Dimatekenu 14:1-24
14 Mu izuwa yenyoyo Amalafele wexile sobha ya Xinale, Adiyoko wexile sobha ya Elasale, Kedolawumele wexile sobha ya Elame, Tidale wexile sobha ya Ngoyími.
2 O jisobha jiji ja luwu ita ni Bela sobha ya Sodoma, Bidixa sobha ya Ngomola, Xinabe sobha ya Adama, Ximebele sobha ya Zeboyini ni sobha ya Bela, kifwa, Zowale.
3 Enyoso yá adibhongolola mu honga ya Sidime, kifwa, o Kalunga ka Môngwa.*
4 Ene asidivila Kedolawumele mu dikwinyi ni kiyadi kya mivu, maji ku muvu wa dikwinyi ni kitatu a mubhukumukina.
5 Mukyenyiki, ku muvu wa dikwinyi ni kiwana Kedolawumele weza kumoxi ni jisobha ja dibundu-nê ya atolola o Jilafayime, Axitelote-kalinayime, o Mazuzi mu Hame, o Ji-Emime mu Xave-Kedyatayime,
6 ni Mahodi ku mulundu wâ wa Seyile kate ku Ele-Palane yala bhwa zukama o kikangalakata.*
7 Ene anga avutuka ya abhixila ku Ene-mispate, kifwa, Kadexi, ya atolola o ibatu yoso ya akwa Amaleke, atolola we akwa Mamodi atungile mu Hazeza-tamale.
8 Mu kithangana kyenyokyo, o sobha ya Sodoma watundu kumoxi ni sobha ya Ngomola, ni sobha ya Adama, ni sobha ya Zeboyini, ni sobha ya Bela, kifwa Zowale, adita mu munonono phala kuya mubhânga-nawu mu honga ya Sidime,
9 mu kulwa ni Kedolawumele sobha ya Elame, Tidale sobha ya Ngoyími, Amalafele sobha ya Xinale, ni Adiyoko sobha ya Elasale—sobha jiwana jadikwata ni sobha jitanu.
10 Mu honga ya Sidime mwexile makungu azongo a betume, o jisobha ja Sodoma ni Ngomola mukulenga abu mu makungu enyá, o yó asubhuka alengela ku milundu.
11 Mukyenyiki, o atolodi ambata o jimbote joso ja akwa Sodoma ni Ngomola ni makudya moso anga aya ni njila yâ.
12 Ambata we Lote mwebhu a Mbalamu watungile mu Sodoma ni jimbote jê, anga asuluka ni njila yâ.
13 Mukubhita o ima yiyi, kukala muthu walenge yu wayi mutangela Mbalamu, o Hebelewu. Mu thembu yenyoyo mwene watungile* bhwa zukama ni mixi yamakota ya Mamele, mukwa Mamodi phang’ya Exikole ni Anele. O mayala yá exile ku mbandu ya Mbalamu.
14 Bhenyobho Mbalamu wevu kwila o mwebh’wê* a mwambata, ya a mukwika.* Kyenyiki mwene wongeka hama jitatu ni dikwinyi ni dinake dya mayala a alongo kubhânga mu ita, o jiselevende a avwalela mu inzo yê, yu wakayela o jinguma kate ku Dane.
15 Mu usuku, Mbalamu wawanuna o jiselevende jê mu ibuka-ibuka, ya abhânge ni jinguma jâ, ya ajitolola. Mwene wa akayela kate ku Hoba yala ku mbandu ya thunda ya Damasku.
16 Watambula dingi o jimbote joso, wabhulula we mwebh’wê Lote, ni jimbote jê, ni ahatu ni athu amukwa.
17 Kyoso Mbalamu kyatolola Kedolawumele ni jisobha akexile-nê kumoxi yu wavutuka, o sobha ya Sodoma wayi mudisanga ni Mbalamu mu honga ya Xave, kifwa, o honga ya Sobha.
18 Melekizedeke o sobha ya Saleme wa mubhekela mbolo ni vinyu. Mwene wexile mukunji wa Nzambi Sukeku.
19 Mwene wa mubesowala yu wambe:
“Atane-ku Mbalamu mu dijina dya Nzambi Sukeku,Yó wabhange o dyulu ni ixi;
20 Nzambi Sukeku, atane-kuYó wa mubhakwila o jinguma jê!”
Mbalamu anga u mubhana o mbandu ya kakwinyi ka ima yoso.
21 Mukubhita o ima yiyi, sobha ya Sodoma wambela Mbalamu, wixi: “Ngibhane o athu, maji xala ni jimbote.”
22 Maji Mbalamu wambela o sobha ya Sodoma, wixi: “Ngizangula o lukwaku lwami mu kulôka kwa Jihova o Nzambi Sukeku wabhange o dyulu ni ixi,
23 kwila, ki nganda kutambula kima, né ngo kaludinya mba lungoji lwa kukuta o jihayi, phala kwambe: ‘Mbalamu éme nga mubhangesa kukala mvwama.’
24 Eme kinganda xala ni kima, o yadi o minzangala yasoko kya mwene. Maji Anele, Exikole ni Mamele o mayala u ngayile-nawu kumoxi, atambule o mbandu ya atokala.”
Footnotes
^ Tala o Dilombolwelu.
^ Tala o Dilombolwelu.
^ Mba, “watungile mu jibalaka.”
^ Mu Heba.: “phang’yê.”
^ Mba, “a mukutu.”
