muxitu ni polofeta ya makutu. Ene anda kwa talesa hadi* usuku ni mwanya, katé ku hádya ni hádya.
11 Anga ngimona kyandu kyadikota kyazele ni Yó wa xikama-ku. O dyulu ni ixi dya kexile mulenga bhu pholo yê. Ki kwa moneka dingi kididi phala o dyulu ni ixi.
12 Ngamono o madifundu, o makota ni jindenge emana bhu pholo ya kyandu, nga mono we mikanda yo jikule. Maji ajikula mukanda wa mukwa: O mukanda wa mwenyu. O madifundu a afundisa mu ima yosoneke mu mikanda, kala muthu a mu fundisa mu ibhangelu yê.
13 O musanza wa kalunga wabhana o madifundu akexile-mu, o kalunga ni Mbila* abhana we o madifundu mâ. Enyá a afundisa muthu ni muthu mu ibhangelu yâ.
14 O kalunga ni Mbila* a atakula mu kizanga kya túbhya. O kizanga kya túbhya kilombolola o kufwa kwa kayadi.
15 Woso ka musoneka o dijina dyê mu divulu dya mwenyu, a mutakula we mu kizanga kya túbhya.
Footnotes
^ Mu Ngel.: “a a jibha ni dikuwa.”
^ Mu Ngel.: “athu akôla.”
^ Mba, “kwa ta mukaleya.”
^ Mba, “Hades.” Tala o Dilombolwelu.
^ Mba, “Hades.” Tala o Dilombolwelu.
