Kwa Filimone 1:1-25
1 Eme Phawulu, ngi phelezu mukonda dya Kidistu Jezú, kumoxi ni phang’yetu Timote, twa mu sonekena Filimone mukwatekexi wetu wakazola,
2 ni Afiya, phang’yetu ya muhatu, ni Alukipu disoladi ni mukwetu mwa Kidistu, ni kilunga kyene mudyongeka mu inzo yé:
3 Kalenu ni henda ya Nzambi, Tata yetu, ni kutululuka kutunda kwa mwene, ni kwa Ngana yetu Jezú Kidistu.
4 Ngene mu sakidila jinga Nzambi, kyoso ki ngi kutumbula mu misambu yami,
5 mukonda ngene mu kwívwa yalungu ni kixikanu ni henda yé kwa Ngana Jezú, ni kwa yó a asolo* kwa Nzambi.
6 Ngisamba phala o kixikanu kitwala nakyu ki kwijidise o mbote yoso itwala nayu bhukaxi ka Kidistu.
7 Phang’yami, o kwívwa yalungu ni henda i wene mu londekesa, kwa ngi sangulukisa, kwa ngi kolokotesa we, mukonda eye waswinisa o mixima ya athu a asolo kwa Nzambi.
8 Mukonda dya kiki, né mwene ngala ni ufôlo mwa Kidistu, wa ku kutumina kubhanga o kima kyatokala,
9 ngasolo ku kubhinga ni henda, kuma eme Phawulu ngakuka kyá, mu kindala kiki ngala mukaleya, mukonda dya Kidistu Jezú.
10 Nga mu kudyondela mon’ami Onézimu, mukonda kyoso kyakexile mu kaleya,* nga dibhange ngi tat’ê.
11 Sumbala m’ukulu, ka ku kwatekesele, maji kindala, mwene u tu kwatekesa kyavulu, kikale eye mba eme.
12 Nga mu kutumikisa-nê dingi, mwéne o muxima wami.*
13 Kuma ngala hanji mu kaleya mukonda dya njimbu yambote, nga mesenene kwila, mwene ukala kumoxi n’eme bhu kididi kyé, phala ku ngi kwatekesa.
14 Maji, kingimesena kubhanga kima kyoso-kyoso sé ku kwijidisa, phala o mbote i ubhanga ki ikale ya ku kujijidika, maji u ibhanga ni muxima woso.
15 Nange kyene kya mubhangesa ku kuxisa kakithangana,* phala o kyavutuka akale n’eye katé ku hádya,
16 kana dingi kala mubhika, maji mubhika ndenge kyá, kuma wala phange yakazola bengebenge phala eme, maji kota-kota dingi phala eye, kikale mu ukamba wenu mu xitu, mba ku uphange mwa Ngana.
17 Se wangimono kwila ngi dikamba dyé, mutambulule ni henda yoso, kala kiweji ngitambulula eme.
18 Se wa kuzangela kimbamba, mba wakudi dikongo, nganda kufuta nadyu.
19 Eme Phawulu, ngasoneka ni lukwaku lwami, kwila nganda difuta, ki ngabhingi ku kutangela kwila, o dikongo* dyé kokwami dya betakota.
20 Mu kiki phang’yami, nga mukingila kutambula o kikwatekesu kiki mwa Ngana. Sangulukisa o muxima wami bhukaxi ka Kidistu.
21 Kyene ki nga mu kusonekena, mukonda ngadyelela kwila, wanda bhanga o kima ki nga kubhingi. Ngejiya kwila o ima i nga mu kubhinga, ki yene ngó iwanda bhanga, maji wanda bandekesaku dingi.
22 O kya mukwá, ngiyudikile kididi phala kukala, mukonda ngadyelela kwila, bhukaxi ka misambu yenu anda ngibhana o ufôlo* phala ngimisange koko.
23 Epafala, ngala né kumoxi mukaleya mukonda dya Kidistu Jezú, wa kutumikisa o umenekenu,
24 ni akalakadi ni akwetu, Máluku, Adistaku, Demaze, ni Luka.
25 O ukexilu wenu wambote, u mi bhangese kutambula o henda ya Ngana yetu Jezú Kidistu.
Footnotes
^ Mba, “ku athu ayuka bhu pholo ya Nzambi.”
^ Mu Ngel.: “mu malubhambu.”
^ Mba, “nga mu zolo kyavulu.”
^ Mu Ngel.: “ola imoxi.”
^ Mba, “mwenyu wé.”
^ Mba, “anda ngi jituna.”
