Kala Kyasoneka Luka 14:1-35
-
Diyala wala ni uhaxi u jimbisa o mukutu woso amusaka mu kizuwa kya Sábhalu (1-6)
-
Se akwixana mu fesa, sota kuditulula (7-11)
-
Exana yó kala ni kima kya ku kuvutwila (12-14)
-
Kifika kya yó a exana mu fesa maji aditunu o kixanu (15-24)
-
Ima yatokala kubhanga o muthu phala kukala dixibulu (25-33)
-
Môngwa ubhwa o kutowala kwê (34, 35)
14 Mu kizuwa kya mukwá, kya Sábhalu, mwene wayi mudya mu inzo ya mutwameni umoxi wa Jifalizewu. Anga o athu akexile-mu, akala mu mu tonginina.
2 Ku pholo yê kwakexile diyala dya katele uhaxi ujimbisa o mukutu woso.
3 Mukonda dya kiki, Jezú webhwidisa o Jimesene ja Kijila ni Jifalizewu, wixi: “O kwila kifwama kusaka muthu mu kizuwa kya Sábhalu?”
4 Maji ene adixibha. Kyenyiki, mwene wakwata o diyala, wa musake, yu wa mu tumu kuya.
5 Mwene wa atangela: “Nanyi mudyenu kanda katula ni lusolo mon’ê mba o ngombe yê, se ibwa mu dikungu mu kizuwa kya Sábhalu?”
6 Ene katena ku mu tambwijila.
7 Kyoso Jezú kyamono kwila, o ajitu akexile musola ididi ya betakota, mwene wa atela kifika, wixi:
8 “Se muthu u kwixana mu fesa ya ukaza, kana kuxikama bhu kididi kya betakota. Mukonda mwene nange wexana we muthu wabeta dingi kota, eye ndenge.
9 Anga o muthu wa m’ixana, wanda kwiza ni ku kwambela: ‘O kididi kiki kyatokala mukwenu.’ Eye-phe jisonyi janda kukwata, anga wandaya muxikama bhu kididi kya sukina-ku.
10 Maji se akwixana mu fesa, xikama bhu kididi kya sukinaku. O muthu wa kwixana kyanda bhixila, wanda kutangela, wixi: ‘Kamba dyami, ndé bhu kididi kyabeta dingi o kota.’ Anga eye wanda kala ni kijingu bhu pholo ya athu oso a exana mu fesa.
11 Mukonda woso udizangeleka, anda mutulula. Woso-phe uditulula, anda mu zangeleka.”
12 Mwene anga wambela we o diyala wa mwixana, wixi: “Kyoso ki ubhanga fesa, kana kwixana o makamba mé, o jiphange jé, o jindandu jé, né mwene o jivizinyu jé jala jimvwama. Mukonda se u kibhanga, ene anda kwixana we, o kiki kyanda kala kivutwilu phala eye.
13 Maji ki ubhana fesa, exana o jingadyama, o inema, o athu atenguna, ni ifofo.
14 Eye wanda zediwa mukonda ene kàla ni kima kya ku kuvutwila. Maji o futu yé wanda ku itambula mu difukunukinu dya athu ayuka.”
15 Sayi muthu a mwixana we mu fesa, kyoso kyevu o maka enyá, wambela Jezú, wixi: “Wazediwa yó woso udya* ku meza mu Utuminu wa Nzambi.”
16 Jezú wa mwambela: “Sayi diyala wexana athu avulu phala kuya mu fesa ya dikota.
17 Mu kithangana kya kudya, mwene watumu o selevende yê, kutangela o ajitu, wixi: ‘Zenu, mukonda o kúdya kwabhi kyá.’
18 Maji phala kende-ku, ene oso amateka kuditata. O wa dyanga wazwela: ‘Ngi loloke! Nga sumbu dibhya, nga bhingi kuya mu ditala.’
19 O mukwá, wixi: ‘Ngi loloke! Nga sumbu dikwinyi dya jingombe,* nga muya mu jitala se jikalakala kyambote.’
20 O wa mukwá hanji wambe, wixi: ‘Nga kazala kindala, mukonda dya kiki ki ngitena kuya.’
21 O selevende wavutuka, yu watangela o ima yoso yiyi kwa ngana yê. O ngana ya inzo, njinda ya mu kwata, yu wambela o selevende: ‘Ndé mu ikoka ya makota ni yofele ya mbanza, wixana o jingadyama, o inema, o ifofo ni athu atenguna.’
22 Mu kubhita kithangana, o selevende wambe: ‘Ngana, yoso i wa ngi tumina, nga ibhange kyá, maji sayi hanji ididi.’
23 O ngana wambela o selevende, wixi: ‘Ndé mu ikoka bhu kanga dya mbanza, anga ujijidike o athu n’a bokone, phala o inzo yami izale.
24 Mukonda ngi myambela kwila: Ku athu u nga dyangele o kwixana sé-ku muthu wanda lola o kúdya kwami.’”
25 Mundu wavulu anga ukala mu kayela Jezú, mwene wasakuka yu wa atangela, wixi:
26 “Woso wamesena ku ngi kayela, maji ukamba kuzemba* tat’ê ni mam’ê, muhatu wê, o twana twê, jiphange jê ja mala ni ja ahatu, katé mwene ni kuzemba o mwenyu wê, katena kukala dixibulu dyami.
27 Woso ukamba kwambata o taka* yê ni ku ngi kayela, katena kukala dixibulu dyami.
28 Nanyi mudyenu mu kumesena kutunga sabhalalu, kaxikama hanji phala kuxinganeka, n’a mone se wala ni kitadi kyasoko phala ku izubha?
29 Se kakibhange, wanda ta o disesa, maji kanda tena ku izubha, o athu a mumono anda mu xongwena ni kuzwela,
30 exi: ‘Muthu yú wamateka kutunga o sabhalalu, maji walembwa ku izubha.’
31 Mba sobha yebhi, ande dya kuya mu lwa o ita ni sobha ya mukwá, kaxikama hanji, n’a dikundu ni akwâ phala kumona se ni dikwinyi dya midi ya masoladi utena kulwa o ita ni yó wa mu kwiza ni makwinyi ayadi amidi?
32 Se mwene wamono kwila kàla ni kutena kwa kulwa o ita, wanda tumikisa akunji phala kubhanga paze, kyoso o sobha yengi kyakala hanji dikanga.
33 Kyene we kimoxi, ijiyenu-kyu kwila woso mudyenu kaxisa o jimbote jê joso, katena kukala dixibulu dyami.
34 “O môngwa-phe, wawabha. Maji se ubhwa o kutowala kwê, kyebhi kyatena dingi ku ubhana o kutowala?
35 Ki wafwama né ngó phala ku uta ku mavu a kudima, mba kukala matóbe. Kikale a utexi. Woso wala ni mátwi a kwívwa, évwe.”
Footnotes
^ Mu Ngel.: “u dya o mbolo.”
^ Mu Ngel.: “ji-junda jitanu ja jingombe.”
^ Mba, “kuzola bhofele.”
^ Tala o Dilombolwelu.
