Ku Akwa Filipe 2:1-30
2 Kuma enu mwala kumoxi ni Kidistu, mwene mu konda o malamba ni kukolokotesa akwenu,* mukonda dya henda, mu suwa o ibhindamu ya akwenu, mu akwatela we henda.
2 Mu kubandekesa o kusanguluka kwami mu kukala ni ukexilu umoxi mu kubanza, mu kukala we ni henda ni kukala ni muxima umoxi, ni kilunji kimoxi.
3 Ki mubhange kima ni unguma mba ni lwimbi, maji ni kulenduka kwoso, akwenu mwamona kala ala kota enu ndenge.
4 Kanenu kusota ngó o mbote yenu, maji musota we o mbote ya akwenu.
5 Kalenu ni kixinganeku kimoxi kala kyakexile nakyu Kidistu Jezú.
6 Sumbala mwene wakexile mu kidifwanganu kya Nzambi, maji mwene nuka wa xinganekene o kusokela ni Nzambi.
7 Maji mwene waditolesa, wa kituka kala mubhika yu wadibhange muthu mu xitu.*
8 Kyoso kyeza kala muthu mu xitu,* mwene waditulula yu watumaka katé mu kufwa, mu ku mu phaphela ku taka.*
9 Mukonda dya kyenyiki, Nzambi wa muzangeleka mu kididi kya katunda, ni henda yoso wa mubhana we dijina dyatundu o majina moso.
10 Phala mu dijina dya Jezú athu oso afukame, kikale ku dyulu kikale mu ixi ni koxi a mavu.
11 Athu oso n’ejiye kwila Jezú Kidistu mwéne o Ngana, phala o fuma ya Nzambi, o Tata.
12 Enu akwetu phange jami ja kazola, enu ki mwene mutumaka ngó kyoso ki ngikala ni enu, maji kindala mwa mubhanga dingi kiki, bengebenge mu kithangana ki ngikamba kukala ni enu. Kyenyiki bhangenu nguzu phala mubhuluke, kiki mu kibhanga ni wôma ni kuxila kwoso.
13 Mukonda Nzambi mwene u mi swinisa mu ku mibhana o hânji ni kutena kwa kubhanga o vondadi yê.
14 Kolokotenu mu kubhanga o ima yoso sé ku dikalanganza mba kuzoka,
15 phala mukale mu athu azele akambe kikuma, mu an’â Nzambi, sé dixaka* mwaxaxi ka athu ayibha adyanguka. Enu mwa mu mwika mwaxaxi kâ kala mu mukengeji wa ngongo,
16 mu ku dikwatenena kyambote mu maka a mwenyu, kyenyiki nganda tena kusanguluka mu kizuwa kya Kidistu, mu kwijiya kwila ki ngalenge mu kingoho, ki nga kalakala we kyavulu mu kingoho.
17 Maji né mwene se a ngi zunzumuna kala vinyu kuthandu dya sata, ni mu kikalakalu kijila mu kixikanu kyenu, ngisanguluka kumoxi ni enu enyoso.
18 Kyene we kimoxi enu wenu mwatokala mu sanguluka kumoxi ni eme.
19 Se kikala mu vondadi ya Ngana Jezú, ngamesena ku mitumikisa Timote kindala, phala ngiswine kyoso kinganda tambula o njimbu yalungu ni enu.
20 Mukonda kingala ni muthu wala ni muxima wasokela ni wa mwene phala ku milanga ni henda yoso.
21 Kuma athu amukwa a musuwa ngó o ibhindamu yâ, kana o ima yamesena Jezú Kidistu.
22 Maji enu mwejiya kwila Timote wadibhakula, kala mona kyene mu kalakala ni tat’ê, mwene wakalakala n’eme kala mubhika mu kusanzumuna o njimbu yambote.
23 Kyenyiki, kyoso kinganda kwijiya o ima yanda bhita n’eme, mwéne nganda mi tumikisa-nê.
24 Mu kidi, ngala ni kidyelelu kwa Ngana kwila, kwakambe ngó bhofele, eme wami nganda kwiza kwenyóko.
25 Maji kindala ngamono kwila, kima kyambote ku mitumikisa phang’yami Epafoloditu mukalakadi ni mukwetu ni disoladi ni mukwetu mwa Kidistu, yó mwa mutumikisa phala ku ngi kwatekesa mu ibhindamu yami.
26 Kuma Epafoloditu wamesena kyavulu ku mimona enu enyoso, mwene we wala ni kikote ku muxima mukonda mwevu kwila mwene wakatele.
27 Mwene wakatele katé kyeji kufwa, maji Nzambi wa mukwatela henda, mu kidi ki mwene ngó maji n’eme we Nzambi wa ngi kwatela henda, phala ki ngikale dingi ni kikote ku muxima.
28 Mukonda dya kyenyiki, ni lusolo lwoso nga mu mitumikisa-n’ê dingi, phala kyoso kimwanda mumona musanguluke dingi, eme wami ki ngikale ni hele.
29 Mu kyenyiki, mu tambululyenu kala ki mwene mu tambulula o jiphange ja mukwa mwa Ngana, ni kusanguluka kwoso kolokotenu mu kubhana valolo ku athu kala mwene.
30 Kuma mwene hinu wafu mukonda dya kikalakalu kya Kidistu,* mwene wate o mwenyu wê mu kilwezu mukonda enu ki mwakexile bhabha phala ku ngi kwatekesa.
Footnotes
^ Mba, “ku di kwatekesa mu nzumbi.”
^ Mu Ngel.: “wa di bhange mu kidifwanganu kya athu.”
^ Mu Ngel.: “kyoso kyeza mu kidifwanganu kya athu.”
^ Tala o Dilombolwelu.
^ Mba, “sé dilunga, dixidilu.”
^ Mba nange, “kikalakalu kya Ngana.”
