Ku Akwa Loma 13:1-14
13 Athu oso atokala kutumaka o maungana. Kuma maungana moso alaku, Nzambi mwéne wa a ehela kukalaku. Nzambi mwéne watula o maungana moso malaku, mu ididi yavulu.
2 Kyenyiki, woso ubhukumukina o maungana, wa mu bhukumukina Nzambi. Oso-phe abhukumukina o kima kyatumu Nzambi, anda kwa kaxtikala.
3 Mukonda yó oso abhanga ima yambote kabhingi kukala ni wôma wa atumini, maji yó abhanga ima yayibha, éne akala ni wôma. Eye ki wamesena kukala ni wôma wa atumini? Bhanga jinga ima yambote, ene anda kuximana.
4 Ene ala jingunza ja Nzambi phala o mbote yé. Maji se ubhanga ima yayibha, wôma u ku kwate mwene. Mukonda ene atambula o kutena ni ungana wa kukaxtikala woso ubhanga ima yayibha. Ene ala jingunza ja Nzambi phala kukaxtikala yó ubhanga ima yayibha.
5 Kyenyiki, kwene ima yavulu i mi bhangesa kutumaka, ki mukonda ngó dya kaxtiku,* maji we phala mukale ni kitongolwelu kyambote.
6 Mukonda dya kiki we, mwene mufuta o lubhaku. Kuma ene ala jingunza ja Nzambi phala kusidivila o athu.
7 Bhanenu ku athu oso, yoso ya atokala: Lubhaku kwa yó watokala lubhaku, futu kwa yó watokala o futu, kuxila* kwa yó woso watokala ku muxila; kijingu kwa yó watokala o kijingu.
8 Ki mukale ni dikongo ku muthu woso-woso, maji mukale ngó ni dikongo dya kudizola mudyenu. Mukonda woso wazolo mukwâ, utumaka o Kijila.
9 Kuma o itumu yamba kwila, “Kana kuta phánda, kana kujibha, kana kunyana, kana kukala ni lwimbi,” ni itumu yoso ya mukwá ya Kijila, yadibundu mu kitumu kiki: “Zola mukwenu kala ki wadizolo eye mwene.”
10 O muthu wazolo mukwâ, kaxikina ku mubhanga kyayibha. Woso wazolo mukwâ ukumbidila o Kijila.
11 Bhangenu kyenyiki mukonda mwejiya kwila, kithangana kyabhixila kyá, kya kuphaphumuka kukilu. Kindala o kubhuluka kwetu kwazukama dingi, kyoso ki twamateka kuxikana Ngana, ndenge.
12 O usuku wa mubhwa kyá, kamene kakèza. Kyenyiki, ki tubhange dingi o ima yatokala mu kitombe, maji tuzwate o kibhakatu kya kulwa nakyu mu mwanya.
13 Tukale ni wendelu wazele, kala athu abhanga ima mu mwanya. Kitudite mu jifesa jayibha, mu mauhôlwa, mu maundumbu, ni uhabhu.* Kitudite we mu jimvunda, kitukale ni difuba.
14 Maji kayelenu kyambote o phangu ya Ngana Jezú Kidistu. Ki muxinganeke kyebhi ki mutena kubhanga o jihânji jenu ja xitu.
