Kisumwa Kyalondekesa Kwa Nzwá 5:1-14
5 Bhu lukwaku lwa kadilu lwa Yó waxikama bhu kyandu, ngamono-bhu mukanda wosoneke moxi ni bhukanga, o mukanda yú a ujika ni sambwadi dya idimbu.
2 Ngamono we dizonda dya anju kudikola ni dízwi dya swina: “Nanyi wafwama kukatula o idimbu ni kujikula o mukanda?”
3 Maji sé-ku muthu ku dyulu, mu ixi mba koxi a mavu watenene kujikula o mukanda ni kutanga o ima yasoneka-mu.
4 Eme ngamateka kudila kyavulu, mukonda ki kwamonekene muthu watenene kujikula o mukanda ni kutanga o ima yasoneka-mu.
5 Maji kwamoneka kafunga kamoxi wa ngambela, wixi: “Kana kudila dingi. Talesa! O Hoji yatokala ku mwiji wa Judá, o lundanji lwa Davidi watolola, yu wafwama kukatula o sambwadi dya idimbu ni kujikula o mukanda.”
6 Ngamono mwaxaxi ka kyandu ni ka jianju jiwana ni mwaxaxi ka tufunga, kambudi kemana kedile kala akajibhile, o kambudi kexile ni sambwadi dya jingela ni sambwadi dya mesu. O mesu alombolola o sambwadi dya jinzumbi ja Nzambi jotumikise mu ngongo yoso.
7 Mu kithangana kyenyókyo o kambudi kazukama ku kyandu, anga watambula o mukanda bhu lukwaku lwa kadilu lwa Yó waxikama ku kyandu.
8 Kyoso mwene kyatambula o mukanda, o jianju jiwana ni makwinyi ayadi ni kiwana kya tufunga afukama bhu pholo ya Kambudi. Kala kafunga wakwata mbánza ni ditijela dya ulu dyezala ni wasu wadizumba. (O wasu wadizumba ulombolola o misambu ya athu akôla.)
9 Ene a mu kwimba mwimbu wa ubhe, exi: “Eye wafwama o kutambula o mukanda ni kujikula o idimbu, mukonda akujibhile. Eye wasumbu athu phala Nzambi ni manyinga mé, atundu ku miji yoso, ku madimi moso, ku madyembu moso ni ku ifuxi yoso,
10 anga wa abhangesa kukala jisobha ni akunji phala Nzambi yetu, ene anda tumina o ngongo yoso.”
11 Ngamono, éme ngevu mázwi a jianju javulu ja kondoloka o kyandu, ni a jianju jiwana ni a tufunga. O jianju jiji, jatenesa konda ya jimidi ni jimidi, ni mazunda ni mazunda.
12 Ene oso adikola ni dízwi dya swina, exi: “O Kambudi akajibhile, kya mu fwama kutambula o kutena ni maumvwama, o unjimu ni nguzu, o kijingu, o fuma ni kiximanu.”
13 Anga ngivwa o ibhangelu yoso ku dyulu, mu ixi, koxi a mavu, ni mu musanza wa kalunga, ni yoso yala-mu kudikola, exi: “O kiximanu, o kijingu, o fuma ni kutena kwatokala kwa Yó waxikama ku kyandu, ni ku Kambudi, katé ku hádya ni hádya.”
14 O jianju jiwana ja tambwijila, exi: “Kyene!”* Anga o tufunga afukama mu kubheza Nzambi.
Footnotes
^ Mba, “Amen, mu dimi dya Ngeleku.”
