Ku Akwa Filipe 1:1-30
1 Eme Phawulu ni Timote, tu abhika a Kidistu Jezú, twa mu sonekena o athu oso o’sole* o maxibulu a Kidistu Jezú atungu mu mbanza ya Filipe, twa sonekena we o tufunga ni akwatekexi a tufunga:
2 O ngalasa ni kutululuka kwa Nzambi Tat’etu, ni kwa Ngana Jezú Kidistu, kukale ni enu.
3 Ngene mu sakidila jinga Nzambi yami, kyoso ki ngi mixinganeka,
4 kyoso ki ngi midyondela mu misambu yami. O kudyonda kwami ngi kubhanga ni kusanguluka kwoso,
5 mukonda dya kikwatekesu ki mwabhana phala ku sanzumuna o njimbu yambote, tundé o kizuwa kya dyanga ki mwa ixikina katé kindala kiki.
6 Kuma ngadyelela kwila, Nzambi Yó wamateka kubhanga kikalakalu kyambote momwenu, wanda kizubha katé kyanda bhixila o kizuwa kya Kidistu Jezú.
7 Kima kyambote ku mixinganeka kiki mukonda ngamizolo ni muxima wami woso, kuma enu mwatambula we o ngalasa ya Nzambi kala eme, kikale kindala mu kaleya mungala ni kyoso ki ngakexile muzokela o njimbu yambote bhu pholo ya jinguvulu.
8 Nzambi wala mbangi yami, kuma ngamesena kyavulu ku mimona, mukonda ngamizolo kyavulu kala kyamizolo Kidistu Jezú.
9 Mu misambu yami ngene mubhinga kwila o henda yenu ni kwijiya kwa kidi kudibandekese dingi ni mukale ni kilunji kya kutongoloka.
10 Phala mutene kwijiya o ima yabetakota, ni mu kale sé dixaka, ki mubhangese we akwenu kuta kituxi katé mu kizuwa kya Kidistu.
11 Ni mwizale ni ibundu yayuka, ijila bhukaxi ka Jezú Kidistu, phala kujingisa ni kuximana Nzambi.
12 Phange jami, ngamesena mwijiya kwila, o ima ya mubhita ku mwenyu wami, yabhangesa kwila o njimbu yambote idimwanga,
13 mukonda o alangidi a nguvulu ni athu oso ejiya kwila, eme angikutu mu malubhambu mukonda dya Kidistu.
14 Kindala jiphange javulu mwa Ngana, ala dingi ni kidyelelu mukonda dya malubhambu u ngala nawu, ene aswina dingi phala kubokela o athu o mak’â Nzambi sé wôma.
15 Twejiya kwila sayi athu a muboka o njimbu yambote yalungu ni Kidistu ni lwimbi ni unguma, maji athu amukwa a muboka ni muxima wambote.
16 O athu a muboka ni muxima wambote azwela o njimbu yambote yalungu ni Kidistu ni henda yoso, kuma ene ejiya kwila a ngisolo phala kuzokela o njimbu yambote.
17 Maji o yó aboka o njimbu yambote yalungu ni Kidistu ni lwimbi ni unguma, ene abhanga kiki ni kubhânga mudyâ, kana ni muxima wambote, mukonda ene amesena ku ngi bhekesa maka mu kithangana kiki ki ngala mu kaleya.
18 Mukonda dyahi? Phala mu maukexilu oso né mu mangonya mba mu kidi, o njimbu yambote yalungu ni Kidistu a mu iboka mu ididi yoso, kiki ki ngi sangulukisa. Mu kyenyiki, nganda suluka ni kusanguluka.
19 Kuma ngejiya kwila, kiki kyanda ngi bhulula mukonda dya kudyonda kwenu, ni bhukaxi ka kikwatekesu kya nzumbi ikôla ibhana Jezú Kidistu.
20 Kiki kyalungu ni kima ki ngamesena kyavulu ni kidyelelu ki ngala nakyu kwila, ki nganda kala ni jisonyi ja kima kyoso-kyoso. Maji mu kuzwela ni kuswina o athu anda jingisa Kidistu kindala, kala kyene mu mujingisa kyá tundé ukulu bhukaxi ka mukutu wami, kikale ku mwenyu kikale mu kufwa.
21 Mudyami, o mwenyu ngi umwena mwa Kidistu, se ngifwa, nga bhanduluka.
22 Maji se ngi suluka kwambata o mwenyu wami mu ukexilu wa xitu, kiki kijila mu ikalakalu yami, maji o ima i ngisola ki ngi ijidisa ku athu.
23 Ngala ni ibhidi iyadi, nga mesena kubhuluka ni kukala ni Kidistu, kiki kyene o kima kya betakota.
24 Maji ngamono kwila mukonda dyenu, kima kyambote kwambata o mwenyu wami mu ukexilu wa xitu.
25 Kuma o kima kiki nga kijiya kyambote, ngejiya kwila nganda nangenena ni kukala ni enu phala mukule dingi ni mu sanguluke mu kixikanu kimwala nakyu.
26 Kyoso kinganda kala dingi ni enu, o kusanguluka kwenu mwa Kidistu Jezú kwanda dibandekesa dingi mukonda dyami.
27 Kala kiki, o wendelu wenu ukale wendelu wafwama, mu njimbu yambote ya Kidistu, phala kikale se ngiya mu mikunda mba kana, ngivwa jinjimbu kwila mwa kolokota ni muxima umoxi, mwakwata we nguzu mukonda dya kixikanu kyenu ku njimbu yambote.
28 Kanenu kukala ni wôma wa jinguma jenu, mukonda kiki kilondekesa kwila ene anda kwa bwikisa, maji enu anda mi bhulula. O kima kiki kitunda kwa Nzambi.
29 Mukonda mwa Kidistu enu ki mwatambula ngó o ujitu wa ku muxikana kana, maji mwatambula we o ujitu wa kutala hadi mukonda dya mwene.
30 Mukonda enu mwa mulwa o ita i nga lwile eme, kala ki mwakijiya o ita yiyi nga mu ilwa hanji katé kindala.
Footnotes
^ Mu Ngel.: “athu akôla.”
