Jona 4:1-11
4 Maji kiki kyayibhila kyavulu Jona, mwene anga ukala ni njinda yavulu.
2 Kyenyiki, mwene usamba kwa Jihova wixi: “Jihova tata, kiki kikyene o kima ki ngabanzele kwila kyeji bhita, kyoso ki ngexile mu ixi yami? Kiki kyene kya ngibhangesa kulenga ku Talxixi muveji ya dyanga, mukonda ngejiya kwila eye umukwa jihenda, umukwa kuloloka, umukwa mwanyu, umukwa kubhanga mbote, eye wayibhila o kubheka o divuwa.
3 Kyenyiki, Éye u Jihova, ngakudyondo, ngijibhe. Mukonda, mudyami kota o kufwa muveji dya kukala ku mwenyu.”
4 Jihova wa mwibhwidisa: “O kwila eye walungu mwene mukukala ni njinda?”
5 Kyenyiki, Jona uya bhukanga dya mbanza anga uxikama ku mbandu kutundila o dikumbi. Bhenyobho, utunga fundu hé uxikama bhu kilembeketa mwenyomo, mu kukingila o kibwikilu kya mbanza.
6 Jihova Nzambi, anga ubhangesa kusabhuka kixina kyedile kala kya dinyangwa,* phala Jona kukala mu kilembeketa phala katale dingi hadi ni mwanya. Jona anga usanguluka kyavulu mukonda dya kilembeketa.
7 Kyoso kikwaki, o Nzambi yakidi, wabhangesa o kibamba kukesa* o kixina anga kikukuta.
8 Kyoso o mwanya ki wamateka o kutwa, Nzambi wabheka kitembu kyonene, kyatundu ku mbandu kutundila o dikumbi. Kyenyiki, Jona wakexile mutala hadi mukonda dya mwanya watu, mwene wedile kala wakumbama. Mwene wexile mubhinga phala kufwa, mukwamba: “Mudyami kota ngafu muveji dyakukala ku mwenyu.”
9 Nzambi anga wibhwidisa Jona: “O kwila eye walungu mwene mukukala ni njinda mukonda dya kixina?”
Jona watambwijila: “Ngalungwami mwene mukukala ni njinda. Ngala ni njinda yavulu kate ngamesena kufwa.”
10 Maji Jihova wa mwambela: “Eye wakwatela henda kukixina kiwakambe kukikuna ni ku kikudisa. Kyene kyasabhuka mu usuku umoxi, mu usuku wakayela kyalela.
11 O kwila eme we ki ngitokala kukwatela henda ku mbanza yadikota ya Ninive, mwala hama ni makwinyi ayadi a midi ya athu ndenge ni yama yavulu? O athu mu mbanza yiyi kejiya kutungula o ima yawabha* ni ima yayibha.”
Footnotes
^ Mba nange, “muxi wa jimono.”
^ Mba, “kunumata.”
^ Mba, “Athu kejiya o lukwaku lwâ lwa kadilu ni lukwaku lwâ lwa kyasu.”
