Ku Akwa Loma 2:1-29
2 Kyenyiki, sé-ku muthu mudyenu watokala kufundisa mukwâ. Kyoso ki ufundisa akwenu, wa mudifundisa we eye. Mukonda o ima i ufundisa nayu akwenu, yene we iwene mubhanga.
2 Maji twejiya kwila, kyoso Nzambi kya fundisa o athu ene mubhanga o ima yiyi, mwene ufundisa mu kidi.
3 Eye wene mufundisa akwenu mu ima iwene mubhanga we, uxinganeka kwila wanda lenga kyoso Nzambi kyanda kufundisa?
4 Kiwejiya kwila mwene wa mu kulondekesa o ngalasa yê yadikota ni mwanyu? Ki wa mu mona kwila Nzambi mu henda yê wa mu kukwatekesa phala udyele?
5 Mukonda dya kukola kwé kwa muxima ni kukamba kudyela o ituxi, Nzambi wanda kufundisa mu kizuwa kya njinda yê, kyoso mwene kyanda londekesa o kufundisa kwê kwa yuka.
6 Kala muthu anda mubhana kala kyasoko ni ibhangelu yê.
7 Mwene wanda bhana o mwenyu wakalelaku kwa yó akolokota mu kubhanga o ima yambote. Athu yá, asota o kijingu, o fuma ni mwenyu sé dizubhilu.
8 Maji Nzambi wanda londekesa o njinda yê ni ku kaxtikala akwa jimvunda, yó kene mu belesela o kidi.
9 Athu oso abhanga o ima yayibha, kikale o Jijudé mba o Jingeleku, anda tala hadi.
10 Maji woso ubhanga o ima yambote wanda tambula o kijingu, o fuma ni kutululuka. Kya dyanga o Jijudé, mu kukayela o Jingeleku.
11 Mukonda Nzambi kene ni katombo.*
12 Oso ate kituxi sé kwijiya o Kijila kya Mozé, anda fwa sumbala o Kijila kiki ka k’ijidile. Maji yó oso ate kituxi mu kwijiya o Kijila kya Mozé, anda kwa fundisa bhukaxi ka Kijila kiki.
13 Mukonda Nzambi ka mono o athu evwa o Kijila kala athu ayuka, maji yó a ki tumaka éne anda kwa mona kala athu ayuka.
14 Kyoso o athu akwa jixi jengi kejiya o kijila kya Nzambi kyabhanga o ima ituma o kijila, ene sumbala kejiya o kijila kiki, alondekesa kwila, ala ni kijila moxi dyâ.
15 Ene alondekesa kwila, o ima ilonga o kijila kya Nzambi yala ku mixima yâ. O kitongolwelu kyâ, kibhana umbangi. O ixinganeku yâ itena kwa tatela, mba kwa lungisa.
16 O ima yiyi yanda bhita kyoso Nzambi bhukaxi ka Kidistu Jezú, kyanda fundisa o ima yene mubhanga o athu mu kaswekele. Ima yiyi ibhanga mbandu mu njimbu yambote ingene mu boka.
17 Se akwixana u Judé, udyelela o Kijila kya Mozé, anga udizangeleka mukonda dya ukamba wé ni Nzambi,
18 eye wejiya o vondadi ya Nzambi, utena kutongolola o ima ya yuka mukonda a ku longo-yu* bhukaxi ka Kijila.
19 Eye uxikina kwila, utena kwendesa o ifofo ni kukala u mukengeji phala yó ala mwa vundu,
20 uxikina we kwila, utena kulonga yó atobho ni anandenge mukonda wejiya o kidi ni milongi ya betakota yala mu Kijila.
21 Maji éye wene mulonga akwenu, o kwila wene mu dilonga eye mwéne? Eye wene mu bokela akwenu kwila: “Kanenu kunyana,” o kwila unyana?
22 Eye uzwela kwila: “Kana kuta phanda,” o kwila uta phanda? Éye wazembe o iteka, o kwila wene mu nyana mu jitembulu?
23 Eye wene mu dizangeleka mukonda dya kwijiya o kijila kya Nzambi, o kwila ukamba kubhana kijingu kwa Nzambi mu kubhukumukina o Kijila kyê?
24 Kuma kyosoneke mu Mikanda Ikôla, exi: “Mukonda dyenu, o dijina dya Nzambi a mu dizwela kyayibha ku athu akwa jixi jengi.”
25 Kuma o kusaya kwala ngó ni valolo se ubelesela o Kijila kya Nzambi. Maji se eye wene mu bhukumukina o Kijila kya Nzambi, o kusaya kwé ki kwalé ni valolo.
26 Kyenyiki, se muthu akambe ku mu saya utumaka o itumu yala mu Kijila, o kwila Nzambi kanda mu mona kala muthu a musaye?
27 Eye akulongo yalungu ni kusaya ni Kijila, maji kiwene mu kitumaka. Kyenyiki, kyoso o muthu akambe ku musaya kya belesela o Kijila, mwene ukufundisa.
28 Mukonda o Judé ya kidi ka mu mono ngó mu mukutu, o kusaya kwa kidi ki mu xitu kana.
29 Maji Judé ya kidi, yó wala Judé mu muxima wê. O kusaya kwê kwa muxima, bhukaxi ka nzumbi ikôla, ki bhukaxi ka Kijila kyosoneke. O diximanu dya muthu yú, ditunda kwa Nzambi, kana ku athu.
