Ku akwa Jihebelewu 10:1-39
10 O Kijila kizuzumbya ngó kya ima yambote yanda kwiza ku hádya, ko kidi kana. Kyenyiki o jisata jene mubhana muvu ni muvu kijitena* kuyukisa o athu azukama kwa Nzambi phala ku mu bheza.
2 Se o jisata jakexile mwa bhangesa kukala athu ayuka, kikweji bhinga dingi kubhana jisata, mukonda se o athu abhanga o sidivisu ya Nzambi a azelesa kyá lumoxi, keji kala dingi ni kikuma kya kituxi.
3 Maji o jisata jiji jene mubhakula o athu muvu ni muvu, jibhangesa o athu kulembalala o ituxi yâ.
4 Mukonda o manyinga a jingombe ni a jihombo katena kukatula o ituxi ya mundu.
5 Mukonda dya kiki, kyoso Kidistu kyeza mu ngongo mwene wambe, wixi: “Eye ki wamesenene jisata ni maujitu, maji wasokejeka mukutu phala eme.
6 Ki waxikina o jisata ja kwoha né o jisata ja kukatula o ituxi.
7 Mu kyenyiki, eme ngambe, ngixi: ‘Eme bhabha phala kubhanga o vondadi yé, eye u Nzambi (kala kya kisoneka mu divulu, yalungu n’eme).’”
8 Mwene wadyangele kuzwela, kwila: “Eye kumesenene mba kuxikina jisata né maujitu, jisata ja kwoha né we jisata ja kukatula o ituxi.” O jisata jiji akexile mu jibhakula mu kubelesela o Kijila.
9 Mu kusuluka mwene wambe, wixi: “Eme bhabha phala kubhanga o vondadi yé.” Mwene u bhwisaku o kima kya dyanga,* anga ubhinganesaku o kima kya kayadi.*
10 “Mu vondadi ya Nzambi” atuzelesa mukonda Jezú Kidistu wabhakula o mukutu wê kala sata lumoxi ngó kwabhu.
11 O mukunji watokalele kukala mu kididi kyê izuwa yoso phala kubhanga o kikalakalu kya Nzambi ni kubhana jisata jimoxi muveji javulu. Maji o jisata jiji kijitena kukatula o ituxi.
12 Maji mwene wabhakula ngó sata imoxi yakalelaku, mukonda dya ituxi ya athu, anga uxikama ku kadilu ka Nzambi.
13 Tundé mu kithangana kyenyókyo mwene ukala mukingila katé Nzambi kyatula o jinguma jê bhoxi dya inama yê.
14 Mukonda ni ujitu umoxi mwene wayukisa katé ku hádya ni hádya yó a mwazelesa.
15 O nzumbi ikôla we itubhana umbangi mu kwamba kwila:
16 “Jihova wambe, wixi: ‘Kyoso kyanda bhita o izuwa yiyi, ngandata ni ene o kikutu kiki. Eme ngandata o ijila yami ku mixima yâ, nganda isoneka ku ilunji yâ.’”
17 Anga uzwela dingi, wixi: “Kinganda lembalala dingi o ituxi yâ ni kubhukumuka kwâ.”
18 Se o ituxi a iloloka kyá ki kwabhingi dingi kubhakula jisata phala o muloloki wa ituxi.
19 Kyenyiki phange jami, bhukaxi ka manyinga a Jezú twala ni kidyelelu kya kwenda mu njila itwambata mu kididi kikôla,
20 o njila ya ubhe ni ya mwenyu ya tu jikwila mwene bhukaxi ka kulutina kifwa o mukutu wê,
21 ni kwila twala ni mukunji wadikota mu inzo ya Nzambi.
22 Tu zukamyenu kwa mwene ni muxima wa kidi ni kixikanu kyakolo, phala o muxima wetu uzele, o kitongolwelu kyetu kiwabhe, o mukutu wetu a usukule ni menya azele.
23 Kyenyiki tu kolokotyenu mu kuboka yalungu ni kidyelelu kyetu, sé kubhwila mukonda o Nzambi wa tukanena, fiyele.
24 Tu dixinganekyenu mudyetu* ni kudiswinisa mu kudizola ni kubhanga ima yambote.
25 Kitufule kudyongeka kala kyene mubhanga amoxi, maji tu diswinisyenu mudyetu bengebenge mu kumona kwila o kizuwa kya Nzambi kyazukama.
26 Mukonda se tuta jinga kituxi mu lwelu kyoso ki twazubha kutambula o kwijiya kwa kidi, kikwala dingi sata phala o ituxi yetu.
27 Maji kwanda kala kifundisu kyadikota kibhekela wôma ni njinda ijokotesa kala túbhya yanda jikinisa o jinguma joso.
28 Se kukala mbangi jiyadi mba jitatu, muthu woso-woso u bhukumukina o Kijila kya Mozé amujibha sé ku mu kwatela henda.
29 Ihi i mubanza? Se muthu wadyotele o Mon’a Nzambi ni kwila wamono o manyinga a kikutu amuzelesa kala kima kyakambe valolo, anga u sebhulula ni kulokalala o nzumbi ya Nzambi yolondekese bhukaxi ka ngalasa yê, o kifundisu kyê kikyanda betakota?
30 Mukonda etu twejiya yó wambe, wixi: “O phonzo ya ngitokala eme, eme we nganda ivutwila.” Yu wambe we, wixi: “Jihova wanda fundisa o mundu wê.”
31 O kubwila bhu maku a Nzambi ya mwenyu kima ki kwatesa wôma.
32 Maji ki mu dijimbe o ima yabhitile mukulu, kyoso enu ki mwa zubhile kumona o mukengeji, mwa kolokota ni kubhânga kwa dikota ni jiphaxi javulu.
33 Sayi bhabha akexile mu mi zukutisa bhu pholo ya mundu, kikale mu ku mi sebhulula ni mukubhita mu jiphaxi. Ithangana ya mukwa mwakexile ku mbandu ya athu akexile we mubhita mu hadi yenyiyi.
34 Mukonda enu mwakwatela henda kwa yó akexile mu jikaleya. Kyoso kya mi nyana o jimbote jenu, enu ki mu luwala mukonda mwejiya kwila mwala ni kima kyabetakota kyanda nangenena.
35 Kyenyiki kimwehe o kuswina kwenu* mukonda mu kukala naku mwanda tambula mabesá.
36 Mukonda enu mwabhingi kuswina phala kyoso kimwanda zubha kubhanga o vondadi ya Nzambi mwanda tambula o kikumbidilu kya ima ya mikanena.
37 Kuma “kwakambe ngó bhwofele” o “muthu wa mukwiza wanda bhixila kyá, mwene kanda laleka dingi kana.”
38 “Maji o selevende yami yayuka wanda bhuluka mukonda dya kixikanu, maji se mwene uvutuka kudima kinganda sanguluka-nê.”
39 Etu kitwala tu athu akwa kuvutuka kudima phala kwabwikisa, maji twala ni kixikanu kya kidi ki tubhekela o kubhuluka.
Footnotes
^ Mba nange, “muthu katena.” O athu enyá o akunji.
^ O kima kiki kyalungu ni jisata ni maujitu akexile mu bhana bhu kaxi ka kijila.
^ O kima kiki kya kayadi kyalungu ni sata ya kukula kala kya mesena Nzambi.
^ Mba, “tubanzyenu akwetu, tute mixima ku akwetu.”
^ Mba, “ufolo wa kuzwela.”
