Ejidala 9:1-15
9 Kyazubha kubhanga o ima yiyi, o ilamba yeza kokwami ya a ngitangela: “O mundu wa Izalayele, o akunji ni Jilevita, kaditungula mwaxaxi ka athu a jixi ja akondoloka, ni ku ibhangelu yâ yayibha, o ibhangelu ya akwa Kanana, ni ya akwa Hete ni Mapelezi, ni Majebuze ni akwa Amone ni akwa Mowabe ni akwa Ijitu ni akwa Mamodi.
2 Ene asolo-bhu ahatu phala kukazala-nawu, ni kukazalesa an’a a mala. Kindala, ene, kifwa, o mwiji* ukôla wadibundu ni akwa jixi ja akondoloka. O ilamba ni akwatekexi a jinguvulu éne abetele dingi kota mu kukamba kulondekesa o ufiyele mu ukexilu yú.”
3 Kyoso ki ngevu o maka yá, ngatandula o izwatu yami ni divunga dyami, ngavuza o ndemba ku mútwe wami ni ku mwezu, éme ngaxikama ni kuluwala kwavulu.
4 Mukusuluka, oso akexile ni wôma wa izwelu ya Nzambi ya Izalayele, a ngibhongolokela mukonda dya kukamba o ufiyele wa mundu a akwikile ya avutuka. Eme ngaxikamene hanji ni kuluwala kwavulu, kate mu ola ya kubhakula o sata ya kudya* ya ngoloxi.
5 O kyabhixila o kithangana kya kubhana o sata ya kudya ya ngoloxi, ngabalumuka mukuditolesa kwami, ni kizwatu kyami ni divunga dyami dyatanduka. Ngafukama, ngaleka o maku kwa Jihova Nzambi yami,
6 eme ngambe: “Nzambi yami tata, jisonyi ja ngikwata, ngalembwa kubhetula o pholo yami kokwé, éye u Nzambi yami, mukonda ituxi yetu yadibandekesa ku thandu dya mítwe yetu, o ikuma yetu yabhixila kate ku dyulu.
7 Tunde mu izuwa ya jikuku jetu kate lelu, o kikuma kyetu kyene mu dibandekesa. Mukonda dya ikuma yetu, etu ni jisobha ni akunji etu, éne mu tubhakula bhu maku a jisobha ja akwa jixi jengi. Ene mu tujibha ni xibhata, ku tukwika, ku tutambula o ima ni ku tukwatesa jisonyi, kala kyadimonekena lelu.
8 Maji kindala, mu kithangana kyofele, Jihova Nzambi yetu, wa tukwatela henda mukubhangesa kwila, mwaxaxi ketu mukala athu abhuluka, ni ku tubhana kididi kyakondama mu kididi kyê kikôla phala ku tusangulukisa* ni ku tubhetula o muxima mu ubhika wetu.
9 Mukonda, sumbala tu abhika, o Nzambi yetu katwehelela mu ubhika. Maji, mu henda yê yakidi ya tukwatela, mwene wabhangesa o jisobha ja Pélesa ku tutala mu ukexilu wambote, phala ku tuswinisa, ni tutene kutunga o inzo ya Nzambi yetu ni kutunga dingi mu jingundu, phala mu Judá ni Jeluzaleme mukale dingi ilumbu i tufikidila.
10 “Maji kindala-phe, mukubhita o ima yoso yiyi Nzambi yetu, ihi i twanda zwela? Mukonda kitubelesela o itumu
11 i wa tubhana bhukaxi ka jiselevende jé, o jipolofeta, wixi: ‘O ixi i mwa mubokona phala ku ilundula, ixi yakasana mukonda dya ufusa wa athu a jixi ja mikondoloka. A izalesa ni ufusa tunde ku yamatekena kate ku yasuku, mukonda dya ufusa wâ.
12 Kyenyiki, kimubhane an’enu a ahatu ku an’â a mala, o an’â ahatu kimwatambule phala o an’enu a mala. Kimubhange kima kyoso-kyoso phala o kutululuka kwâ ni mbote yâ. Mukubhanga kiki, mwanda swina, mwanda dya o kudya kwabetakota o kuwabha kwa ixi. O ixi mwanda ilundula phala an’enu kate ku hádya ni hádya.
13 Mu ima yoso yiyi ya tubhiti, mukonda dya ibhangelu yetu yayibha ni kutondala kwetu, éye u Nzambi yetu, kiwatufundisa kala kya fwama o itondalu yetu, watubhana hanji o ubhulukilu kala kitwala kiki ku mwenyu.
14 O kwila twanda bhukumukina dingi o itumu yê ni tuxikina o maukaza ni ifuxi ibhanga o ima yayibha? Kikyeji kubhekela njinda yadikota ni ku tubwikisa kate kikukamba kusubhuka muthu?
15 Jihova tata, Nzambi ya Izalayele, eye wayuka, mukonda wabhulula amoxi mudyetu mu kizuwa kya lelu. Twala bhabha bhu pholo yé, twala ni kikuma. Mukonda dya kikuma kiki, kitutena kwimana bhu pholo yé.”
Footnotes
^ Mu Heba.: “mbutu.”
^ Mba, “sevada; tiliku.”
^ Mu Heba.: “kubhangesa o mesu etu kubhenya.”
