Ikalakalu ya Jipoxolo 2:1-47
2 Mu kizuwa kya Fesa ya Pendekoxi, o maxibulu oso akexile mu kididi kimoxi.
2 Mu kithangana kyenyókyo, ku dyulu kwatundu jibuya jadifu ni kitembu kya nguzu. O athu oso axikamene m’onzo, evu o jibuya.
3 Ene amateka kumona ima yadifu ni madimi a milengu ya túbhya, yene ya dimwange, kala muthu dimutula dimoxi kuthandu dyê.
4 Ene oso anga ezala ni nzumbi ikôla, ya amateka kuzwela mu mázwi avulu kala kya akwatekesa o nzumbi ikôla.
5 Mu izuwa yenyóyo, mu Jeluzaleme mwakexile Jijudé javulu axila Nzambi, atundile mu jixi joso mu ngongo.
6 Kyoso kyevu o jibuya jenyojo, o mundu wabhongoloka anga udiwana, mukonda kala muthu mudyâ wevu o maxibulu kuzwela mu dimi dyê dya uvwalukilu.
7 Kyenyiki, athu adiwana kyavulu, ya ambe: “Talenu, athu oso yá a muzwela, ki akwa Ngalileya?
8 Kyebhi kala muthu mudyetu, wa mu kwívwa o dízwi dyê dya uvwalukilu?
9 Mwaxaxi ketu mwala athu akwa Patiya, Medya, Elame, Mezopotâmya, akwa Judeya, Kapadósya, Pondu ni akwa kibatu kya Azya,
10 ni akwá Fidíjya, Panfídya, Ijitu, ni akwa jimbandu ja Líbya ja zukama ni Silene, ni ajitu atundu mu Loma kixi o Jijudé, ni yó axikina o milongi ya Jijudé,
11 ni akwá Keleta, ni akwá Alábya. Ene oso twa evu kuzwela mu madimi metu a uvwalukilu, o ima ya madiwanu yabhange Nzambi.”
12 Ene oso adiwana ya akexile muzwela mudyâ: “Ima yiyi ilombolola ihi?”
13 Maji amukwá akexile mulongolola o maxibulu, exi: “Ene akodiwa, anu vinyu.”
14 Maji Phetele wemana ni kwinyi ni umoxi dya jipoxolo, yu wazwela ni dízwi dya swina: “Enu akwetu mu akwá Judeya ni enu oso mwatungu mu Jeluzaleme, ivwenu kyambote o maka unganda mitangela.
15 Mu kidi athu yá kakodiwa kana, kala ki mwafika, mukonda twala hanji mu ola ya katatu.*
16 Maji, kiki kyene kya kanena polofeta Jowele, wixi:
17 Nzambi wambe: ‘“Mu izuwa isukidilaku nganda lundulula o nzumbi yami, kuthandu dya athu oso, o twana twenu twa mala ni twa ahatu anda zwela kala jipolofeta, o minzangala yenu anda mona isumwa, o adyakime enu anda lota* jinzoji,
18 mu kizuwa kyenyókyo, nganda lundulula o nzumbi yami katé mwene ku abhik’ami a mala ni ahatu, ene we anda zwela kala jipolofeta.
19 Nganda bhanga madiwanu* ku dyulu, ni mu ngongo bhoxi: Kwanda kala manyinga, túbhya ni matuta adixi.
20 Ande dya kwiza o kizuwa kyadikota, kyafuma ya Jihova, o dikumbi dyanda kituka kitombe, o mbeji yanda kituka manyinga.
21 Woso udikola mu dijina dya Jihova, wanda bhuluka.”’
22 “Enu mu akwá Izalayele, ivwenu o maka enyá: Kala ki mwa kijiya, Jezú dya Nazalé a mu tumikisa kwa Nzambi. Bhukaxi ka mwene, Nzambi wabhange madiwanu ni isumwa mwaxaxi kenu.
23 Nzambi wejidile kyá kwila mwene eji mukuta, mu kiki o kufwa kwê, Nzambi wa kukanena. Mwenyó, enu mwa mu phaphela ku taka* bhu maku a ifumbe, enu mwa mujibha.
24 Maji Nzambi wa mu fukununa mu ku mu bhulula mu misusu* ya kalunga, mukonda o kalunga kikeji kala ni kutena kwa ku mubhaka-mu.
25 Davidi wambe yalungu ni mwene: ‘Ithangana yoso ngita Jihova bhu pholo yami, kuma mwene wala ku mbandu yami ya kadilu, phala ki ngi thandanganye ni kima.
26 Mukonda dya kiki, o muxima wami watana, eme ngadikola ni kusanguluka kwadikota. Nganda kala jinga ni kidyelelu,
27 mukonda kiwanda ngixisa Mw’alunga,* kiwanda kwehela kwila o muthu wa kukala fiyele ubola.*
28 Eye wa ng’ijidisa o jinjila ja mwenyu, wanda ngizalesa ni kusanguluka kwadikota bhu pholo yé.’
29 “Enu akwetu, jiphange jami, eme ngitena ku mitangela ni kidi kyoso yalungu ni kuku’etu Davidi. Mwene wafu, a mu fundu, o mbila yê, yala mwaxaxi ketu katé mu izuwa ya lelu.
30 Kuma mwene wexile polofeta, wejidile we kwila Nzambi wa mulokela kuma muthu* umoxi watokala ku mwiji wê weji xikama ku kyandu kyê.
31 Ande dya kubhita, mwene wejidile kyá yalungu ni difukunukinu dya Kidistu, yu wazwela kwila keji muxisa Mw’alunga,* o xitu yê kiyeji bola.*
32 Jezú yú, Nzambi wa mufukununa, etu enyoso twala tu jimbangi ja maka enyá.
33 Kuma mwene a mu zangeleka ku mbandu ya kadilu ka Nzambi, watambula kwa Tata o nzumbi ikôla yokanene, yu wa ilundulula kokwetu kala ki mwa mumona ni kwívwa.
34 Mukonda Davidi ku dyulu kabande-ku. Maji mwene wambe: ‘Jihova wambela Ngana yami: “Xikama ku mbandu yami ya kadilu,
35 katé ki ngitula o jinguma jé bhoxi dya inama yé.”’
36 Kyenyiki, o dibhata dyoso dya Izalayele akijiye ni kidi kyoso kwila, o Jezú yú mwa mu phaphela ku taka,* Nzambi wa mubhange Ngana ni Kidistu.”
37 Kyoso kyevu o maka enyá, mixima ya axixima, anga ebhwidisa Phetele ni jipoxolo ja mukwá, exi: “Enu akwetu phange jetu, ihi i twatokala o kubhanga?”
38 Phetele wa atambwijila: “Dyelenu o ituxi. Kala muthu mudyenu a mu batizale mu dijina dya Jezú Kidistu, phala a miloloke we o ituxi yenu, ni mutambule o ujitu* wa nzumbi ikôla.
39 Mukonda o kikanenu kya mitokala enu ni twana twenu, ni athu oso ala makanga ni yó oso Jihova Nzambi yetu wa exana kokwê.”
40 Phetele wakexile mubhana umbangi* ni ku atendelesa ni izwelu ya mukwá dingi: “A mibhulule mwaxaxi ka mwiji yú wayibha.”
41 Kyenyiki o athu axikina o maka mê ni kusanguluka, a abatizala. Mu kizuwa kyenyókyo midi jitatu ja athu adibundu ni ene.
42 Ene akolokotele mu ulongelu wa jipoxolo, ni mu kukala kumoxi mu ukamba, mu kudya kumoxi ni mu kusamba.
43 Athu oso wôma wa akwata, jipoxolo anga akala mubhanga madiwanu* ni ijimbwete yavulu.
44 Athu oso axikana akexile kumoxi ni kuwana o ima ya kexile nayu.
45 Ene akexile mu sumbisa o ibhela yâ ni ima yoso yakexile nayu. O kitadi akexile mu kiwanena mudyâ, kala kyasoko o ibhindamu ya muthu.
46 Ithangana yoso, kizuwa ni kizuwa, ni muxima umoxi akexile mu tembulu. Ene akexile mudya mu jinzo ja akwâ, ni kuwana o kudya ni muxima wazele ni kusanguluka kwa dikota,
47 ni kuximana Nzambi. O mundu woso wakexile we mwaximana. Mu thembu yenyóyo, Jihova anga ukala mu bandekesa dingi athu phala kukala kumoxi ni yó akexile mwabhulula.
Footnotes
^ Kiki kilombolola 9 dya ola.
^ Mba, “kwanjuwa.”
^ Mba, “isumwa.”
^ Tala o Dilombolwelu.
^ Mba nange, “mikolo.”
^ Mba, “Hades.” Tala o Dilombolwelu.
^ Mba, “u sekumuka.”
^ Mu Ngel.: “mbutu ya tundu mu malômbo mê.”
^ Mba, “Hades.” Tala o Dilombolwelu.
^ Mba, “sekumuka.”
^ Tala o Dilombolwelu.
^ Mba, “ujitu mu kingoho.”
^ Mba, “umbangi ku athu oso.”
^ Mba, “isumwa.”
