Ejidala 8:1-36
8 Yá ene o atwameni a miji, kala kya asoneka mu uvwalukilu wâ, atundu n’eme ku Babilonya, kyoso sobha Artaxerxe kyexile mutumina:
2 Ku an’a Fineya, Ngelexome; ku an’a Itamale, Daniyele; ku an’a Davidi, Hatu;
3 ku an’a Sekaniya, ku an’a Paloji, Zakadiya, kumoxi ni mwene, kya akondala atenesa hama ni makwinyi atanu a mayala.
4 Ku an’a Pahate-Mowabe, Eliyohwenayi mon’a Zelakiya, kumoxi ni mwene kya akondala atenesa hama jiyadi ja mayala.
5 Ku an’a Zatu, Sekaniya mon’a Jahasiyele, kumoxi ni mwene atenesa hama jitatu ja mayala.
6 Ku an’a Adimi, Hebede mon’a Jonatá, kumoxi ni mwene atenesa makwinyi atanu a mayala.
7 Ku an’a Elame, Jesaya mon’a Ataliya, kumoxi ni mwene atenesa makwinyi asambwadi a mayala.
8 Ku an’a Sefatiya, Zebadiya mon’a Mingedi, kumoxi ni mwene atenesa makwinyi anake a mayala.
9 Ku an’a Jowabe, Obadiya mon’a Jiyele, kumoxi ni mwene atenesa hama jiyadi ni dikwinyi ni dinake dya mayala.
10 Ku an’a Bani, Selomite mon’a Jozifiya, kumoxi ni mwene atenesa hama ni makwinyi asamanu a mayala.
11 Ku an’a Bebayi, Zakadiya mon’a Bebayi, kumoxi ni mwene atenesa makwinyi ayadi ni dinake dya mayala.
12 Ku an’a Azengadi, Johanane mon’a Katane, kumoxi ni mwene atenesa hama ni dikwinyi dya mayala.
13 Ku an’a Adonikane, o majina a yó asukidila-ku mu kuvutuka, enyá: Elifelete, Jehiyele ni Semaya, kumoxi ni mwene atenesa makwinyi asamanu a mayala.
14 Ku an’a Bikivayi, Utayi ni Zabudi, kumoxi ni ene atenesa makwinyi asambwadi a mayala.
15 Ngabhongolola o mundu bhu mbandu ya ngiji ikungulukila ku Ahava, anga tukala bhenyobho mu izuwa itatu. Maji kyoso ki ngatonginina o mundu ni akunji, kingisange-bhu né ngo Levita imoxi.
16 Kyenyiki ngexana Eliyezele, Adiyele, Semaya, Elenatane, Jadibe, Elenatane, Natane, Zakadiya ni Melulane, o mayala exile ku pholo, ni Nzwadibe ni Elenatane, o alongexi.
17 Mukusuluka nga atumikisa kwa Idu, o mutwameni wa kididi a kixana Kazifiya. Eme nga atangela phala kubhinga kwa Idu ni ku jiphange jê o jiselevende ja tembulu, akexile musidivila mu Kazifiya, n’a tutumikise akunji phala o inzo ya Nzambi yetu.
18 Kuma Nzambi wexile mu tukwatekesa, atubhekela diyala dyala ni kilunji, ku an’a Mahali mulawula wa Levi mon’a Izalayele, amwixana Selabiya, kumoxi ni an’ê ni jiphange jê, dikwinyi ni dinake dya mayala,
19 ni Hasabiya kumoxi ni Jesaya, watokala ku an’a Meladi, kumoxi ni jiphange jê ni twana twâ, makwinyi ayadi a mayala.
20 Kwexile we hama jiyadi ni makwinyi ayadi a jiselevende ja tembulu abhele Davidi ni ilamba, phala kukwatekesa o Jilevita mu ikalakalu yâ, enyoso a asolele mu majina mâ.
21 Mukyenyiki ngabhana ngonge phala ku jejuwala* bhu mbandu a ngiji ya Ahava, phala kudyondela bhu pholo ya Nzambi yetu phala ku mubhinga n’a twendese mu njila itweji bhanga kumoxi ni twana twetu ni jimbote jetu joso.
22 Ngexile ni jisonyi ja kubhinga masoladi kwa sobha, ni masoladi endela mu jikabalu phala kutulanga ku jinguma mu njila, mukonda twambele kwa sobha kwila, Nzambi yetu, ukwatekesa yó a musota, maji o kutena ni njinda yê, ikala ku thandu dya yó a mubhana o dikunda.”
23 Mukyenyiki, twa jejuwala, étu twabhingi o kikwatekesu kwa Nzambi yetu kyalungu ni maka enyá. Mwene anga wivwa o kudyonda kwetu.
24 Mwaxaxi ka akunji exile ku pholo, ngasolo-bhu dikwinyi ni kiyadi. Selabiya, Hasabiya ni dikwinyi ku jiphange jâ.
25 Nga apezalela o phalata, o ulu ni itutu kifwa, o maujitu oso phala o inzo ya Nzambi yetu abhana o sobha ni akwatekexi’ê ni ilamba yê, ni akwa Izalayele oso exile kwenyoko.
26 Nga apezalela eme nga abhana we hama jisamanu ni makwinyi atanu a jitalendu* ja phalata, hama ya itutu ya phalata yasokele ni jitalendu jiyadi, hama ya jitalendu ja ulu,
27 ni makwinyi ayadi a matijela a ulu atele midi ya jidáliku* ni itutu iyadi ya ngondo yozunze, mu kubhenya ikusuka, yate kala ima yobhange ni ulu.
28 Eme nga ambela-phe: “Enu mu athu akôla phala Jihova, o itutu ima ikôla we, o phalata ni ulu maujitu u mwabhana mu vondadi yenu phala Jihova, o Nzambi ya jikuku jenu.
29 Bhakenu kyambote o ima yiyi kate ki mu ipezala mu maxilu a inzo ya Jihova bhu pholo dya atwameni a akunji, a Jilevita, ni bhu pholo dya ilamba, dya atwameni a miji ya Izalayele mu Jeluzaleme.”
30 O akunji ni Jilevita atambula o phalata, o ulu ni itutu ya pezalele kyá phala ku yambata mu Jeluzaleme, mu inzo ya Nzambi yetu.
31 Mukusukaku, mu kizuwa kya dikwinyi ni kiyadi mu mbeji ya dyanga, twakatuka bhu mbandu a ngiji ya Ahava phala kuya mu Jeluzaleme. Nzambi yetu wexile mu tukwatekesa, yu watubhulula bhu maku a jinguma jetu phala mu njila ka tukwate mu mibhetu yâ.
32 Twabhixila-phe mu Jeluzaleme anga tubhita-mu izuwa itatu.
33 Mu kizuwa kya kawana twapezala o phalata, o ulu ni itutu yoso mu inzo ya Nzambi yetu, étu twa ibhana ku mukunji Melemote, mon’a Uliya. O akwa exile-nê kumoxi, Eliyazale mon’a Fineya ni Jilevita Jozabade mon’a Jesuwa ni Nowadiya mon’a Binuwi.
34 Ima yoso a ikondala ya a ipezala. O pezu yoso anga a isoneka.
35 O yó a ambatele mu ixi yengi, a akwikile yá avutuka, abhakula jisata jakwoha kwa Nzambi ya Izalayele, abhakula dikwinyi ni kiyadi kya tungombe phala o Izalayele yoso, makwinyi avwa ni samanu a jindumbe ja jimbudi, makwinyi asambwadi ni sambwadi atumbudi, ni dikwinyi ni kiyadi kya isutu ya hombo, kala sata phala kuloloka o ituxi, joso jiji jisata jakwoha phala Jihova.
36 Kyenyiki, twabhana o ngonge ya sobha ku jikabhitangu* ja sobha ni ku jinguvulu ku mbandu kufwila o dikumbi ya ngiji ya Ewufalate, ene akwatekesa o mundu ni inzo ya Nzambi yakidi.
Footnotes
^ Mba, “kujila.”
^ O talendu imoxi yasokele ni 34,2 a jilograma. Tala o Kiba. B14.
^ Dáliku dyexile dibele dya ulu dya akwa Pélesa. Tala o Kiba. B14.
^ Mu mikanda yokulu, bhabha atumbula dijina dya ujitu dya akwa Pélesa, dilombolola “athu alanga o unguvulu.” Bhabha, o kizwelu kiki kilombolola o jinguvulu jexile mutumina o ibatu, mu utuminu wa Pélesa.
