Ku akwa Jihebelewu 11:1-40
11 O kixikanu o kidyelelu kyakolo kya kwila, o ima itwa mu kingila yanda kwiza ku hádya. Kyene kidikisa o ima kiluwa imoneka.
2 Mukonda bhukaxi ka kixikanu, o jikuku jetu atambwile umbangi wa kwila, a axikina kwa Nzambi.
3 Bhukaxi ka kixikanu, twejiya kwila mu kizwelu kyê Nzambi watula o ima mu ngongo mu ididi yê. Kyenyiki, o ima yoso imoneka ku mesu yezaku bhukaxi ka ima ikamba kumoneka ku mesu.
4 Bhukaxi ka kixikanu, Abele wabhana kwa Nzambi o sata yabetelekota kukala ni valolo, o ya Kayini ndenge. Mukonda dya kixikanu kiki, mwene watambula umbangi kwa Nzambi kwila, wexile muthu wayuka, mukonda Nzambi waxikina o maujitu mê. Sumbala mwene wafu kyá maji uzwela hanji bhukaxi ka kixikanu kyê.
5 Bhukaxi ka kixikanu, Enoko amwambata phala kamone o kalunga, ka mu sange mu kididi kyengi mukonda Nzambi wa mwambata. Maji ande dya ku mwambata mwene watambula umbangi wa kwila wexile mu sangulukisa Nzambi.
6 Kyenyiki, se muthu wakambe kixikanu katena kusangulukisa Nzambi, mukonda woso uzukama kwa Nzambi wa tokala kuxikina kwila, mwene weneku, ni kwila Nzambi mukwa kubesowala oso amusota ni kidi kyoso.
7 Bhukaxi ka kixikanu Nowé kyoso kya zubha kutambula kwa Nzambi o njimbu yalungu ni ima kiluwa yamonekene, mwene watumaka Nzambi, yu watungile álaka phala kubhulula o mwiji wê. Bhukaxi ka kixikanu kyenyiki, mwene wafundisa o mundu wokulu anga Nzambi wa mu mono kala muthu wayuka mukonda dya kixikanu kyê.
8 Bhukaxi ka kixikanu Mbalahamu kyoso Nzambi kya mwixana, mwene watumaka mu kuya mu ixi yeji tambula kala undundu. Mwene wayi sumbala kejidile kwebhi kwejiya.
9 Bhukaxi ka kixikanu, mwene watungu kala musonyi mu ixi ya polomesa, kala wa mu tunga mu ixi yangene. Watungu mu jibalaka kumoxi ni Izake ni Jakobo, athu eji tambula kumoxi ni mwene o ima ya mu kanena.
10 Mukonda mwene wakexile mu kinga o mbanza yala ni madisesa makolo, o mesene yê ni mutungi, mwéne Nzambi.
11 Mukonda dya kixikanu Sala sumbala o kithangana kyakuvwala kya mu bhitile kyá, mwene watambula o kutena kwa kuvwala mona,* mukonda wa xikinine kwila o Yó wa mu bhangele o kikanenu, fiyele.*
12 Mukonda dya kiki, o diyala dimoxi dyexile kyá kala wafu wavwala twana twavulu kala o jithéthembwa ku dyulu, katena ku ji tanga kala o museke wa ndundu ya kalunga.
13 Athu oso yá afu ni kixikanu, sumbala katambwile o ima ya akanena maji a imono dikanga, ya a ixikina ni kusanguluka kwoso. Ene atangela o athu kwila, exile asonyi ni ajitu mu jixi mwatungile.
14 Oso azwela kiki, alondekesa kwila, amusota kididi phala ene.
15 Se ene akolokotele kuxinganeka mu ixi mwatundile, eji mesena kuvutuka.
16 Maji mukidi, o athu enyá amusota kididi kyabetakota, kididi kyatokala ku dyulu. Kyenyiki Nzambi kakala ni jisonyi jâ, mukonda dya ku mwixana Nzambi yâ, kuma mwene wa a yudikila mbanza.
17 Bhukaxi ka kixikanu, Mbalahamu kyoso kya mu polovala, wabhakula Izake kala sata, o diyala dya tambwile o kikanenu ni kisangusangu kyoso, wafikisa kubhana mon’ê umoxyelele kala sata,
18 sumbala a mwambelele, exi: “O yó anda mwixana mbutu yé wanda kwijila bhukaxi ka Izake.”
19 Maji mwene watetuluka kwila Nzambi wala ni kutena kwa kufukununa Izake mwaxaxi ka madifundu. Bhukaxi ka kifika, mwene watambula dingi Izake wafwile kyá.
20 Bhukaxi ka kixikanu we Izake wa besowala Jakobo ni Izawu mu kwatangela o ima yeji kwizaku.
21 Bhukaxi ka kixikanu, Jakobo kyoso kyakexile phala kufwa, wa besowala o twana twa Zuze, wa bheza Nzambi, anga uxamenena ku mbangala yê.
22 Bhukaxi ka kixikanu, Zuze ande dya kufwa, wazwela yalungu ni kukatuka kwa an’â Izalayele, yu wabhana itendelesu* se kyebhi kyeji bhanga ni ifuba yê.*
23 Bhukaxi ka kixikanu, Mozé kyoso kya mu vwala, o jitata jê amusweka mu mbeji jitatu mukonda amono kwila o kabwetele kafwamene, ene kakexile ni wôma wa ngonge yabhana o sobha.
24 Bhukaxi ka kixikanu, Mozé kyoso kyakulu, waditunu ku mwixana mona wa mon’â Falawó,
25 Mwene wasolo kutala hadi kumoxi ni mundu wa Nzambi, muveji dya kudiwabhela ngó kathangana ni jivondadi ja ituxi,
26 mukonda mwene wa xinganekene kwila, o kutala o hadi mukonda dya Kidistu kwabetelekota o jimbongo joso ja Ijitu ndenge. Kuma wakexile mutala o futu yeji tambula ku hádya.
27 Bhukaxi ka kixikanu, mwene waxisa o ixi ya Ijitu sé kukala ni wôma wa njinda ya sobha, mukonda wa kolokotele kala wamumona Nzambi Yó kamoneka kumesu.
28 Bhukaxi ka kixikanu, mwene wabhange o Fesa ya Phasu, anga uzunzumuna o manyinga phala o anju ya Nzambi ki ibwikise o ana phandekumbi a akwa Izalayele.
29 Bhukaxi ka kixikanu, o mundu wa Izalayele wa zawuka o Kalunga Kakusuka kala a mubhita bhoxi bhwa kukuta, maji kyoso akwa Ijitu kya fikisa we kubhita ene aboba* mu menya a kalunga.
30 Bhukaxi ka kixikanu, o ilumbu ya mbanza ya Jedikó yabu bhoxi, kyoso o mundu kyazubha kunyunga o mbanza mu sambwadi dya izuwa.
31 Bhukaxi ka kixikanu, Lahaba o kidyanzunga kafu kumoxi ni yó a bhukumukine, mukonda mwene watambulwile kyambote o alondi.
32 Ihi dingi inganda zwela? O kithangana kikyeji ngisoka se ngizwela we yalungu ni Ngidiyone, Balake, Sasawu, Jefete, Davidi, Samuwele, ni jipolofeta ja ka mukwa.
33 Bhukaxi ka kixikanu ene atolola jisobha anga edikisa o kuyuka kwa kidi, atambulula o ikanenu ya Nzambi ajika o makanu a jihoji.
34 O túbhya ki twa ajokotesa, kyoso kyakexile phala kwajibha ni jixibhata, ene abhuluka, mu kuzoza kwâ atambula nguzu, mu ita atena kukala ni kutena, ene atolola o masoladi a mesenene kutambula o jixi jâ.
35 Ahatu atambula o madifundu mâ a afukununa, maji athu amukwá a ajibha ni kibetu, mukonda aditunu kwajituna phala atambule o difukunukinu dya betakota.
36 Akamukwa a apolovala mu kwa xongwena ni kwabeta ni jixikote, a ka mukwa azubha ku akuta ni malubhambu ni ku atula mu jikaleya.
37 Amukwa a abuba ni matadi, a apolovala, a abatula mukaxi, a ajibha ni jixibhata, azwatele ibha ya jimbudi ni ya jihombo, akexile mubhita ni ibhindamu ni kubhita mu jiphaxi ni mu kwazukutisa.
38 O ngongo ki ya afwamene, ene akexile mu kwenda mu ikangalakata, mu milundu, mu jingenda ni mu makungu a jixi.
39 Sumbala Nzambi wa abhana umbangi wambote mukonda dya kixikanu kyâ, maji katambwile luwa o kikumbidilu kya ikanenu.
40 Mukonda Nzambi wa tubhakela kima kyabetakota, phala ene akale athu ayuka kumoxi n’etu.
Footnotes
^ Mu Ngel.: “mbutu.”
^ Mba, “muthu wa ku mu dyelela.”
^ Mba, “itumu.”
^ Mba, “kyebhi kyeji mufunda.”
^ Mba, “a aminya.”
