Jona 1:1-17
1 Jona* mon’â Amitayi watambula o kizwelu kiki kwa Jihova:
2 “Ndé kindala mu mbanza yadikota ya Ninive, utudile-mu o njimbu ya kufundisa mukonda ngeza mukwijiya o ima yayibha ya mubhanga-mu.”
3 Maji Jona wasolo kuya ku Talxixi mu kulenga Jihova. Mwene u kulumuka ku Jope anga usanga-ku naviyu yakexile muya ku Talxixi. Jona wafutu o pasaji, wadilongo mu naviyu phala kulenga Jihova, anga uya ku Talxixi kumoxi ni yó exile mu naviyu.
4 Kyenyiki, Jihova wabheka kitembwe kyanguzu mu musanza wa kalunga, o kitembwe kiki kyadikota kyexile mubhangesa o naviyu kuboba.
5 Kyenyiki, o akalakadi a naviyu wôma wa akwata, kala muthu wamateka kudyondela ku Nzambi yé mukubhinga kikwatekesu. Ene amateka kutakula mu musanza wakalunga o ima yexile mu naviyu phala o naviyu ki ineme. Maji Jona wa kulumukine koxi a naviyu anga uzeka, uya mwene kukilu kyazongo.
6 O Kabhitangu ka naviyu u muzukama anga u mwambela: “Eye wa muzeké? Balumuka! Dyondela Nzambi yé, nange o Nzambi yakidi u tukwatela henda phala kitufwe.”
7 Mukusuluka, ene adizwelesa mu mudya, exi: “Zenu, tute jisolote phala twijiye se nanyi wa mutubhekala o windwa yú.” Kyenyiki, ate jisolote, o solote yabwila kwa Jona.
8 Ene a mwibhwidisa: “Twakudyondo tutangele, nanyi wa mutubhekela o windwa yú? Kwebhi ku watundu ni ihi iwene mubhanga? O ixi yé kwebhi? Watokala ku mwiji webhi?”
9 Mwene wa atambwijila: “Eme ngi Hebelewu, ngimubhezi wa* Jihova, o Nzambi ya dyulu, Yó wabhange o musanza wa kalunga ni mavu akukuta.”
10 Kyenyiki, o mayala enyó wôma wa akwata dingi, ya a mwibhwidisa: “Ihi i wabhange?” (O mayala eza mukwijiya kwila, mwene wexile mulenga Jihova mukonda mwene wa atangela o maka yá.)
11 Ene a mwibhwidisa: “Ihi itwatokala ku kubhanga phala kutululukisa o musanza wa kalunga?” Kuma o kitembwe mu musanza wakalunga kyexile mudibandekesa dingi.
12 Mwene wa atambwijila: “Ngizangulyenu mu ngitakule mu kalunga, o kalunga kanda tululuka mukonda ngejiya kwila o kitembwe kiki kyadikota kyamijila mukonda dyami.”
13 Ene abhange yoso yatena phala kwambata o naviyu ku mavu akukuta, maji alembwa, mukonda o mabhuku avudile mu musanza wa kalunga.
14 Mukiki, ene adyondela kwa Jihova exi: “Twakudyondo ngana Jihova, kana kutwehela kufwa mukonda dya diyala didi! Jihova tata, kana kutubhekela o kikuma kya manyinga kya diyala didi ku thandu dyetu, kuma wa kibhangela mu vondadi yê.”
15 Kyenyiki-phe, Jona a muzangula, a mutakula mu musanza wakalunga, anga o musanza wa kalunga utululuka.
16 Mukonda dyakiki, o mayala amateka kujingisa Jihova, abhana jisata kwa Jihova anga abhanga kikutu ni mwene.
17 Jihova-phe, utumikisa mbiji yadikota yene anga i minya Jona. Kyenyiki, Jona ubhita izuwa itatu ni mausuku atatu mu mala dya mbiji.
