Kala Kyasoneka Luka 5:1-39
5 Sayi kizuwa, Jezú wakexile ku mbandu ya kizanga kya Jenezalé,* o mundu anga ukala ku muxina, phala kwívwa o mak’a Nzambi.
2 Mwene wamono báluku jiyadi jakexile ku mbandu ya kizanga, maji o atambi kakexile-mu, akexile mu sukula o mawanda mâ.
3 Mwene wadilôngo mu báluku ya Ximá, anga u mubhinga phala ku isondolola bhofele ku ndundu. Mu kiki, waxikama mu báluku, yu wamateka kulonga o mundu.
4 Kyazubha o kuzwela, watangela Ximá, wixi: “Ndé ku mbandu yazongo, mutakule o mawanda phala kutamba.”
5 Ximá-phe, wa mutangela, wixi: “Mesene, twabundu usuku woso, ki twa kwatetu kima, kuma éye wa ngi bhingi, nganda takula o mawanda.”
6 Kyoso kya atakula, akwata ndumba dya jimbiji, o mawanda amateka kutanduka.
7 Ene anga exana o akalakadi ni akwâ, akexile mu báluku yamukwá, n’a zukame phala kwa kwatekesa. Ene eza, anga ezalesa o báluku jiyadi, kyenyiki ja mateka kuboba.
8 Mu kumona o ima yiyi, Ximá dya Phetele wafukama bhu pholo ya Jezú yu wambe, wixi: “Ngana, tunda bhu mbandu yami, mukonda ngi mukwa ituxi.”
9 Phetele ni yó akexile-nê kumoxi, adiwana kyavulu mu kumona o ndumba dya jimbiji ja kwatele.
10 Tiyaku ni Nzwá an’a Nzebedewu, akexile mu kalakala kumoxi ni Ximá, adiwana we. Maji Jezú wambela Ximá, wixi: “Kana kukala ni wôma! Tundé lelu katé ku hádya, wanda kala umutambi wa athu.”
11 Ene ambata o jibáluku ku ndundu, axisa o ima yoso, anga a mukayela.
12 Kizuwa kya mukwá, Jezú ukala mu mbanza imoxi, anga kumoneka diyala wezala ni dibhute. Kyoso mwene kyamono Jezú, wafukama ni pholo bhoxi, u mu dyondela, wixi: “Ngana, se wamesena utena ku ngi saka!”
13 Jezú wasununa o lukwaku lwê, u mukwata anga uzwela, wixi: “Nga mesena! Disanze.” Mu kithangana kyenyókyo, o dibhute dyê dyabhiti.
14 Mwene anga utendelesa o diyala phala katangele muthu. Anga u mwambela dingi, wixi: “Ndé u dilondekese ku mukunji, ni ubhane o ujitu mukonda dya kudisanza kwé, kala kizwela o Kijila kya Mozé, n’a mone kwila eye wadisanze.”
15 Maji o fuma yê yakexile mu dimwanga, mundu wavulu wakexile mu kwiza, phala kwasaka ku mawuhaxi mâ.
16 Mwene wakexile muya mu mikáwu, phala kusamba.
17 Sayi kizuwa kyoso kyakexile mulonga, o Jifalizewu ni jimesene ja kulonga o Kijila, jatundile mu jisanzala ja Ngalileya, ja Judeya ni Jeluzaleme, axikamene bhenyobho. Jezú anga wizala ni kutena kwa Jihova phala kusaka o athu.
18 Kyenyiki, kwabhixila mayala ambatele bhu kipoya diyala katenene kwenda, ene amesenene kubokona-nê m’onzo, ni ku mutula bhwakexile Jezú.
19 Kuma katenene kubokona m’onzo mukonda dya mundu, a habe-nê kuthandu a inzo, akatula o mateya, ya a mu kulumukisa ni kipoya kyê, mw’axaxi ka athu, bhu kididi bhwakexile Jezú.
20 Kyoso Jezú kyamono o kixikanu kyâ, mwene watangela o diyala, wixi: “Kamba dyami, ituxi yé yololoke!”
21 Kyenyiki, o jimesene ja kulonga o Kijila ni Jifalizewu amateka kuxinganeka mudyâ, exi: “Mwene nanyi phala kuzwela o kixongwenu kiki? Nanyi utena kuloloka o ituxi? Ki Nzambi ngó?”
22 Mu kwijiya o ima yakexile mu xinganeka, Jezú wa atangela, wixi: “Ihi i mwa mu xinganeka mu mixima yenu?
23 Ihi yabhonzo dingi? O kuzwela kwila: ‘Ituxi yé yololoke,’ inga o kuzwela: ‘Balumuka ni wende’?
24 Phala mu k’ijiye kwila o Mon’a muthu wala ni ungana wakuloloka o ituxi mu ngongo . . . ” mwene watangela o haxi, wixi: “Nga kutumu, balumuka, zangula o kipoya kyé, ndé kubhata dyé.”
25 Mu kiki, mwene wabalumuka, wakwata o kipoya kyê, yu wayi kubhata ni kuximana Nzambi.
26 Athu oso adiwana kyavulu, ya amateka kuximana Nzambi. Ni wôma wavulu azwela, exi: “Lelu twamono ima ya madiwanu!”
27 Kyabhiti o ima yiyi, mwene watundu anga umona o mukwá kutambula o lubhaku amwixana Levi, waxikama mu kididi kya kutambula o lubhaku. Mwene anga u mwambela, wixi: “Kala u mukayedi wami.”
28 Mwene wabalumuka, waxisa o ima yoso, anga umateka ku mu kayela.
29 Mu kiki-phe, Levi wa mu bhangela fesa yadikota mu inzo yê. Kwexile athu avulu akwa kutambula o lubhaku ni athu amukwá, akexile mudya* nawu kumoxi.
30 Mukonda dya kiki, o Jifalizewu ni jimesene jâ ja kulonga o Kijila, amateka kudikalanganza ni kutangela o maxibulu a Jezú, exi: “Mukonda dyahi mwa mudya ni kunwa kumoxi ni akwa kutambula lubhaku ni akwa ituxi?”
31 Jezú wa atambwijila: “O athu ala ni sawidi ka bhindamena musaki, maji yó akate.
32 Eme kingeza mu kwixana o athu ayuka, maji o akwa ituxi, n’a dyele o ituxi yâ.”
33 Ene amwambela, exi: “O maxibulu a Nzwá ene mu jejuwala ni kusamba ni kudyonda. Kyene we kibhanga o maxibulu a Jifalizewu, maji o maxibulu mé ene mudya ni kunwa.”
34 Jezú wa ambela: “O kwila mutena kubhangesa o makamba a ngayala kujejuwala, kyoso o ngayala kyakala nawu kumoxi?
35 Maji kwanda kwiza izuwa, o ngayala anda kwakatula nawu. Mu izuwa yenyóyo, kyene kyanda jejuwala.”
36 Mwene anga u atela kifika, wixi: “Kana muthu ubatula mbandu ya kizwatu kya ubhe, phala kuta ku kizwatu kyókulu. Se muthu ubhanga kiki, o kibanji* kya ubhe kyanda tunda. Anga o kibanji* kya kizwatu kya ubhe kikyanda fwama mu kizwatu kyókulu.
37 Kyene we kimoxi, kana muthu uta vinyu ya ubhe mu jimbinda* jokulu. Se muthu ubhanga kiki, o vinyu ya ubhe yanda bazesa o jimbinda, o vinyu ni jimbinda anga jizanganya.
38 Mu kiki, o vinyu ya ubhe atokala ku ita mu jimbinda ja ubhe.
39 Kana muthu kyazubha kunwa vinyu yókulu, umesena dingi vinyu ya ubhe, mukonda mwene uzwela, wixi: ‘O vinyu yókulu yala kota mu kuwabha.’”
Footnotes
^ O Kalunga ka Ngalileya.
^ Mba, “a xikama ku meza.”
^ Mba, “kibandeku.”
^ Mba, “kibandeku.”
^ O jimbinda jiji, akexile mu ji bhanga ni ibha ya yama.
