Kala Kyasoneka Luka 23:1-56
23 Kyenyiki, mundu woso wabalumuka anga a mwambata kwa Pilatu.
2 Ene amateka ku mutatela, exi: “Twasange o diyala didi wakexile mu nganala o kifuxi kyetu ni kwa fidisa kufuta o lubhaku kwa Sézalu, ni kuzwela kwila mwéne o Kidistu, o sobha.”
3 Pilatu anga u mwibhwidisa, wixi: “Eye u Sobha ya Jijudé?” Mwene wa mu tambwijila: “Éye mwene wakyambe.”
4 Pilatu watangela o akunji a makota ni mundu woso, wixi: “Kingasange kikuma ku diyala didi.”
5 Maji ene ajiza mu kuzwela: “Mwene ufunyisa o athu mu kwalonga mu Judeya yoso, tundé ku Ngalileya katé bhabha.”
6 Mu kwívwa o maka enyá, Pilatu webhwidisa se o diyala wexile mukwá Ngalileya.
7 Kyevu kwila, Jezú watokala mu mbanza ya kexile mu tumina Helode, Pilatu wa mu tumikisa kwa mwene, mukonda mu izuwa yenyóyo Helode wakexile mu Jeluzaleme.
8 Kyoso Helode kya mumono, wasanguluka kyavulu. Mukonda kwa bhitile kyá thembu tundé kyamesenene kumona Jezú, kuma wevwile kyá ima yavulu yalungu ni mwene, yu wamesenene kumona Jezú kubhanga madiwanu.
9 Mwene wamateka ku mubhanga ibhwidisu yavulu, maji Jezú ka mu tambwijila né ngó kima kimoxi.
10 Kyenyiki, o akunji a makota ni jimesene ja kulonga o Kijila akala mu balumuka ni ku mu tatela ni njinda yavulu.
11 Helode ni masoladi mê a mutobhesa, a mu sebhulula, a muzwika kizwatu kyakatunda, anga a muvutula dingi kwa Pilatu.
12 Mu kizuwa kyenyókyo, Helode ni Pilatu akituka makamba, kuma m’ukulu exile jinguma.
13 Pilatu anga wixana o akunji a makota, o atwameni ni mundu,
14 wa atangela: “Enu mwa ngi bhekela o diyala didi, kala muthu wene mu funyisa o mundu kubhukumukina o jinguvulu. Talesenu! Eme nga mu fundisa bhu pholo yenu, maji ki nga sange kikuma mu ima yoso i mwa mutatela.
15 Mu kidi, katé mwene ni Helode kasange kikuma ku diyala didi, mukonda dya kiki, wa tuvutwila-nê dingi. Mwene kabhange kima ki mubhangesa ku mujibha.
16 Kyenyiki, nganda tumina ku mubeta hanji ni ngi mwehe, n’ayé.”
17 ——
18 O mundu-phe wadikola: “Jibha o diyala* didi ni ujitune Balabaji!”
19 (O diyala didi a mutele mu kaleya mukonda dya kubhukumukina o jinguvulu, ni mukonda dya kujibha.)
20 Pilatu wazwela nawu dingi, mukonda wamesenene kujituna Jezú.
21 Ene anga amateka kudikola, exi: “A mu phaphele ku taka!* A mu phaphele ku taka!”*
22 Lwa katatu, mwene wambe: “Mukonda dyahi? Kituxi kyahi kyate mwene? Ki nga mono kima kibhangesa ku mujibha. Kyenyiki, nganda tumina ku mu beta ni ngi mwehe, n’ayé.”
23 Ene anga ajiza mu kudikola ni dízwi dyaswina phala ku mu jibha ku taka.*
24 Mukonda dya kiki, Pilatu wa solo kubhanga kála kya mubhingi ene.
25 Mwene-phe wajituna o diyala dya mu bhingi ene, yó a mutele mu kaleya mukonda dya kubhukumukina o jinguvulu ni mukonda dya kujibha, maji wa abhana Jezú, kala kyamesenene ene.
26 Kyoso kyakexile mu mwambata, akwata diyala dyakexile mutunda ku mábhya, amwixana Ximá mukwá Silene, a mu tula o taka* bhu isuxi phala ku yambata mu kukayela Jezú.
27 Athu avulu akexile ku mu kayela. Mw’axaxi ka athu ya, mwakexile we ahatu akexile mu dibeta ni kudikwata mukôndo ni kudila.
28 Jezú wa sakukila bhwa kexile o ahatu, yu wa ambela: “Enu mu an’a ahatu a Jeluzaleme, kanenu kungidila dingi. Muveji dya kiki, didilyenu enu mwene ni an’enu,
29 mukonda ijiyenu-kyu kwila, kwanda kwiza izuwa o athu anda zwela: ‘Azediwa o ahatu akambe kuvwala, o mavumu akambe kwimita ni mele a kambe kwamwisa!’
30 Kyenyiki, ene anda tangela o milundu yonene: ‘Lundumukenu kuthandu dyetu!’ ni ku tumilundu, exi: ‘Tuvunginyenu!’
31 Se ene abhanga kiki kyoso o muxi kiwala hanji wa wisu, ihi yanda bhita kyoso ki wanda kukuta?”
32 Akexile mu kwambata we ifumbe iyadi phala kwajibha kumoxi ni Jezú.
33 Kyoso kyabhixila mu kididi akixana Kiholongonyo, a mu phaphela ku taka* kumoxi ni ifumbe, umoxi ku kadilu, o mukwá ku kyasu.
34 Maji Jezú wakexile mu zwela: “Tata, waloloka, mukonda ene kejiya o kima kya mubhanga.” Ene anga ata jisólote, phala kuwana o izwatu yê.
35 O mundu wemanene bhenyobho mu ku mutala. Maji o atwameni akexile ku mu xongwena, exi: “Wabhulula athu engi, mu kiki-phe a dibhulule mwene mudyê, se mwéne o Kidistu a musolo kwa Nzambi.”
36 Katé mwene ni masoladi a mu sebhulula, a mu zukama ya a mubhana vindangele.
37 Anga azwela, exi: “Se u Sobha ya Jijudé, dibhulule.”
38 Kuthandu dyê kwakexile kisoneku, exi: “Yú mwéne o Sobha ya Jijudé.”
39 Kyenyiki, kifumbe kimoxi a mu phaphele-n’ê kumoxi wamateka ku mu sebhulula, wixi: “K’eye u Kidistu? Dibhulule eye mwene, ni etu we!”
40 O kifumbe kya mukwá wa mubazela, yú wambe: “Eye ki wala ni wôma wa Nzambi? O kaxitiku ké ki kasoko ni ka mwene?
41 Etu twafwama kutala o hadi yiyi, mukonda dya ima i twabhange. Maji o diyala didi kabhange kima kyayibha.”
42 Mwene wambe dingi: “Jezú, ngi lembalale kyoso kiwanda bokona mu Utuminu wé.”
43 Jezú wa mwambela: “Lelu, ngi kutangela o kidi kwila: Eye wanda kala n’eme mu Palayizu.”
44 Mu ola ya kasamanu,* o ixi yenyóyo ikala mwavundu katé mu ola ya kavwa,*
45 mukonda o dikumbi kidya mwika. O kulutina ya tembulu yatanduka mu kaxi.
46 Jezú anga udikola ni dízwi dya swina: “Tata, mwenyu* wami ngi ubhakula bhu maku mé.” Kyoso kyazubha kuzwela kiki, mwene wafu.
47 Mu kumona o ima yakexile mubhita, o kabhitangu ka masoladi wamateka kuximana Nzambi, mu kuzwela: “Mu kidi, o diyala didi wexile muthu wayuka.”
48 O mundu woso wabhongolokele phala kutala o ima yiyi, amono yoso yakexile mubhita, anga avutuka ku mabhata mâ ni kudibeta bhu thulu ni mukôndo.
49 Athu oso amwijidile, emanene dikanga. O ahatu akexile mu mu kayela tundé ku Ngalileya, akexile we kwenyóko ya amono o ima yiyi.
50 Anga kwiza diyala amwixana Zuze, watokala mu Inzo ya Kufundisa ya Jijudé, mwene wexile muthu wambote, wayuka.
51 (O diyala didi, kaxikinine o ndunge ya mayala enyó, ya kujibha Jezú.) Mwene wexile mukwá Dimateya, mbanza ya Judeya, wakexile we mukinga o Utuminu wa Nzambi.
52 O diyala didi wayi kwa Pilatu, yu wa mubhingi o kimbi kya Jezú.
53 Kyenyiki wa mu katula ku taka,* yu wa mu vungina mu dilasola dya linyu, anga u mu tula mu mbila yokande ku ndanji, mukonda kafundile-mu luwa muthu.
54 Kyexile o kizuwa kya kudiyudika, mukonda o Sábhalu yeji mateka kyá.
55 O ahatu a mu kayela tundé mu Ngalileya, ayi katé kwenyóko, anga amona o mbila ni kyebhi kyatula-mu o kimbi kya Jezú.
56 Anga avutuka phala kusokejeka o ima inuha kyambote ni máji adizumba. Maji kya Sábhalu ene anyoha, kala kyosoneke mu kitumu.
Footnotes
^ Mu Ngel.: “mu ambate.”
^ Tala o Dilombolwelu.
^ Mba, “A mu jibhe ku taka! A mu jibhe ku taka!”
^ Mba, “a mu jibhe ku taka.”
^ Tala o Dilombolwelu.
^ Tala o Dilombolwelu.
^ Kiki kilombolola, ku mediya.
^ Kiki kilombolola ku 15 kya ola.
^ Mu Ngel.: “nzumbi.”
^ Tala o Dilombolwelu.
