Ku akwa Jihebelewu 2:1-18
2 Mukonda dya kiki, twabhingi kubhana dingi mátwi mu ima itwevu phala ka tujimbidise.
2 Se o maka azwelela bhukaxi ka jianju akidi, anga o athu akwa kutondala ni akwa kuxibhaka atambula o kaxtiku katokala,
3 twanda lengela kwebhi se tukamba kubhana valolo mu kubhuluka kuku kwonene? Mukonda o Ngana yetu Jezú mwéne wamateka kubokela o maka enyá. O athu evu o njimbu yiyi a tutangela we yalungu ni kubhuluka kuku.
4 Bhukaxi ka ijimbwete, madiwanu, isumwa ni mauhete a nzumbi ikôla, Nzambi walondekesa we kwila o kubhuluka kuku, kidi.
5 Nzambi kabhana ku jianju o kikalakalu kya kutumina o ixi yanda kwizaku i twa muzwela kindala.
6 Maji mu Mikanda Ikôla sayi muthu wambe, wixi: “Nanyi o muthu phala umusuwe mba nanyi o mon’a muthu phala umulange?
7 Eye wa mubhange kukala ndenge ya jianju. Eye wa muzwika kitundu kyafuma, wa mubhana o ungana wa kutumina o ibhangelu yoso ya maku mê.
8 Nzambi wa mutudila o ima yoso bhoxi dya inama yê.” Mu ku mutudila o ima yoso, Nzambi kaxisa kima sé ku mutudila-kyu, maji kindala ki twa mumona luwa kwila a mutudila kyá o ima yoso.
9 Maji twamono Jezú, a mubhangele kukala ndenge ya jianju, kindala Nzambi wa muzwika kitundu kya fuma kya kijingu mukonda dya kutala hadi katé kyafu, phala bhukaxi ka ngalasa ya Nzambi atene kufwa phala o mbote ya athu oso.
10 Ima yoso yalaku phala o fuma ya Nzambi, yoso a ibhange bhukaxi ka mwene. Nzambi wayukisa o Mutwameni bhukaxi ka hadi yeji tala mwene phala kujingisa ana avulu.
11 Kikale yó uzelesa mba yó a mwazelesa, enyoso tata yâ imoxi ngó. Mukonda dya kiki, mwene kakala ni jisonyi ja kwa exana jiphange,
12 wixi: “Nganda tangela o dijina dyé ku jiphange jami, nganda kuximana ni mimbu mwaxaxi ka kilunga.”
13 Mwene wambe dingi, wixi: “Nganda mudyelela.” Lwa mukwa dingi, wixi: “Talesenu! Eme’ami-yú ni an’a ndenge a ngibhana Jihova.”
14 Kuma o “ana ndenge” athu mu xitu ni manyinga, mwene we wakituka muthu mu xitu ni manyinga, phala bhukaxi ka kufwa kwê utena kutolola Dyabhu, yó wala ni kutena kwa kubheka o kufwa,
15 phala kubhulula oso mukonda dya wôma wa kufwa exile mu ubhika ku mwenyu wâ woso.
16 Mukonda mwene ka mu kwatekesa o jianju, maji wa mu kwatekesa o an’a* Mbalahamu.
17 Mukonda dya kiki, mwene watokalele kusokela ni “jiphange” jê mu maukexilu oso phala kukala mukunji wa betakota wa fiyele, wa henda, mu ima yalungu ni Nzambi, n’a tene kubhana sata yatokala* ku ituxi ya mundu.
18 Kuma mwene watale hadi mu ku mu polovala, utena kukwatekesa yó a mwa polovala.
