Ikalakalu ya Jipoxolo 6:1-15
6 Mu izuwa yenyóyo kyoso o maxibulu kyakexile mu dibandekesa, o Jijudé akexile muzwela o dimi dya Ngeleku, akexile mu dizuma ni Jijudé jakexile muzwela o dimi dya Hebalayiku, mukonda izuwa yoso o atud’yâ akexile mwajimba mu kithangana kya kuwana o kúdya.
2 Kyenyiki o kwinyi ni kiyadi kya jipoxolo ongeka o maxibulu, anga a ambela: “Ki twatokala* kuxisa o mak’â Nzambi, phala kuwanena o kúdya.
3 Mu kiki jiphange, solenu mwaxaxi kenu sambwadi dya mayala ala ni ukexilu wambote,* ezala ni nzumbi ikôla ni unjimu, ni tu asole phala kubhanga o kikalakalu kiki.
4 Etu tusuluke mu kusamba ni kulonga o mak’â Nzambi.”
5 Mundu woso wasanguluka ni njimbu ya jipoxolo, ene anga asola Xitevá, diyala dyexile ni kixikanu kyakolo, wezalele we ni nzumbi ikôla, ni Filipe, Polokolo, Nikanolo, Timono, Palameno ni Nikolawu, mukwa Andiyokiya, sumbala mwene kexile Judé maji waxikinine o milongi ya Jijudé.
6 Ene a abheka ku jipoxolo. Kyoso o jipoxolo kyazubha o kusamba, atula o maku mâ kuthandu dyâ.
7 Mukonda dya kiki, o mak’â Nzambi akexile mu dimwanga, o maxibulu we asulukile mu kudibandekesa mu Jeluzaleme. Akunji avulu axikina o mak’â Nzambi.
8 Xitevá wexile mubhanga isumwa ni madiwanu a makota mwaxaxi ka mundu, mukonda wezalele ni ngalasa ni kutena kwa Nzambi.
9 Maji sayi mayala atokalele mu Dilombe dya Jifôlo, kumoxi ni akwa Silene ni akwa Alexandiya, ni amoxi akwa Silisya, ni akwa Azya, eza phala kuzoka ni Xitevá.
10 Maji ene katena kuzoka n’ê, mukonda dya unjimu wê mu kuzwela ni kwila o nzumbi ikôla yakexile mu mu kwatekesa.
11 Kyenyiki mu kaswekele aswinisa athu kuzwela, exi: “O diyala didi, twa mwivu kuxongwena Mozé ni Nzambi.”
12 Ene afunyisa o mundu ni adyakime a mundu ni jimesene ja kulonga o Kijila, anga asanga Xitevá a mukwata ya amwambata mu Inzo ya Kufundisa.
13 Ene abheka jimbangi ja makutu, ambe, exi: “O diyala didi wa musuluka ni kuzwela ima yayibha yalungu ni kididi kiki kikôla ni Kijila kyetu.
14 Mu kifika, etu twa mwivu kuzwela kwila, Jezú dya Nazalé wanda bula o kididi kiki, ni kulungulula o ijila ya tulongo Mozé.”
15 Athu oso axikamene mu inzo ya kufundisa kya mutale swí, amono kwila pholo yê yedile kala pholo ya anju.
