Jona 3:1-10
3 Kyenyiki, Jihova utangela dingi Jona, wixi:
2 “Ndé kindala mu mbanza yadikota ya Ninive, ni wa abokela o njimbu i nganda ku kutangela.”
3 Mu kithangana kyenyokyo, Jona wayi mu mbanza ya Ninive mu kubelesela o kizwelu kya Jihova. Ninive yexile mbanza yadikota. Phala kunyunga o mbanza yoso, kwabhingile kwenda izuwa itatu.
4 Kyenyiki, Jona watula mu mbanza, yu wende o dikanga dya kizuwa kimoxi ni kuboka o njimbu ya Nzambi, mu kwamba: “Kwakambe ngo makwinyi awana a izuwa, mbanza ya Ninive anda ibwika.”
5 Mukiki, athu oso mu mbanza ya Ninive axikana Nzambi, tunde ku mwadyakime kate ku mona ndenge. Ene abhana o ngolokela ya kujila, anga ata izwatu ya jisaku.
6 Kyoso o sobha ya Ninive kyevu o njimbu, wabalumuka ku kyandu kyê kya ungana, wazula o izwatu yê yakatunda, uzwata jisaku anga uxikama bhu utoka.
7 Wabhana we o ngolokela yiyi ku mbanza yoso ya Ninive:“Mu kitumu kya sobha ni jikabhitangu, kibhukale muthu mba kyama, udya kima kyoso-kyoso. Kimutokala kudya kima, né kunwa menya.
8 Athu oso ni yama adivunge izwatu ya jisaku, dyondelenu Nzambi ni nguzu yoso. Ehenu o wendelu wenu wayibha ni usweya umwene mubhanga.
9 Nange o Nzambi yakidi u tukwatela henda, weha o njinda yé anga ulungulula o kima kyamesena o kubhanga phala kitufwe.”
10 Kyoso o Nzambi yakidi kyamono o ima yabhange ene, mukweha o wendelu wâ wayibha, walungulula o kibanzelu kyê kya kubheka o kibwikilu, kakibheka dingi.
