Ikalakalu ya Jipoxolo 19:1-41
19 Kyoso Apolo kyakexile mu mbanza ya Kolindu, Phawulu wabhiti mu jisanzala mu kibatu kya Azya, yu wa kulumuka ku Efezu. Mwenyomo wa sange-mu maxibulu,
2 wa ebhwidisa, wixi: “O kwila mwatambula o nzumbi ikôla kyoso ki mwaxikana Ngana?” Ene a mu tambwijila: “Kana! Kiluwa twívwa kwila kwene nzumbi ikôla.”
3 Mwene wa ebhwidisa dingi: “Enu a mi batizala mu batizu ya nanyi?” Ene atambwijila: “Mu batizu ya Nzwá.”
4 Phawulu wa atangela: “O batizu ya Nzwá yakexile mu londekesa kwila o athu atokalele kudyela o ituxi yâ. Mwene wakexile mu tangela o athu n’a kale ni kixikanu kwa yó weji mu kayela, Jezú.”
5 Ene kyevu o maka enyá, a abatizala mu dijina dya Ngana Jezú.
6 Kyoso Phawulu kyate o maku mê kuthandu dyâ, o nzumbi ikôla ya atulukila, ene amateka kuzwela madimi engi, ni kuzwela kala jipolofeta.
7 Ene exile kwinyi ni kiyadi kya mayala.
8 Mu jimbeji jitatu Phawulu wakexile muya mu dilombe* ni kuzwela ni kuswina kwoso. Mwene wabhange madiskulusu, ni kukwatekesa o mundu kuxikina o Utuminu wa Nzambi.
9 Amoxi aditunu kuxikana, akexile muzwela kyayibha yalungu ni Njila ya Ngana bhu pholo dya mundu. Mu kyenyiki, mwene wa axisa, yu wa katula-mu o maxibulu. Izuwa yoso Phawulu wakexile mubhanga madiskulusu mu xikola ya Tilanu.
10 Mwene walongo mu xikola yiyi mu mivu iyadi. Enyoso atungile mu kibatu kya Azya, kikale o Jijudé ni Jingeleku, evu o maka a Ngana.
11 Nzambi wakexile mubhanga madiwanu a makota bhukaxi ka Phawulu.
12 O athu akexile mu tula o izwatu yâ ni malesu ku mukutu wa mwene, ni kwa ambata ku jihaxi. O jihaxi ja kexile mu disanza, o jinzumbi jayibha ja kexile mu tunda mu mikutu yâ.
13 Sayi Jijudé akexile mu kwenda mu ididi yavulu mu kukaya o madimonyo, akexile we mu tumbula o dijina dya Ngana Jezú kwa yó akexile ni jinzumbi jayibha. Ene akexile mu zwela: “Mu dijina dya Ngana Jezú, yó a mu mu bokela kwa Phaulu, nga mi tumu, tunde-nu.”
14 Sambwadi dya twana twa mukunji wadikota wa Jijudé amwixana Seva, akexile mubhanga kyenyiki.
15 Maji o nzumbi yayibha ya ambela: “Eme ngejiya Jezú, o Phawulu nga mwijiya we, maji enu a nanyi?”
16 Kyenyiki, o diyala wakexile ni nzumbi yayibha wa ditakula kuthandu dyâ, wa abeta, wa atolola. Ene anga alenga mu inzo yenyóyo ni thuxi ni jifidila mu mikutu.
17 O maka enyá a evu ku athu oso, kikale o Jijudé ni Jingeleku ja tungile mu mbanza ya Efezu. Enyoso anga akala ni wôma, o dijina dya Ngana Jezú, akala mu difumanesa.
18 Athu avulu axikana Ngana, akexile mu kwiza phala kufisala o ituxi yâ ni kujimbulula kyambote o ima ya bhangele.
19 Avulu akexile mubhanga ima ya wanga, abheka o madivulu mâ, ya a jokotesa mu túbhya bhu pholo dya mundu woso. Mu kumona o valolo yâ, atale kwila, atenesa makwinyi a tanu a midi ya mabele* a phalata.
20 Kyenyiki, o mak’â Jihova akexile mu dimwanga dingi ni kutena kwoso, athu avulu akexile mu xikana.*
21 Kyabhiti o ima yoso yiyi, Phawulu wasoto kubhita ku Masedonya, ni ku Akaya ni kuya mu Jeluzaleme. Mwene wambe: “Kyoso ki nganda tunda kwenyóko, ngandaya we ku Loma.”
22 Kyenyiki, mwene watumikisa ku Masedonya kiyadi kya akwatekexi’ê, Timote ni Elastu, mwene anga uxala hanji tu izuwa mu kibatu kya Azya.
23 Mu izuwa yenyóyo, kwa moneka kavwanza kadikota mukonda dya Njila ya Ngana.
24 Kwexile diyala amwixana Demétulu mukwa kuyudika iteka ya phalata ya tembulu ya Alitemiza.* Mwene wabhangesa o athu akexile mu kalakala-nê mu ufunu wenyú kunganyala kitadi kyavulu.
25 Mwene wongeka yó akexile mu kalakala-nê, ni athu amukwá exile ni ufunu wenyú, yu wa ambela: “Enu akwetu, mwejiya kyambote kwila, o kitadi kyetu kijila mu wenji wenyú.
26 Enu mwa mu mona ni kwívwa kwila o Phawulu wa mu xikinisa athu avulu ku kibatu kyoso kya Azya, ki mu Efezu ngó kana. Mwene wa mwa funyisa phala kulungulula o ibanzelu yâ, mu kuzwela kwila o jinzambi jo bhange ku athu ki jinzambi ja kidi.
27 Ki twa mu xinganeka ngó kwila, o athu kanda xikina dingi o wenji wetu, maji twa mu banza we o tembulu ya nzambi ya muhatu Alitemiza* a i mona kala ki yala ni valolo. Ni kwila Alitemiza* ene ku mubheza mu kibatu kyoso kya Azya ni mu ngongo yoso a mu katula o kijingu kyê.”
28 O mayala kyevu o ima yiyi, amateka kudikola, exi: “Alitemiza o nzambi ya akwa Efezu wala ni kutena!”
29 Mbanza yoso anga izala ni kavwanza, mundu woso wa bokona ni lusolo mu kididi kya dikota* mwéne mu dyongeka o athu, ni kukoka Ngayu ni Adistaku akwa Masedonya, exile mu kwenda kumoxi ni Phawulu.
30 Phawulu wa mesenene kubokona-mu ni ku dilondekesa ku mundu, maji o maxibulu ka mwehela.
31 Katé mwene ni athu exile mu sokejeka o jijoko, yó exile makamba mê a mu tumikisa njimbu ni ku mu dyondela phala kabokone mu kididi kyenyókyo.
32 Mu kyenyiki, mwaxaxi ka mundu mwexile kavwanza kavulu, sayi yá akexile mu dikola kiki, a mukwá akexile mu dikola kyókyo, athu avulu kejidile se mukonda dyahi a dyongekele.
33 O mundu wabhangesa Xandele kutunda mwaxaxi kâ, anga o Jijudé a mu lundula katé ku pholo ya mundu. Xandele wabhange kijimbwete ni lukwaku, mukonda wamesenene kudizokela bhu pholo ya mundu.
34 Kyoso kya mono kwila mwene wexile Judé, mu ola jiyadi enyoso a kala mu dikola, exi: “Alitemiza o nzambi ya akwa Efezu wala ni kutena!”
35 Kyoso o dimixi dya mbanza kyazubha kutululukisa o mundu, wa ambela, wixi: “Enu mu akwa Efezu, nanyi mu ngongo kejiya kwila mu mbanza ya Efezu, mwéne mwala o tembulu ya Alitemiza* o nzambi wala ni kutena, ni kiteka kya lawuka ku dyulu?
36 Kuma o athu katena kukala ni phata mu ima yiyi, enu mwatokala mu tululuka, ki mubhange o ima sé ku ixinganeka kyambote.
37 Enu mwabheka bhabha o mayala yá, sumbala ene kene mu nyana mu tembulu mba kuxongwena o nzambi yetu ya muhatu.
38 Kyenyiki se Demétulu ni yó ene mu kalakala-nê kumoxi amono kwila kwala muthu wala ni kikuma, sayi izuwa yene mu jikula o jinzo ja kufundisa. Mwenyómo mwala jinguvulu, ene atena kulondekesa-mu o ikuma yâ.
39 Maji se mwa mesena kima kyengi, o maka atokala kwabatula mu mbonge yetu kala ki tuma o kijila kyetu.
40 Mukonda etu atena kututatela kwila tu akwa kavwanza, mukonda dya ima yabhiti lelu, kuma kikwala kima ki tutena kuzwela yalungu ni kavwanza kaka.”
41 Kyoso kyazubha kuzwela o ima yiyi, wa mwanganesa o mundu woso.
Footnotes
^ Mba, “kididi kya ubhezelu.”
^ Mba, “iphaka.”
^ Mba, “o maka a kala ni kutena kwavulu.”
^ Mba, “Diyana.”
^ Mba, “Diyana.”
^ Mba, “Diyana.”
^ Mba, “teyátulu.”
^ Mba, “Diyana.”
