Ejidala 7:1-28
7 Mukubhita o ima yiyi, mu utuminu wa Artaxerxe sobha ya Pélesa, Ejidala* wavutuka. Mwene wexile mon’a Selayiya, mon’a Azadiya, mon’a Hilikiya,
2 mon’a Salume, mon’a Zadoko, mon’a Ahitube,
3 mon’a Amadiya, mon’a Azadiya, mon’a Melayote,
4 mon’a Zelakiya, mon’a Uzi, mon’a Buki,
5 mon’a Abizuwa, mon’a Fineya, mon’a Eliyazale, mon’a Alá, o mukunji wadikota.
6 Ejidala watundu ku Babilonya. Mwene wexile musoneki wejidile kyambote o Kijila kya Mozé kyabhanene Jihova Nzambi ya Izalayele. O sobha wa mubhana yoso yexile mubhinga mukonda Jihova Nzambi yê wexile mu mukwatekesa.*
7 Amoxi ku akwa Izalayele, akunji, jilevita, jingimbidi, ajikwidi a mabhitu ni jiselevende ja tembulu, abande ku Jeluzaleme mu muvu wa kasambwadi wa utuminu wa sobha Artaxerxe.
8 Ejidala wabhixila mu Jeluzaleme ku muvu wa kasambwadi mu mbeji ya katanu, ya utuminu wa Sobha.
9 Mwene watundu mu Babilonya mu mbeji ya dyanga mu kizuwa kya dyanga yu wabhixila mu Jeluzaleme mu kizuwa kya dyanga kya mbeji ya katanu, mukonda Nzambi yê wexile mu mukwatekesa.
10 Ejidala wapelepalala o muxima wê phala kudilonga o Kijila kya Jihova ni ku kikumbidila ni kulonga o itendelesu ni jingonge jê mu Izalayele.
11 Yú wene o mukanda watumikisa sobha Artaxerxe kwa Ejidala o mukunji ni musoneki, wejidile kyambote o itumu ya Jihova ni itendelesu yê yabhele ku akwa Izalayele:
12 * “Eme Artaxerxe sobha ya jisobha, nga musonekena Ejidala, o mukunji ni musoneki wa Kijila kya Nzambi ya dyulu. Kala ni kutululuka kwa kidi.
13 Ngabhana ngonge kwila, athu oso mu utuminu wami, atokala ku Izalayele, kumoxi ni akunji’â ni jilevita, se kyene kya mesena, aye kumoxi n’eye ku Jeluzaleme.
14 Mukonda eye a kutumikisa kwala o sobha ni sambwadi dya akwatekexi’ê, phala kutokwesa se o Kijila kya Nzambi yê ki wala-nakyu, a mukikumbidila mu Judá ni mu Jeluzaleme.
15 Watokala kwambata we o phalata ni ulu yabhana o sobha ni akwatekexi’ê mu vondadi yâ, phala o Nzambi ya Izalayele, wala mu Jeluzaleme,
16 ni phalata ni ulu yoso iwanda tambula* mu kibatu kyoso kya Babilonya, ni maujitu we anda bhana o mundu ni akunji mu vondadi yâ, phala o inzo ya Nzambi yê yala mu Jeluzaleme.
17 Ni kitadi kiki, sé kulaleka, watokala kusumba jingombe, jimbudi ja ndumbe, ni tumbudi, ni maujitu a kudya ni a kunwa. Watokala ku abhana mu kalatódyu kala mu inzo ya Nzambi yé mu Jeluzaleme.
18 “O phalata ni ulu yanda subhuka, eye ni jiphange jé, mutena kubhanga-nayu yoso i mwamesena kala kyala mu vondadi ya Nzambi yenu.
19 O itutu yoso yanda kubhana phala o ikalakalu ya inzo ya Nzambi yé, bhakula-yu bhu pholo ya Nzambi mu Jeluzaleme.
20 Ima yoso iwanda bhindamena phala o inzo ya Nzambi yê, wanda ifuta ni kitadi kyanda tunda mu inzo ya sobha.
21 “Eme Sobha Artaxerxe, ngatumina oso akwa kubhaka o jimbongo, ku mbandu kufwila o dikumbi ya ngiji ya Ewufalate kwila, abhane sé kulaleka yoso yabhingi Ejidala, o mukunji ni musoneki wa Kijila kya Nzambi ya dyulu,
22 kate hama ya jitalendu* ya phalata, hama ya jikolo* ja tiliku, hama ya jibatu* ja vinyu, hama ya jibatu ja máji, ni môngwa wavulu.
23 Yoso yatumu o Nzambi ya dyulu yalungu ni inzo ya Nzambi ya dyulu, a ibhange ni kuswina kwoso, phala kikukale njinda ku thandu dya twana twa sobha ni ku athu ku utuminu wa sobha.
24 Ejiyenu-kyu we kwila, ki mwatokala kukobhalala malubhaku ku akunji, ku jilevita, ku jingimbidi, ku ajikwidi a mabhitu, kujiselevende ja tembulu mba ku akalakadi a inzo yiyi, ya Nzambi.
25 “Eye Ejidala, bhukaxi ka unjimu wa kubhana Nzambi yê, sola akwatekexi a afundixi ni afundixi phala kufundisa o mundu woso, wala ku mbandu kufwila o dikumbi ya ngiji ya Ewufalate, kifwa oso ejiya o Ijila ya Nzambi yé phala ku ilonga kwa yó ka ijiya.
26 Muthu woso ukamba kubelesela o Kijila kya Nzambi yé ni kya sobha, atokala ku mufundisa ni ku mubalakala kufwa, ku mukwika, kufuta múluta mba ku muta mu kaleya.”
27 Jihova Nzambi ya jitata jetu atane-ku, wate ku muxima wa sobha o vondadi ya kufwamesa o inzo ya Jihova yala mu Jeluzaleme!
28 Mu henda yê yakidi ya ngikwatela mwene wabhangesa o sobha, o akwatekexi ni ilamba ya sobha ku ngitala mu ukexilu wambote. Kuma Jihova Nzambi yami, wexile mu ngikwatekesa, kiki, kya ngibhana kuswina, eme ngayi muzwela ni atwameni a miji a Izalayele phala aye kumoxi n’eme.
Footnotes
^ Dilombolola, “kikwatekesu.”
^ Mu Heba.: “mukonda o lukwaku lwa Jihova Nzambi yê, lwexile ku thandu dyê.”
^ Ejidala 7:12 ndu 7:26, adyanga ku isoneka mu dimi dya Alamayiku.
^ Mu Heba.: “iwanda sanga.”
^ O talendu imoxi yasokele ni 34,2 a jikilu. Tala o Kiba. B14.
^ O kolo imoxi ya sokele 220 a jilitulu. Tala o Kiba. B14.
^ O batu imoxi yasokele ni 22 a jilitulu. Tala o Kiba. B14.
