Kala Kyasoneka Luka 15:1-32
15 O akwá kutambula o lubhaku ni akwá ituxi, a mu kondoloka phala ku mwivwa.
2 O Jifalizewu ni jimesene ja kulonga o Kijila, akexile mu dizumina, exi: “O diyala didi utambulula o akwá ituxi ni kudya nawu kumoxi.”
3 Kyenyiki-phe, Jezú wa atela o kifika kiki:
4 “Nanyi o muthu mudyenu mu kukala ni hama ya jimbudi, anga bhu jimbila imoxi, ukamba kuxisa o makwinyi avwa ni divwa kudima mu mukáwu, nayi musota ya jimbidila katé kya isanga?”
5 Kyoso kya isanga, mwene u ita bhu isuxi anga wiza nayu ni kusanguluka.
6 O kyabhixila kubhata, wixana o makamba ni jivizinyu jê, anga wa ambela: ‘Sangulukenu kumoxi n’eme, mukonda o mbudi yami ya jimbidile, nga isange.’
7 Ngi myambela we kwila, ku dyulu o kusanguluka kuvula dingi, mukonda dya muthu umoxi wadyela o ituxi yê, o makwinyi avwa ni divwa kabhingi kudyela o ituxi yâ, ndenge.
8 “Mba muhatu webhi mu kukala ni dikwinyi dya mabele a phalata,* se u jimbidisa dimoxi, ukamba ku wika o kandeya, anga ukomba o inzo ni kusota kyambote katé kya disanga?
9 Kyoso mwene kya disanga, wixana o makamba* mê ni jivizinyu jê, wa atangela, wixi: ‘Sangulukenu kumoxi n’eme, mukonda nga sange o dibele dyami dya jimbidile.’
10 Ngi myambela kwila, kyene we kimoxi, o jianju ja Nzambi jisanguluka kyavulu kyoso kyamona mukwa ituxi kudyela.”
11 Jezú wambe dingi, wixi: “Sayi diyala dyakexile ni twana tuyadi.
12 O ndenge wambela o tata, wixi: ‘Tata, ngibhane o mbandu ya jimbote ji nga tokala o kulundula.’ O tata anga wa awanena o jimbote.
13 Mu kubhita tu izuwa, o ndenge wabhongolola o jimbote jê joso, yu wayi mu ixi yadikanga. Kwenyóko, mwene wazange o kitadi kyê mu ulaji.
14 Kyazubha kuzanga o kitadi kyoso, mukala nzala yavulu mu ixi yenyóyo. Mwene anga ukala mu tala hadi.
15 Uya musota kikalakalu m’onzo ya muthu watokala mu ixi yenyóyo. O muthu mwenyó wa mu tumu kukalakala mu dibhya dyê mulanga o jingulu.
16 Mwene wa mesenene kudya o ima yakexile mubhana ku jingulu, maji sé-ku muthu wakexile ku mubhana-yu.
17 “Kyoso kyasungu o kilunji, mwene wambe: ‘O akalakadi a tat’etu ala ni kúdya kwavulu, maji eme bhabha, nga mufwa ni nzala!
18 Nganda vutuka kwa tat’etu, anga ngi mu tangela, ngixi: “Tata, ngate kituxi kwa Nzambi ku dyulu, ni kokwé.
19 Ki ngifwama dingi ku ng’ixana ngi mon’é. Ngibhange ngi mukalakadi wé.”’
20 Kyenyiki, mwene wabalumuka, yu wayi kwa tat’ê. Kyoso mwene kyakexile hanji dikanga, o tat’ê wa mumono, o henda ya mukwata. Mwene anga ulenga ni lusolo u mu ndwakuna,* ni henda yoso u mubhana jinzobole.
21 O mona wambela o tata, wixi: ‘Tata, ngate kituxi kwa Nzambi ya dyulu, ni kokwé. Ki ngifwama dingi ku ng’ixana ngi mon’é.’
22 Maji o tata wambela o abhik’ê, wixi: ‘Lengulukenu! Bhekenu o divunga dya katunda, mu mu zwikedyu. Mutyenu we nela ni jihayi ku inama.
23 Bhekenu we kangombe kanete, mu kajibhe, phala tudye ni tu sanguluke,
24 mukonda mon’ami yú wafwile, maji wavutuka ku mwenyu, watexikile, maji wamoneka.’ Ene anga amateka kubhanga fesa.
25 “Kuma o dikota wakexile ku mábhya, kyoso kyakexile mu vutuka, kya zukamene m’onzo, wevu jibuya ja athu a mu kwimba ni kukina.
26 Mukonda dya kiki, mwene wexana mubhika umoxi, anga u mwibhwidisa se ihi yakexile mubhita.
27 O mubhika wa mu tambwijila: ‘Phang’yé wavutuka, o tat’enu wajibha kangombe kanete, mukonda wa mu tambulula ni sawidi yambote.’
28 Maji mwene njinda ya mukwata, yu waditunu kubokona. O tata anga u mu bhomba phala kubokona.
29 Mwene wambela tat’ê, wixi: ‘Nga kalakala mivu yavulu kala ngi mubhik’é. Nuka nga bhukumukine o ijila yé. Maji ki wa ngibhele né ngó kahombo kamoxi phala ngi bhange fesa ni makamba mami.
30 Maji kyoso kyabhixila o mon’é yú wazange* o kitadi kyé ni idyanzunga, eye wa mu jibhila kangombe kanete.’
31 O tata wa mu tambwijila: ‘Mon’ami, eye wene mukala n’eme ithangana yoso, ima yami yoso, ya kutokala we eye.
32 Etu twabhange o fesa yiyi ni kusanguluka, mukonda phang’yé wafwile, yu wavutuka ku mwenyu, wajimbidile, maji wamoneka.’”
Footnotes
^ Mu Ngel.: “mabele a jidalákama.” O athu akexile mu a futa dalákama imoxi nange mu kukalakala kizuwa kimoxi.
^ O makamba yá, makamba a ahatu.
^ Mba, “u mu bhabha.”
^ Mu Ngel.: “wa di.”
