Ejidala 1:1-11
1 Ku muvu wa dyanga wa Silu, Sobha ya Pélesa, phala ku dikumbidila o kizwelu kya Jihova bhukaxi ka Jelemiya, Jihova wabhangesa Silu Sobha ya Pélesa, kubhana ngonge mu utuminu wê woso, o ngonge yiyi watumina we ku isoneka. Yene yambele kiki:
2 “Silu Sobha ya Pélesa, wambe: ‘Jihova, o Nzambi ya dyulu, wa ngibhana o mautuminu oso a ngongo, wa ngitumu ku mutungila inzo mu mbanza ya Jeluzaleme, yala mu Judá.
3 Woso mudyenu watokala ku mundu wê, Nzambi yê akale-nê, abande mu Jeluzaleme yala mu Judá, atunge dingi o inzo ya Jihova,* Nzambi ya Izalayele, o Nzambi yakidi, wavu o inzo yala mu Jeluzaleme.
4 Woso mudyenu watungu kala musonyi, kabasa kididi bhwa tungu, jivizinyu jê a mukwatekese mu ku mubhana phalata ni ulu, ni ima yamukwa, ni ibhaku, kumoxi ni maujitu abhana ni muxima woso mu vondadi yâ, phala o inzo ya Nzambi yakidi, yakexile mu Jeluzaleme.’”
5 Kyenyiki, o atwameni a miji ya Judá ni ya Bejamí, kumoxi ni akunji ni Jilevita ni athu oso a aswinisa kwala o Nzambi yakidi, adisokejeka phala kuya mutunga dingi o inzo ya Jihova yakexile mu Jeluzaleme.
6 O jivizinyu jâ joso ja akwatekesa mu ku abhana imbamba ya phalata ni ya ulu, jimbote, ibhaku, ni ima yala ni valolo, ni ima yamukwa dingi yabhana mu vondadi yâ ni muxima woso.
7 Sobha Silu watumina we kukatula o ima yatokalele mu inzo ya Jihova, yakatwile Nabukodonozolo mu Jeluzaleme, yu wa itudile mu inzo ya nzambi yê.
8 Silu sobha ya Pélesa, wabhana o kikalakalu kya kukatula o ima yiyi kwa Miteledate, o mukwa kulanga o jimbongo, mwene wa isoneka mu mukanda, yu wa ibhana kwa Sebazale,* o kilamba kya Judá.
9 O ima yenyiyi: Makwinyi atatu a itutu ya ulu yedile kala inda, ni midi ya itutu ya phalata, yedile kala inda, ni makwinyi ayadi ni divwa dya malonga amukwa,
10 kwexile we makwinyi atatu a matijela a ulu, hama jiwana ni dikwinyi dya matijela a phalata, ni midi ya itutu yamukwa.
11 Itutu yoso ya ulu ni ya phalata, yatenesa midi jitanu ni hama jiwana. Sebazale wambata o itutu yoso yiyi, kyoso o Jijudé* kya tundu mu Babilonya, ya avutuka ku Jeluzaleme.
Footnotes
^ Mba nange, “atunge dingi o inzo ya Jihova, yó wala mu Jeluzaleme.”
^ Nange Zolobabele, kala kilondekesa Ejidala 2:2; 3:8.
^ Mu Heba.: “kyoso o athu a akwikile.”
