Ikalakalu ya Jipoxolo 11:1-30
11 O jipoxolo ni jiphange akexile mu Judeya, evu kwila, o athu akwa jixi jengi axikina we o mak’â Nzambi.
2 Kyoso Phetele kyabhixila mu Jeluzaleme, o athu a mesenene kwila akwa jixi jengi a a saya we, a mateka kuzoka-n’ê,
3 exi: “Eye wabokona mu inzo ya athu ka asaye, wadi nawu kumoxi.”
4 Kyenyiki Phetele wamateka kwa lombolwela kyambote yoso yabhitile, wixi:
5 “Eme ngakexile mu mbanza ya Jope, musamba. Mu kisumwa, ngamono kutuluka ku dyulu kima kyadifu ni dilasola dyadikota dya linyu, dyokute mu jimbandu jiwana, dyene anga ditula bhu kididi bhu ngakexile.
6 Mwenyómo, nga mono-mu o yama yoso ya ixi yenda ni inama iwana, ni yama ya muxitu, ni yóyo idihuha ni mala bhoxi, ni jinjila jibhita bhulu.
7 Ngevu we dízwi dya ngitangela: ‘Balumuka Phetele, jibhayu ni udye!’
8 Maji eme nga mwambela: ‘Kana Ngana, mukonda kiluwa ngidya kima kyayibha mba kyaxidi.’
9 O dízwi dyatundu ku dyulu dyambe dingi lwa kayadi: ‘Yazelesa Nzambi kana ku izwela kwila yaxidi.’
10 Kima kiki kyabhiti we lwa katatu, bhenyobho ima yoso a isunga ku dyulu.
11 Mu kithangana kyenyókyo, mu inzo mu ngakexile mwabhixila mala atatu atundile ku Sezaleya, ejile mu ngisota.
12 Kyenyiki, o nzumbi ikôla ya ng’ambela phala kuya nawu sé kukala ni hele. O jiphange jisamanu jiji ayi kumoxi n’eme, etu twabokona mu inzo ya Kolonelyu.
13 “Mwene wa tutangela kwila kwa mu tukulukila anju mu inzo yê, ya mwambela: ‘Tumikisa mayala ku Jope, phala kutakana-ku Ximá amwixana we Phetele,
14 mwene wanda kutangela o ima i watokala kubhanga eye ni mwiji wé woso, phala mubhuluke.’
15 Kyoso ki ngamateka kuzwela, o nzumbi ikôla yatulukila kuthandu dyâ, kála ki yatulukile kuthandu dyetu kudimatekenu.
16 Mukonda dya kiki, nga lembalala o izwelu ya Ngana Jezú, kyoso kyambe: ‘Nzwá wa batizala ni menya, maji enu anda mi batizala ni nzumbi ikôla.’
17 Kyenyiki, se Nzambi wa abhana we o ujitu watubhele nawu, etu twaxikina Ngana Jezú Kidistu, éme nanyi phala kufidisa Nzambi?”
18 Kyoso ene kyevu o ima yiyi, kazwela dingi kima,* aximana Nzambi, ya ambe: “Nzambi wamesena we kwila, athu akwa jixi jengi adyela o ituxi yâ, n’a tambule o mwenyu.”
19 O athu a mwanganene mukonda dya kizukutisu kyejile bhukaxi ka Xitevá ayile mu jimbanza ja Fenixa, Xipele ni Andiyokiya, maji ene akexile mu bokela ngó o njimbu ku Jijudé.
20 Kyenyiki, sayi athu akwa Xipele ni Silene, ayi ku Andiyokiya, ya amateka kubokela o athu azwela o dimi dya Ngeleku, mu kwatudila o njimbu yambote yalungu ni Ngana Jezú.
21 Jihova wakexile mwa kwatekesa. Kyenyiki, athu avulu axikana, ya akituka maxibulu a Ngana.
22 O fuma yâ, yabhixila ku athu mu kilunga kya Jeluzaleme, ene atumikisa Balanabé ku Andiyokiya.
23 Kyoso mwene kyabhixila-ku, anga umona kyebhi Nzambi kya alondekesa o ngalasa yê, mwene wasanguluka kyavulu, waswinisa o athu oso n’a kolokote mu ufiyele wâ kwa Ngana ni muxima woso.
24 Mukonda mwene wexile diyala dyambote, wezalele ni nzumbi ikôla, wakexile ni kixikanu kyakolo. Kyenyiki, athu avulu axikana Ngana.
25 Mwene wayi ku Tálusu phala kusota kyambote Sawúlu.
26 Kyoso kya musange wa mwambata mu mbanza ya Andiyokiya. Ene adyôngeka ni kilunga kyenyókyo ku muvu wa muvimba, ya alongo athu avulu. Mu mbanza yenyóyo ya Andiyokiya, mwéne mwa dyangele kwixana o maxibulu a Jezú mu dijina dya Jikidistá, kala kya tendelesa Nzambi.
27 Mu izuwa yenyóyo sayi jipolofeta atundu mu Jeluzaleme ayi ku Andiyokiya.
28 Polofeta imoxi amwixana Akabu wemana, bhukaxi ka nzumbi ikôla mwene wambe kwila, mu ngongo yoso mweji kala nzala yadikota. O nzala yiyi yabhiti kyoso Kilawudyu kyexile mutumina.
29 Kyenyiki, o maxibulu asolo kutumikisa ima phala kukwatekesa o jiphange mu Judeya, kala muthu weji bhana kyoso kyakexile nakyu.
30 Ene abhange kyenyiki, ya atumikisa o ima ku tufunga bhu maku a Balanabé ni Sawúlu.
Footnotes
^ Mu Ngel.: “ene a dixibha.”
