Ku Akwa Loma 3:1-31
3 Ihi ibhangesa o Judé kukala kota o athu a mukwá ndenge? Mba o kusaya kwala ni valolo yahi?
2 Kwala ima yavulu ibhangesa o Jijudé kukala kota. Kya dyanga, Nzambi wabhana o maka mê ku Jijudé.
3 Kyenyiki, ihi ituzwela se sayi Jijudé ka londekesele kixikanu? O kwila kiki kilombolola kuma o athu kanda dyelela dingi kwa Nzambi?
4 Kana! Né mwene athu oso a amona kala akwa makutu, maji Nzambi mukwa kidi, kala kyosoneke mu Mikanda ikôla, exi: “O izwelu yé ilondekese kwila u muthu wayuka, phala ulunge kyoso kyanda kufundisa.”
5 O kutondala kwetu kulondekesa kwila Nzambi muthu wayuka. O kwila Nzambi utondala kyoso kya londekesa o njinda yê? (Sayi athu ene mubanza kiki.)
6 Kana! Nzambi kene mu tondala, mukonda se utondala, kyebhi mwene kyanda fundisa o mundu?
7 Maji se bhukaxi ka makutu mami o kidi kya Nzambi a kilondekesa kyambote mu ku mu bhekela dingi kijingu, mukonda dyahi a ngi fundisa kala ngi mukwa ituxi?
8 Mukonda dyahi kituzwela kwila: “Tubhange ima yayibha phala kwize ima yambote”? Sayi athu a tutatela kwila, twene muzwela kiki. O athu enyá, anda kwa fundisa ni kuyuka.
9 Ihi i twamba? O kwila etu tu Jijudé, twa betakota o athu a mukwá ndenge? Kana! Mukonda kala kitwambe kyá kikale o Jijudé ni Jingeleku, enyoso akwa ituxi.
10 Kala kyosoneke mu Mikanda Ikôla, exi: “Kikwene muthu wayuka, né ngó umoxi.
11 Sé-ku muthu wala ni unjimu. Sé-ku muthu usota Nzambi.
12 Ene oso asanduka kwa Nzambi, ene oso a kituka athu sé valolo. Kibhwala muthu mudyâ ubhanga o mbote, né ngó umoxi.”
13 “O makanu mâ edi kala jimbila ja jikuka, o madimi mâ atanga makutu.” “Mu mizumbu yâ, mu tunda mvwenenu ya jinyoka.”
14 “O makanu mâ ezala ni malebhu ni kulula.”
15 “O inama yâ, ilenga phala kubhubhisa manyinga.”
16 “Mu yoso yabhanga, ene abheka mavuwa ni hadi ku akwâ.
17 Ene kejiya o njila ya kutululuka.”
18 Ene kala ni wôma wa Nzambi.”*
19 Kyenyiki etu twejiya kwila yoso yósoneke mu Kijila, a i sonekena yó a tumaka o Kijila. Phala athu oso a dixibhe ni kulondekesa kwila, o athu mu ngongo ala ni kikuma kwa Nzambi ni kwila anda tambula o kaxtiku.
20 Kyenyiki, sé-ku muthu* anda mu mona kwa Nzambi kala muthu wayuka, mukonda dya kutumaka o ima yo soneke mu Kijila. Kuma, o Kijila ki tubhangesa kwijiya kwila tu akwa ituxi.
21 Kala kya zwelele o Kijila ni Jipolofeta, kindala Nzambi wa tulondekesa o kuyuka kwê, sé o kikwatekesu kya Kijila.
22 O kuyuka kwa Nzambi a ku londekesa bhukaxi ka kixikanu kwa Jezú Kidistu, kwa yó oso ala ni kixikanu kiki. Mukonda kikwala kifuxi kya betakota, o kya mukwâ ndenge.
23 Kuma athu oso akwa ituxi, o bhu fuma ya Nzambi katena ku bhixila-bhu.
24 Kala ujitu wa kingoho, Nzambi mu ngalasa yê wa amono kala athu ayuka, bhukaxi ka kubhuluka kwijila mu sata ya kukúla kwa Kidistu Jezú.
25 Nzambi wabhakula Jezú kala sata ya tokala* mu kulondekesa kixikanu kwa mwene bhukaxi ka manyinga mê. Nzambi wabhange kiki phala kulondekesa o kuyuka kwê, mukonda mu mwanyu wê, wakexile mu loloka o ituxi yatele o athu m’ukulu.
26 Maji mwene wene mu londekesa we o kuyuka kwê, mu kwidikisa kwila o yó ala ni kixikanu kwa Jezú, athu a yuka.
27 O kwila sayi kima ki tubhangesa kudizangeleka? Sé-ku kima. O kwila tutena kudizangeleka mukonda dya kutumaka o Kijila kya Mozé? Kana! Tu dizangeleka ngó mu kutumaka o kijila kya kixikanu.
28 Mukonda twejiya kwila, o muthu a mu idikisa kwila muthu wa yuka bhukaxi ka kixikanu, kana mu kufikisa ku kayela o ima ituma o Kijila.
29 O kwila Nzambi watokala ngó ku Jijudé? Ki Nzambi we ya athu akwa jixi jengi? Kyene, mwene we Nzambi ya akwa jixi jengi.
30 Kuma kwene ngó Nzambi imoxi, mwene wanda kwidikisa kwila, o athu a asaye ni yó ka asaye, athu a yuka mukonda dya kixikanu kyâ.
31 O kwila kiki kilombolola kuma twa bhwisa o Kijila mukonda dya kixikanu kyetu? Kana! Mu kidi, o Kijila twa kikolesa dingi.
Footnotes
^ Mu Ngel.: “ku mesu mâ kala ni wôma wa Nzambi.”
^ Mu Ngel.: “muthu mu xitu.”
^ Mba, “sata i zelesa o ituxi; sata ya ukamba.”
