Kisumwa Kyalondekesa Kwa Nzwá 21:1-27
21 Kyazubha kubhita o ima yiyi, ngamono dyulu dya ubhe ni ixi ya ubhe, o dyulu dyo’kulu ni ixi yokulu ki ya kexile-ku dingi, o musanza wa kalunga ki wexile-ku dingi.
2 Ngamono we o mbanza ikôla, o Jeluzaleme ya ubhe, ya mu tuluka ku dyulu kwa Nzambi. A i yudika kala dibhanga dya muya mu ditakanesa ni mwadi wê.
3 Anga ngivwa dízwi dya swina dya tundu ku kyandu, dixi: “Talesa! O balaka ya Nzambi yala mwaxaxi ka athu, mwene wanda tunga ni ene, ene anda kala mundu wê. O Nzambi wanda kala kumoxi ni ene.
4 Nzambi wanda kondona o masoxi moso kumesu mâ, kikwanda kala dingi kufwa, né ngó mukôndo, né kudila, né ndolo. Mukonda o ima ya dyangele-ku, yabhiti kyá.”
5 Bhenyobho, o Yó waxikama ku kyandu wa ng’ambela: “Talesa! O ima yoso nga mu ibhanga ya ubhe.” Wa ng’ambela we: “Soneka o ima yiyi, mukonda o maka yâ, afiyele,* a kidi.”
6 Mwene wa ng’ambela dingi: “O maka yá a dikumbidila kyá! Eme ngi Álafa ni Omeka,* ngi dimatekenu ni disukilu. Woso wala ni dinyota nganda mubhana mu kingoho, kunwa mu hotho* ya menya a mwenyu.
7 Woso utolola o izukutisu wanda tambula o mabesá yá: Eme nganda kala ngi Nzambi yê, mwene wanda kala mon’ami.
8 Maji o akwa wôma, ni yó kala ni kixikanu, ni yó akwa kubhanga o ufusa, ni ijibhangânga ni jindumbu,* ni aloji, ni abhezi a iteka ni akwa kutanga o makutu, anda kwatakula ku kizanga kya wama túbhya ni xôfidi. Kiki kilombolola o kufwa kwa kayadi.”
9 Anju imoxi yatokala ku sambwadi dya jianju ja kexile ni sambwadi dya matijela ezalele ni sambwadi dya mabhebhu a sukina-ku, yeza ya ng’ambela: “Zá, nganda kulondekesa o dibhanga, o muhatu wa Kambudi.”
10 Kyenyiki, mu kutena kwa nzumbi ikôla, mwene wa ng’ambata ku mulundu wadikota wadileka, anga u ngi londekesa o mbanza ikôla, o Jeluzaleme ya mu tuluka ku dyulu, kwa Nzambi
11 ni kubhenya ni fuma ya Nzambi. O kubhenya kwa mbanza kwa difwanganene ni kwa ditadi dyala ni valolo yavulu kala o ditadi dya jaspe, dya difwangana ni vídulu ya mu bhenya kyavulu.
12 O mbanza ya kexile ni kilumbu kya dikota kya dileka, kya kexile ni kwinyi ni kiyadi kya myelu, kwa kexile we kwinyi ni kiyadi kya jianju bhu myelu. Ku myelu a sonekene-ku o majina a kwinyi ni kiyadi kya miji ya an’â Izalayele.
13 O kutundila o dikumbi kwakexile myelu itatu, ku mbandu ya thunda kwakexile we myelu itatu, ku mbandu ya lwiji kwakexile myelu itatu, o kufwila o dikumbi kwakexile we myelu itatu.
14 O kilumbu kya mbanza kyexile ni kwinyi ni kiyadi kya matadi a kaboko, ku matadi enyá a soneka-ku o majina a kwinyi ni kiyadi kya jipoxolo ja Kambudi.
15 O yó wakexile muzwela n’eme, wa kwatele mbangala ya ulu, phala kuzongela nayu o mbanza, o myelu, ni kilumbu kya mbanza.
16 O mbanza ya sokela mu jimbandu jiwana, o kukula kwê, kwa sokela ni kuzanza. O anju ya zongo o mbanza ni mbangala yê: O mbanza yakexile ni midi jiyadi ni hama jiyadi ni makwinyi ayadi a jikilómetulu.* O kukula kwa mbanza ni kuzanza kwê ni kulebha kwê kwa sokela.
17 Mwene wazongela we o kilumbu kya mbanza, kyene kya kexile ni hama ni makwinyi awana ni kiwana kya jikóvadu.* Kala kyene muzonga o athu, kyene we kimoxi ni anju.
18 O kilumbu kya mbanza a kitungile ni ditadi dya jaspe, o mbanza yexile ya ulu ya fina, kala o vídulu yazele.
19 O tuboko twa kilumbu kya mbanza twexile twa matadi ala ni valolo yavulu. O kaboko ka dyanga kexile ka ditadi dya jaspe, kaboko ka kayadi kexile ka ditadi dya safídya, kaboko ka katatu kexile ka ditadi dya kalesedónya, kaboko ka kawana kexile ka ditadi dya ejimelada.
20 O kaboko ka katanu ka saladónika, ka kasamanu ka saladyu, ka kasambwadi ka kidizolitu, ka kanake ka belilu, ka kavwa ka topázyu, ka kakwinyi kidizopázyu, ka kakwinyi ni kamoxi ka jasindu, ka kakwinyi ni kiyadi ka ametista.
21 O kwinyi ni kiyadi kya mabhitu, abhangele ni kwinyi ni kiyadi kya jiphélula. Kala dibhitu a dibhangele ni phélula imoxi. O kikoka kya mbanza, kyexile kya ulu yafina kala vídulu yazele.
22 Mu mbanza mwenyomo, ki nga mono-mu tembulu, mukonda Jihova Nzambi, o Muteni-a-Yoso ni Kambudi éne o tembulu ya mbanza.
23 O mbanza ki ibhindamena o mukengeji wa mwanya mba wa mbeji, mukonda o kubhenya kwa Nzambi ku mwika o mbanza. O kandeya ka mbanza o Kambudi.
24 O athu a ifuxi yoso anda kwendela mu mukengeji wê, o jisobha ja ngongo janda bheka o kubhenya kwâ mu mbanza.
25 Mu mwanya o mabhitu a mbanza kanda kwa jika, mukonda mu mbanza ki mwanda kala usuku.
26 O ifuxi yoso ya kabheka o kijingu ni ungana woso mu mbanza.
27 Maji mu mbanza ki mwanda bokona kima kyaxidi mba muthu ubhanga ima ya ufusa, utanga makutu ku akwa, maji mwanda bokona ngó o athu ala ni majina mâ mosoneke mu divulu dya mwenyu dya Kambudi.
Footnotes
^ Mba, “a tena kwa dyelela.”
^ Mba, “ngi A ni Z.” O Álafa yene o kisoneku kyadyanga mu alfabetu ya dimi dya Ngeleku, Omeka yene o kisoneku kyasukina.
^ Mba, “fixi.”
^ Tala o Dilombolwelu.
^ Mu Ngel.: “Kwinyi ni kiyadi kya midi ja estádyu.” O estádyu imoxi ya sokele ni hama ni makwinyi anake ni kitanu kya jimetulu.
^ Makwinyi a samanu ni kiwana kya jimétulu.
