Ikalakalu ya Jipoxolo 20:1-38
20 Kyoso kyabhu o kavwanza, Phawulu watumu kwixana o maxibulu. Kyazubha kwa swinisa ni kwalekela, wayi ku Masedonya.
2 Kwenyóko mwene wende mu jimbandu joso, yu waswinisa o maxibulu ni izwelu yavulu. Anga ubhixila mu mbanza ya Ngelexya.
3 Kyoso kyabhange-mu mbeji jitatu, mwene wasolo kuvutukila mu njila ya Masedonya, mukonda kyoso kyakexile phala kuya ku Sídya o Jijudé a mu lungulukila.
4 Mwene wakexile kumoxi ni Sopata, mon’â Pilu, mukwa Beleya, ni Adistaku ni Sekundu, akwa Tesalónika, Ngayu mukwa Delebe ni Timote. Ni Tikiku ni Tolofimu akwa kibatu kya Azya.
5 O mayala yá akalanga, ya a tu kingila ku Tolowade.
6 Étu twayi ku mbanza ya Filipu kyoso kyabhiti o izuwa ya Jimbolo jakambe o Felemendu. Mu kubhita izuwa itanu, twa asange mu Tolowade, anga tu kala mwenyomo sambwadi dya izuwa.
7 Mu kizuwa kyadyanga kyasemana, kyoso ki twa dyongekele phala kudya, Phawulu wamateka kulonga o athu katé mukaxi ka usuku, mukonda weji kuya mu kizuwa kyakayela.
8 Mu inzo yaditala mu twa dyongekele mwakexile tundeya twavulu.
9 Sayi munzangala wa diyala amwixana Ewutiku, wa xikamene bhu njanena, mwene wakexile ni kilu kyavulu, kyoso Phawulu kyakexile muzwela. Mwene anga u lawuka tundé ku ditala dya katatu. Kyoso kyayi mu mu balumuna, mwene wa fwile kyá.
10 Kyenyiki, Phawulu watuluka, wa disununa kuthandu dyê, wa mu ndwakuna, yu wambe: “Dixibhyenu, mukonda mwene kafu!”*
11 Kyenyiki, Phawulu wabande dingi ku inzo ya thandu, wabukula o mbolo, yu wadi. Anga usuluka mu kwalonga mu ithangana yavulu, katé kikwaki, yu wayé.
12 Ni kusanguluka kwavulu, ene ambata o munzangala wavutukile ku mwenyu.
13 Etu twa dyanga kuya katé ku naviyu, twayi ku Asu, ku tweji tambulula Phawulu. Mwene wa tu tendelesa kubhanga kiki, mukonda wa mesenene kwendela bhoxi.
14 Kyoso mwene kya tusange ku Asu, twa mu tambulula ku naviyu, twayi ku Mitilene.
15 Mu kizuwa kyakayela, twadilôngo mu naviyu, étu twabhixila mu kikôlo kya Xiyo. Mu kizuwa kya kayadi twabhiti ku Samu, mu kizuwa kya katatu twabhixila ku Miletu.
16 Phawulu ka mesenene kuxala mu mbanza ya Efezu, phala kalaleke kyavulu mu kibatu kya Azya, mukonda wa mesenene kubhixila ni lusolo mu Jeluzaleme mu kizuwa kya Fesa ya Pendekoxi.
17 Kyoso mwene kyakexile mu mbanza ya Miletu, watumu kwixana o tufunga twa kilunga kya Efezu.
18 Kyoso ene kyabhixila, mwene wa atangela, wixi: “Enu mwejiya kyambote yoso i ngabhange mwaxaxi kenu, tundé o kizuwa ki ngabhixila mu kibatu kya Azya.
19 Ni kulenduka kwoso ni masoxi, nga kalakala kala ngi mubhika wa Ngana, mu kubhita mu izukutisu mukonda dya Jijudé ja mesenene ku ngijibha.
20 Ki ngafulu we ku mitangela kima kyoso-kyoso kyeji mi swinisa.* Nga milongo mwaxaxi ka mundu ni mu inzo ni inzo.
21 Maji ngabokela o athu oso, kikale Jijudé ni Jingeleku kwila, atokalele kudyela o ituxi yâ, kuvutuka kwa Nzambi, ni kukala ni kixikanu kwa Ngana yetu Jezú.
22 Kindala, mu kutumaka o nzumbi ikôla nga muya mu Jeluzaleme, sumbala ki ngejiya o ima yanda ngibhitila mwenyómo.
23 Maji ngejiya ngó kwila, mu jimbanza joso mu ngibhita o nzumbi ikôla i ngibhana jinga umbangi kwila, anda ngita mu kaleya ni kubhita mu jiphaxi.
24 Eme ki ngasuwu dingi o mwenyu wami,* maji o kima kya betakota, o kukumbidila yoso ya ngixindi ni ukunji wa ngibhana Ngana Jezú, wakubhana umbangi wa njimbu yambote ku athu oso yalungu ni ngalasa ya Nzambi.
25 “Kindala, ngejiya kwila sé-ku muthu mudyenu nga mubokela o njimbu yambote ya Utuminu wa Nzambi wanda ngimona dingi.
26 Kyenyiki, mu kizuwa kya lelu, enu oso mwejiya kwila eme ngazele ku manyinga ma athu oso.
27 Mukonda ki ngafulu ku mitangela o vondadi* yoso ya Nzambi.
28 Mu kyenyiki, dilangyenu, enu-wenu ni kilunga kyoso. Kuma o nzumbi ikôla ya mi solo kala mu tufunga, phala kwinga* o kilunga kya Nzambi, kyasumbu mwéne ni manyinga a Mon’ê.
29 Mukonda ngejiya kwila kyoso ki ngandaya, mwaxaxi kenu mwanda bokona athu kala imbungu. Ene kanda langa o kilunga ni henda.
30 Mwaxaxi kenu, mwanda moneka we athu anda zwela ima yamakutu phala kusunga o maxibulu ku mbandu yâ.
31 “Kyenyiki dilangyenu, lembalalenu kwila mu mivu itatu usuku ni mwanya, ni masoxi ki ngafulu ku mi dimuna enu oso.
32 Kindala, ngi mi bhakula kwa Nzambi, phala mwene ni maka mê alungu ni ngalasa, a milange. O maka mê atene ku mikolesa ni ku mibhana o undundu wanda bhana ku mundu wê woso ukôla.
33 Sé-ku muthu nga mukwatela lwimbi lwa phalata yê, ulu mba kizwatu kyê.
34 Enu mwejiya kyambote kwila, eme nga kalakala phala kudikila o ibhindamu yami ni ya akwetu ngexile nawu kumoxi.
35 Mu ima yoso nga mi idikisa kwila, mu kukalakala kiki ni kuswina, mwatokala mu kwatekesa yó a bhindamena kikwatekesu ni kulembalala o izwelu ya Ngana yetu Jezú, kyoso kyambe: ‘O kubhana kusangulukisa dingi, o kutambula ndenge.’”
36 Kyoso Phawulu kyazubha kuzwela o ima yiyi, enyoso afukama, mwene anga usamba.
37 Enyoso anga amateka kudila kyavulu, kyenyiki a ndwakuna* Phawulu, ni henda yoso a mubhana jinzobole.
38 Ene aluwalele mukonda mwene wazwelele kwila keji mumona dingi. Mu kusukaku a muxinjikila katé mu naviyu.
Footnotes
^ Mba, “mwenyu wê yú we.”
^ Mba, “phala o mbote yenu.”
^ Mba, “mwenyu wami ki wa beta dingi kukala ni valolo.”
^ Mba, “itendelesu.”
^ Mba, “kulanga.”
^ Mu Ngel.: “a di takula ku xingu ya Phawulu.”
