Mukanda ku Akwa Kolose 2:1-23
2 Ngamesena mwijiya kwila, ngene mu lwa ita phala o mbote yenu, phala o mbote ya akwa Lawudiseya, ni yó kamono o pholo yami.
2 Phala ene a akonde o malamba n’a kale kumoxi mu henda, mu kubhanga kiki ene anda kala ni umvwama mukonda dya kutendela kyambote o ima, phala n’a kale ni kwijiya kwa kidi kwalungu ni kikutu kikôla kya Nzambi, o kikutu kiki Kidistu.
3 Nzambi wasweka o jimbote joso ja unjimu ni ja kwijiya mwa Kidistu.
4 Nga muzwela kiki phala ki bhukale muthu u minganala ni kuzwela kwê kwa kubhomba.
5 Sumbala kingala ni enu mu xitu, maji ngene ku mixinganeka, nga sanguluka mu kumona kwila mwa disokejeka kyambote ni kumona we o kukola kwa kixikanu kyenu mwa Kidistu.
6 Mu kyenyiki, kala ki mwaxikina o Ngana Kidistu Jezú, kolokotenu mu kwenda kumoxi ni mwene.
7 Muta o jindanji jenu ni kudikwatenena mwa mwene, kalenu ni kixikanu kyakolo kala kya milongo, mwatokala we ku mu sakidila jinga.
8 Dilangyenu phala ki bhukale muthu u mibhikisa ni unjimu wa athu a mundu yú, ni makutu ahatu, o ima yiyi itunda ku ulongelu wa athu ni ku ima yakambe valolo ya mundu yú, ki itundu kwa Kidistu kana.
9 Mukonda o idifwa yoso ya Nzambi yala* mwa Kidistu.
10 Bhukaxi kamwene enu mwatenena mu ima yoso, yó o mútwe wa unguvulu woso ni ungana woso.
11 Mukonda dya ukamba wenu ni mwene, enu ka misaye ni maku, maji mwaxisa o mikutu yenu ya xitu mukonda o athu atokala kwa Kidistu a asaya mu ukexilu yú.
12 Mukonda kyoso kya mi batizala a mifundu kumoxi ni mwene, mukonda dya ukamba ni mwene a mi fukununa kumoxi ni mwene bhukaxi ka kixikanu ki mwala nakyu ku ima ibhanga Nzambi ni kutena kwê. O Nzambi mwéne wa mu fukununa mwaxaxi ka madifundu.
13 Sumbala mwafwile mukonda dya itondalu yenu, ni kwila ka mi sayele luwa, Nzambi wa mibheka dingi ku mwenyu kumoxi ni Kidistu, ni henda yoso mwene watuloloka o itondalu yetu yoso.
14 Mwene wajimuna* o mukanda wa kijila kya tu kwikile, mwene wa ukatula yu wa u phaphela ku taka.*
15 Mwene wazula o jinguvulu ni maungana yu wa alondekesa kwila wa atolola, bhukaxi ka taka* mwene wakwatesa jisonyi ku jinguvulu mu kulondekesa kwila watambula kikôwe.
16 Mu kyenyiki, ki bhukale muthu u mifundisa mukonda dya ima i mudya, mba mukonda dya ima i munwa, mba mukonda dya kubhanga fesa, mba mukonda dya mbeji ya thethama, mba mukonda dya kizuwa kya sábhalu.
17 O ima yiyi izuzumbya ngó ya ima yeji kwiza kupholo, maji o Kidistu mwéne o kidi.
18 Ki bhukale muthu ulondekesa o kulenduka kwa makutu, ubheza o jianju u mifidisa kutambula o kikôwe, athu enyá ajijila* kubhanga o ima yamono. Mu kidi, o ixinganeku yâ ya abhangesa kudizangeleka mu kingoho.
19 O athu yá ka dikwatenena ku mútwe, bhukaxi ka mútwe yú o idyandu yoso yala mu mukutu idibunjika kumoxi bhukaxi ka masokwelu ni mixibha mba dilanda ni kwila ikula ni kutena kutunda kwa Nzambi.
20 Se o Kidistu mwa fwila-nê kumoxi, o ima ya mundu yú mwa ixisa kyá. Mukonda dyahi-phe, mwedi kala mwa mubhanga hanji mbandu ya mundu, mu kubelesela o itumu yiyi:
21 “Kana kukwata, kana kulola, kana kubabata?”
22 O itumu yiyi ijimuka kyoso kyazubha ku ikumbidila. Yene yalungu ni itumu ni ilongesu ya athu.
23 O ima yiyi ene a imona kala unjimu, mu kubheza kwa vondadi yâ ni kulenduka kwa makutu, ene atalatala kyayibha o mikutu yâ, maji o ima yiyi ki ya akwatekesa kutolola o jihânji jâ ja xitu.
Footnotes
^ Mu Ngel.: “idifwa yoso ya tungu mu mukutu wê.”
^ Mba, “wa bhwisa.”
^ Tala o Dilombolwelu.
^ Tala o Dilombolwelu.
^ O izwelu yiyi akexile mu i tumbula mu ubhezelu wa jipagá.
