Ejidala 3:1-13
3 Kyoso kyabhixila o mbeji ya kasambwadi, akwa Izalayele anga akala kya mu jimbanza jâ, abakana kudibhongolola mu Jeluzaleme.
2 Jesuwa mon’a Jozadake kumoxi ni akunji amukwa ni Nzolobabele mon’a Salatiyele ni jiphange jê, amateka kutunga o kalatódyu ka Nzambi ya Izalayele phala kubhakula-mu jisata jakwoha kala kyosoneke mu kijila kya Mozé o selevende ya Nzambi yakidi.
3 Sumbala exile ni wôma wa athu a jixi ja akondolokele, atungu mwene o kalatódyu bhu kididi bhu kakexile kyá, amateka kubhakula jisata jakwoha kwa Jihova, o jisata jakwoha ja kamene ni ja ngoloxi.
4 Abhange o Fesa ya Jibalaka kala kya ki sonekene, izuwa yoso abhakula o jisata jakwoha jatokalele kubhana mu kizuwa ni kizuwa.
5 Mukusuluka abhakula o jisata jakwoha ithangana yoso, o jisata ja mbeji ya thethama, ni jifesa joso jikôla ja Jihova ni jisata jabheka athu oso ni muxima woso mu vondadi yâ kwa Jihova.
6 Tunde mu kizuwa kya dyanga kya mbeji ya kasambwadi, amateka kubhakula jisata jakwoha kwa Jihova, sumbala o madisesa a tembulu ya Jihova ka atele luwa.
7 Ene abhana kitadi ku akwa kubula o matadi ni ku asongi a mabaya, abhana we ima ya kudya ni ya kunwa ni máji ku akwa Sidónya ni ku akwa Tilu, mukonda dya kubheka mabaya a mixi ya misédulu atundu ku Libanu, abhiti-nawu mu musanza wa kalunga kate ku Jope, kala kyatumu Silu sobha ya Pélesa.
8 Ku muvu wa kayadi tunde kya bhixila mu inzo ya Nzambi yakidi mu Jeluzaleme, mu mbeji ya kayadi, Nzolobabele mon’a Salatiyele ni Josuwa mon’a Jozadake, amateka o kikalakalu kya kutunga kumoxi ni jiphange jê jamukwa, o akunji ni Jilevita, ni athu oso a akwikile ya avutuka mu Jeluzaleme. Ene asolo Jilevita atenesene kya makwinyi ayadi a mivu mba abhitile kya mu kitala kiki, phala kwendesa o kikalakalu kya kutunga o inzo ya Jihova.
9 Bhenyobho, Jesuwa ni an’ê ni jiphange jê, ni Kadimiyele ni an’ê, exile an’a Judá, adibundu phala kwendesa o kikalakalu kya inzo ya Nzambi yakidi, kumoxi ni an’a Henadade, ni jindandu jâ exile we Jilevita.
10 Kyoso o atungi kyate o madisesa a tembulu ya Jihova, o akunji ate o izwatu yâ ya ukunji, akwata we jikoloneta, o Jilevita an’a Azafe akwata jimbânza,* emana amateka kuximana Jihova kala kyatendelesele Davidi Sobha ya Izalayele.
11 Ene anga amateka kuximana ni kusakidila Jihova, kibuka kimoxi kyamateka o kwimba, o kyamukwa kyamateka o kutambwijila, exi: “Nzambi muthu wambote. O henda yakidi yene mulondekesa ku akwa Izalayele, inangenena kate ku hádya ni hádya.” Mundu woso anga udikola ni dízwi dyaswina mu kuximana Jihova mukonda dya kuta o madisesa a inzo ya Jihova.
12 Akunji avulu a Jilevita, ni atwameni a miji ni adyakime amonene o inzo yokulu, adidi ni dízwi dyaswina, mu kumona kuta o madisesa a inzo ya ubhe, avulu mudyâ adikola ni dízwi dyaswina mukonda dya kusanguluka.
13 Kyenyiki, kwabhonzele o athu kutungula o mbimbi ya kusanguluka ni mbimbi ya kudila, mukonda o dízwi dya kudikola kwa mundu, dyexile mubhixila dikanga.
Footnotes
^ Mba, “simbalu.”
