Ku Akwa Loma 4:1-25
4 Mu kiki, ihi itwamba yalungu ni kukwetu Mbalahamu?
2 Se Mbalahamu a mu mwene kala muthu wayuka mukonda dya ima yabhangele, mwene weji dizangeleka, maji kana bhu pholo ya Nzambi.
3 Mukonda o Mikanda Ikôla yamba kwila: “Mbalahamu walondekesa kixikanu kwa Jihova, mukonda dya kiki, a mumono kala muthu wayuka.”
4 Kyoso o muthu kya kalakala, o futu yê ka imono kala ujitu, maji kala kima kya mu tokala mwéne.*
5 Maji kyoso o muthu kyalondekesa kixikanu kwa Nzambi, kana mu ibhangelu yê, Nzambi u mumona kala muthu wayuka mukonda dya kixikanu kyê. Kuma Nzambi mwéne utena kumona o muthu mukwa ituxi kala muthu wayuka.
6 Kiki kyene kyazwela Davidi yalungu ni kuzediwa kukala na-ku o muthu a mumono kwa Nzambi kwila wayuka, sumbala ki kyabhiti mukonda dya ibhangelu yê.
7 Mwene wambe: “Azediwa yó o ibhangelu yâ yayibha a ijimbi, o ituxi yâ yololoke.
8 Wazediwa o muthu ituxi yê, Jihova kanda i lembalala.”
9 O kwila o kuzediwa kuku, kwatokala ngó kwa yó a asaye, inga kwatokala we kwa yó ka asaye? Kuma tuzwela kwila, “Mbalahamu mukonda dya kixikanu kyê a mumono kala muthu wayuka.”
10 Mu kithangana kyebhi kya mumono kala muthu wayuka? Kyoso kya musayele, inga ande dya ku musaya? Kiki kyabhiti ande dya ku musaya.
11 Anga mwene amusaye. Kiki kyexile kala kidimbu* kyedikisa kwila, mwene a mu monene kala muthu wayuka mukonda dya kixikanu kyalondekesa kyoso kya kambele hanji ku musaya. Kiki kyabhiti phala mwene akale tata ya athu oso alondekesa kixikanu, sumbala ka asaye. Phala ene a amone we kala athu ayuka.
12 Mbalahamu wakituka we tata ya yó a asaye. Mwene kakituka ngó tata ya yó a asaye, maji we ya athu akayela o kixikanu kyakexile nakyu mwene. Mu kidi, tat’etu Mbalahamu walondekesa o kixikanu kiki ande dya ku musaya.
13 Mukonda o kikanenu kyabhangele Nzambi kwa Mbalahamu ni mwiji* wê kya kulundula o ixi, ka kibhangele bhukaxi ka Kijila, maji bhukaxi ka kuyuka kwê kwejile mu kixikanu.
14 Se o athu atumaka o Kijila éne alundula o ikanenu ya Nzambi, o kixikanu kikyeji kala ni valolo, o kikanenu kya Nzambi kyeji kala kya kingoho.
15 O kubhukumukina o Kijila kubhekesa kaxtiku, maji bhwakambe o Kijila, kibhwala kikuma kya kubhukumukina o Kijila.
16 Mukonda dya kiki, bhukaxi ka kixikanu o athu alundula o ikanenu, kuma yene ujitu wa kingoho wa tubhana Nzambi. Kyenyiki, o mwiji* woso wa Mbalahamu utambula o ikanenu, ki yó ngó atumaka o Kijila, maji ni athu oso ala ni kixikanu kala kyalondekesele tat’etu Mbalahamu.
17 (Kala kyósoneke mu Mikanda Ikôla, exi: “Eme nga kubhange u tata ya ifuxi yavulu.”) Mbalahamu walondekesa o kixikanu kiki kwa Nzambi, yó utena kubhana mwenyu ku madifundu, uzwela o ima kiluwa yalaku, kála yeneku kyá.
18 Sumbala ki bhukexile dingi kidyelelu kya kuvwala mona, maji bhukaxi ka kidyelelu kyê, Mbalahamu walondekesa kixikanu kwila weji kala tata ya ifuxi yavulu, kala kya kanene Nzambi kyoso kyambe: “O kifuxi* kyé kyanda kala ndumba dya athu.”
19 Sumbala o kixikanu kyê ki kyazozele, mwene wexile mubanza o mukutu wê, wedile kala wafwile kyá (kuma wazukamene kyá ku hama ya mivu.) Mwene wejidile we kwila, Sala wakukile kyá, katenene dingi kuvwala mona.
20 Mukonda dya kikanenu kya Nzambi, mwene kexile ni jiphata mba kukamba kixikanu, maji waswinine mu kuxikana, anga ubhana kijingu kwa Nzambi.
21 Mwene waxikinine ni kidi kyoso kwila, Nzambi weji kumbidila o kima kya kanena.
22 Mukonda dya kiki, mwene “a mumono kala muthu wayuka.”
23 Maji o izwelu “a mumono” ka isoneka ngó mukonda dya mwene.
24 Yene yósoneke we phala etu. Kuma etu anda tumona we kala tu athu ayuka, mukonda tu xikina Yó wafukununa Ngana yetu Jezú ku madifundu.
25 Mwene a mubhakula mukonda dya ituxi yetu, a mufukununa phala Nzambi a tu xikine kala tu athu ayuka.
Footnotes
^ Mba, “kala dikongo.”
^ Mba, “kijimbwete.”
^ Mu Ngel.: “mbutu.”
^ Mu Ngel.: “mbutu.”
^ Mu Ngel.: “mbutu.”
