Kala Kyasoneka Luka 13:1-35
-
Se ki mu dyela o ituxi, anda mi bwikisa (1-5)
-
Kifika kya muxi wa mufiku ki wene mukwima ibundu (6-9)
-
Muhatu wakotamene amusaka mu kizuwa kya Sábhalu (10-17)
-
Kifika kya lumbundu lwa mustarda ni felemendu (18-21)
-
Kubhinga nguzu phala kubokona mu dibhitu dyatolo (22-30)
-
Helode, “o mukenge yó” (31-33)
-
Jezú uditenda mukonda dya Jeluzaleme (34, 35)
13 Mu kididi kyenyókyo mwakexile athu atangela Jezú yalungu ni akwa Ngalileya a ajibha kwa Pilatu, yu wa fungisa o manyinga mâ ni manyinga ma jisata jâ.
2 Mwene wa avutwila: “Mwafika kwila akwa Ngalileya enyó, a betelekota mu kuta ituxi, o athu amukwá a Ngalileya ndenge, mukonda dya kubhita mu ima yiyi?
3 Ngi mi tangela kwila, kana! Enu se ki mudyela o ituxi, anda mi bwikisa we kala ene.
4 Inga mwafika kwila, o kwinyi ni dinake dya athu a alundumukine ku sabhalalu ya Silôwa, a betelekota kukala ni kikuma, athu amukwá mu Jeluzaleme ndenge?
5 Ngi myambela kwila, kana! Maji se ki mudyela o ituxi yenu, anda mi bwikisa we kala ene.”
6 Mu kyenyiki, wa atela o kifika kiki: “Sayi diyala wakexile ni muxi wa mufiku mu dibhya dyê. Mwene anga uya mumona se mwala ibundu, maji kasange-mu né ngó kimoxi.
7 O ngana ya dibhya watangela o muthu wakexile mulanga o dibhya, wixi: “Tundé ki nga mateka kwiza, kwabhiti kyá mivu itatu, maji ki nga sange né ngó kibundu kimoxi. Muxi yú batula-u! Wa xitila-hi ngó o kididi se ki wa mu kwima ibundu?’
8 O muthu wakexile mulanga o dibhya wa mu tambwijila: ‘Ngana, eha-u dingi muvu umoxi, ngi udimina mu jimbandu ni ngi uta matóbe.
9 Ku hádya se wene wima ibundu, kima kyambote, maji se kana, batula-u.’”
10 Mwene anga ukala mulonga mu dilombe,* mu kizuwa kya Sábhalu.
11 Mwenyomo mwakexile muhatu a mu katesa kwala o nzumbi yayibha mu kwinyi ni dinake dya mivu. Mwene wa kotamene, katenene né ngó kubhetuka.
12 Kyoso kya mumono, Jezú wa mwixana, yu wa mwambela: “Muhatu, disanze ku uhaxi wé.”
13 Jezú watula o maku mê kuthandu dya muhatu, mu kithangana kyenyókyo mwene wadisanze, anga umateka kuximana Nzambi.
14 Kyenyiki, o mutwameni wa dilombe* njinda ya mukwata, mukonda Jezú wasakele muthu mu kizuwa kya Sábhalu. Mwene anga wambela o mundu, wixi: “O athu atokala kukalakala izuwa isamanu. Zenu mu izuwa yenyiyi, n’a mi sake, kana mu kizuwa kya Sábhalu.”
15 O Ngana Jezú wa mu tambwijila, wixi: “Mu akwa mangonya! Mu kizuwa kya Sábhalu kala muthu mudyenu kene mujituna o ngombe yê mba jumendu, ni ku yambata phala kunwa o menya?
16 O kwila o muhatu yú mon’a Mbalahamu, a mu katesele* kwa Satanaji mu kwinyi ni dinake dya mivu, katokalele ku mu saka mu kizuwa kya Sábhalu?”
17 Kyoso mwene kyazwela o ima yiyi, jinguma jê joso jisonyi ja akwata, maji o mundu woso, wasanguluka ni ima yoso ya madiwanu yakexile mubhanga.
18 Mwene anga uzwela dingi: “O Utuminu wa Nzambi wa difwangana ni ihi, mba ngi usokesa ni kima kyahi?
19 Wene wa difwangana ni lumbundu lwa mustarda,* lwa kunu o diyala mu díbhya dyê. O lumbundu lwa sabhuka, lu lwa kituka muxi, o jinjila ja dyulu anga jitunga o ikalanga mu jithângu jê.”
20 Mwene wazwela dingi: “O Utuminu wa Nzambi ngi usokesa ni ihi?
21 Wene wa difwangana ni felemendu yakatula o muhatu, anga u ifungisa ni izongelu itatu* yamakota ya fuba,* katé fuba yoso ki ifutunuka.”
22 Mu njila ya kuya mu Jeluzaleme, Jezú anga ukala mu kwenda mu jimbanza ni mu jisanzala joso, mu kulonga o athu.
23 Sayi diyala, wa mwibhwidisa: “Ngana, o kwila o athu a mu bhuluka atolo?” Mwene wambe, wixi:
24 “Bhangenu nguzu phala kubokona bhu dibhitu dyatolo, mukonda ngi myambela kwila, avulu anda sota kubokona, maji kanda tena.
25 Kyoso o ngana ya inzo kyanda balumuka ni kujika o dibhitu, enu mwanda kala bhu kanga, mu kuphupha o dibhitu ni kuzwela, mwixi: ‘Ngana, tujikwile o dibhitu,’ maji mwene wanda mi vutwila, wixi: ‘Ki ngejiya se mwatundu kwebhi.’
26 Enu mwanda zwela, mwixi: ‘Etu twadi ni kunwa bhu pholo yé, watulongo we mu ikoka yetu.’
27 Maji mwene wanda mitangela: ‘Eme ki ngejiya se mwatundu kwebhi. Tundenu bhabha, enu enyoso mu akwa ituxi!’
28 Kyoso ki mwanda mona Mbalahamu, Izake, Jakobo ni jipolofeta joso mu Utuminu wa Nzambi, maji enu a mitakula bhu kanga, bhenyobho, mwanda dila ni kudikokota ku mazu.
29 Mu kyenyiki, kwanda kwiza athu atundu kutundila o dikumbi, ni kufwila o dikumbi, ku thunda ni ku lwiji, éne anda xikama ku meza mu Utuminu wa Nzambi.
30 Ivwenu! Sayi yá asukidila, anda dyanga, o a dyanga, anda sukidila.”
31 Mu kithangana kyenyókyo, sayi Jifalizewu a mu zukama, ya a mwambela, exi: “Tunda bhabha uye kwengi, mukonda Helode wandala ku kujibha.”
32 Mwene wa avutwila, wixi: “Ndenu mwatangele o mukenge yó, kwila: ‘Talesa! Nga mukaya madimonyo ni kusaka o jihaxi, ni lelu ni mungu, o mu kizuwa kya katatu, nganda zubha o kikalakalu kyami.’
33 Maji ngatokala kwenda hanji lelu, mungu ni mungu dinyá, mukonda o polofeta katokala kufwila bhu kanga dya Jeluzaleme.
34 Wawé! Jeluzaleme, Jeluzaleme tata! Ujibha o jipolofeta ni kububa ni matadi o akunji a atumikisa, kokwê . . . Lukuxi lu nga mesenene kwongeka o twana twé, kala o sanji kyongeka o twana twê moxi dya mabhabha mê! Maji enu mwaditunu.
35 Talesa, o inzo yenu, a ká mixisa nayu. Ngi myambela kwila, enu ki mwanda ngi mona dingi katé ki mwanda dikola mwixi: ‘Ataneku yó wiza mu dijina dya Jihova!’”
Footnotes
^ Mba, “kididi kya ubhezelu.”
^ Mba, “kididi kya ubhezelu.”
^ Mu Ngel.: “a mu kutile.”
^ Lumbundu lwofele-fele lu moneka mu ixi ya Palestina. Kyoso ki lu kula lu kala ni métulu jiwana, lu kala we ni jithangu.
^ Mu Ngel.: “Seá jitatu.” Seá imoxi ya kexile mu valolo ya 7.33 dya jilitulu.
^ Mba, “fuba ya tiliku.”
