Ikalakalu ya Jipoxolo 14:1-28
14 Mu mbanza ya Ikônyu, ene abokona mu dilombe* dya Jijudé, ya abokela o athu mu ukexilu wambote. Kyenyiki Jijudé javulu ni Jingeleku axikana Ngana.
2 Maji o Jijudé aditunu o milongi ya Ngana, afunyisa o athu akwa jixi jengi kuzemba o jiphange.
3 Ni kutena kwa Jihova, Phawulu ni Balanabé abhiti-mu ithangana yavulu mu kuboka ni kuswina kwoso o njimbu yalungu ni ngalasa ya Nzambi. Nzambi walondekesa kwila wa axikina mu kwabhana kutena kwa kubhanga madiwanu ni isumwa.
4 Maji o athu mu mbanza adiwanene mu ibuka ni ibuka, sayi yá akexile mu zokela o Jijudé, a mukwá akexile mu zokela o jipoxolo.
5 O athu akwa jixi jengi kumoxi ni Jijudé ni atwameni a Jijudé, a mesenene kwa zukutisa ni kwabuba ni matadi.
6 Kyoso Phawulu ni Balanabé kyevu o maka enyá, alengela ku Likawonya mu jimbanza ja Listra ni Delebe, ni mu jisanzala ja zukamene.
7 Kwenyóko, ene asuluka mu kuboka o njimbu yambote.
8 Mu mbanza ya Listra mwexile diyala dyexile kinema, tundé kya mu vwalele katenene kwenda,
9 mwene waxikamene mu kwívwa Phawulu. Kyoso Phawulu kya mutale swí, wamono kwila mwene wakexile ni kixikanu phala kudisanza,
10 wa mwambela ni dízwi dya swina: “Balumuka, wimane!” O diyala watuka, yu wamateka kwenda.
11 Kyoso o mundu kyamono o kima kyabhange Phawulu, adikola mu dimi dya akwa Likawonya, exi: “O jinzambi jatuluka mwaxaxi k’etu mu kidifwanganu kya athu!”
12 Ene amateka kwixana Balanabé mu dijina dya Nzewuji, o Phawulu mu dijina dya Helemeze, mukonda mwéne wakexile muzwela ni ene.
13 Kuma o tembulu ya Nzewuji yexile bhu mwelu wa mbanza, o mukunji wa nzambi Nzewuji, weza ni jingombe ni itundu ya ithulu bhu myelu ya mbanza phala mwene kumoxi ni mundu a isatele.
14 Kyoso o jipoxolo Balanabé ni Phawulu kyevu o maka enyá, atandujula o izwatu yâ, ayi ni lusolo bhukaxi ka mundu, ya adikola, exi:
15 “Enu akwetu, mwa mubhanga o ima yiyi mukonda dyahi? Etu we tu athu muxitu kala enu, tu akwa ituxi we ! Twa mu mibokela o njimbu yambote, phala muxise o ima yiyi yakambe o valolo ni muxikane o Nzambi ya mwenyu, wabhange o dyulu ni ixi ni musanza wa kalunga, ni ima yoso yala-mu.
16 M’ukulu mwene wehela o ifuxi yoso kwendela mu jinjila jâ,
17 sumbala Nzambi kabhwila mu kubhana umbangi walungu ni mwene. Maji wa mi londekesa o henda yê mu ku mibhana mvula ku dyulu, ithangana ya kubhongolola kúdya kwavulu, ni mu kwizalesa o mixima yenu ni kusanguluka.”
18 Né mwene ni kuzwela o ima yiyi, kya abhonzele kufidisa o mundu kwa bheza.
19 Kyabhixila o Jijudé a tundu mu mbanza ya Andiyokiya ni Ikônyu, ene afunyisa o mundu. Ene abuba Phawulu ni matadi ya a mukoko katé bhukanga dya mbanza, afikile kwila mwene wafu.
20 Mu kyenyiki, o maxibulu kya mu kondoloka, mwene wabalumuka, wabokona mu mbanza. Mu kizuwa kyakayela wayi kumoxi ni Balanabé mu mbanza ya Delebe.
21 Kyoso kyazubha kuboka o njimbu yambote mu mbanza yenyóyo ni kubhanga maxibulu avulu, ene avutuka ku Listra, ku Ikônyu ni ku Andiyokiya.
22 Mu jimbanza jenyójo, ene aswinisa o maxibulu phala asuluke mu kukolesa o kixikanu kyâ kwa Ngana. Ene a atangela: “Phala kubokona mu Utuminu wa Nzambi, twabhingi kubhita mu jiphaxi javulu.”
23 Ene asolo we tufunga mu ilunga yoso, asambe, ajejuwala,* a axila phala kwalanga kwa Jihova, mukonda a muxikana.
24 Mu kusuluka abhiti mu mbanza ya Pizidya, ya abhixila mu Panfídya.
25 Kyazubha kuboka o mak’â Nzambi ku Peleje, akulumuka ku Atalya.
26 Kwenyóko ene asambela mu ulungu ayi mu mbanza ya Andiyokiya, mwa a londekesele o ngalasa ya Nzambi, mukonda dya kikalakalu kyoso kyazubhile kubhanga.
27 Kyoso ene kyabhixila, ongeka o kilunga kyoso, anga a atangela o ima yoso yabhangele Nzambi bhukaxi ka ene, ni kyebhi Nzambi kya jikula o njila* phala akwa jixi jengi axikane.
28 Kyenyiki, ene akala thembu yavulu ni maxibulu.
