Kala Kyasoneka Luka 8:1-56
-
Ahatu exile mukayela Jezú (1-3)
-
O kifika kya mukuni (4-8)
-
Mukonda dyahi Jezú wexile muta ifika (9, 10)
-
Ulombolola o kifika kya mukuni (11-15)
-
O kandeya katokala ku ka futa (16-18)
-
Mama ni jiphange ja Jezú (19-21)
-
Jezú utululukisa o kitembu (22-25)
-
Jezú utuma madimonyo kubokona mu jingulu (26-39)
-
Mona Jayilu; muhatu ukwata mu kizwatu kya Jezú (40-56)
8 Mu kubhita tu izuwa, Jezú wamateka kwenda mu jimbanza ni mu jisanzala, mu kuboka ni kutula o njimbu yambote ya Utuminu wa Nzambi. O kwinyi ni kiyadi kya jipoxolo akexile-nê kumoxi.
2 Ni amoxi we ku ahatu a akayele o madimonyo, ni kwasaka o mauhaxi: Madiya dya Manda, yó a mu katwile sambwadi dya madimonyo,
3 ni Nzwana, muhatu wa Kuza, kimbadi kya inzo ya Helode, ni Suzana, ni ahatu a kamukwá. Bhukaxi ka jimbote jâ, ene akexile mu kwatekesa Jezú ni maxibulu mê.
4 Kyoso o kifuxi kyadikota ni yó akexile mu tunda mu jimbanza ja mukwá, phala kuya-nê, kyabhongoloka, mwene wa atela kifika, wixi:
5 “Mukuni wa jimbutu watundu phala kukuna. Kyoso kyakexile mu kuna, sayi jimbutu ja sonokena bhu mbandu a njila, anga a jidyota ku athu, o jinjila anga a jimoma.
6 Ja mukwá, ja sonokena bhu matadi. Kyoso ki ja sabhuka, jene jalela mukonda dya kukamba o kutalala.
7 Ja mukwá jasonokena mu minya. O minya yakudila kumoxi ni jimbutu, anga ifuta o jimbutu.
8 Ja kamukwá jasonokena mu mavu ambote, kyoso ki jasabhuka, jamateka kwima luhama lwa ibundu ndenge.” Kyoso kyazubha ku atangela o maka enyá, wambe ni dízwi dya swina, wixi: “Woso wala ni mátwi ma kwívwa, évwe.”
9 Maji o maxibulu a mwibhwidisa o dilombolwelu dya kifika kiki.
10 Mwene wa ambela: “Enu a mibhana o kutena kwa kutongolola o ikutu ya Nzambi yalungu ni Utuminu wê, maji amukwá, ima yoso a azwelela-yu bhukaxi ka ifika, phala atale, maji atale mu kingoho, évwa, maji o ima yevwa ka itendela.
11 O kifika kilombolola kiki: O mbutu yene o mak’â Nzambi.
12 O jimbutu jasonokena bhu mbandu a njila, jilombolola o athu évwa o mak’â Nzambi, anga kwiza Dyabhu ukatula o maka ku mixima yâ, phala alémbwe kuxikana ni kubhuluka.
13 O jasonokena bhu matadi, jilombolola yó kyoso kyévwa o maka, a atambula ni kusanguluka, maji kàla ni jindanji. Ene axikina ngó kakithangana, maji kyoso kimoneka jitendasá, atexi o kixikanu kyâ.
14 O jojo jasonokena mu minya, jilombolola yó évwa o mak’â Nzambi, maji mukonda dya kulanduka ni hele ya mwenyu, dya jimbongo ni dya jihânji ja mundu yú, akala mwavundu, anga akamba kwima ibundu yabhi kyá.
15 O jimbutu jasonokena mu mavu ambote, jilombolola yó kyoso kyévwa o maka ma Nzambi ni muxima wambote, a malunda anga akolokota kyoso kyaya ni kwima ibundu.
16 “Kana muthu u wika o kandeya anga ukafuta mu kitutu, mba ukabhaka moxi a hama, maji ukatula kuthandu a meza phala athu oso kyabokona, amone o mukengeji wê.
17 Mukonda sé-ku kima kyófute, kikamba kutukuluka, kana-ku kima kyósweke kyambote akamba ku k’ijiya, mba a kisweka katé ku hádya ni hádya.
18 Mu kiki-phe, alukenu kyoso ki mwívwa, mukonda woso wala ni kima, anda mubhana dingi. Maji o yó kala ni kima, katé mwene ni kima kya fika kwila wala nakyu, anda mu tambula-kyu.”
19 Kyenyiki, many’â ni jiphange jê abhixila, maji katenene kuzukama bhwakexile mwene, mukonda dya mundu.
20 Athu anga a mwambela, exi: “Many’enu ni jiphange jé ala bhu kanga, amesena ku kumona.”
21 Mwene wa avutwila, wixi: “Mam’etu ni jiphange jami enyá, oso évwa o maka ma Nzambi, anga a ma kumbidila.”
22 Sayi kizuwa mwene ni maxibulu mê adilôngo mu báluku, anga wa ambela: “Tu zawukyenu ku sámbwa dya kizanga.” Ene anga atunda.
23 Kyakexile mu zawuka, Jezú wazeka. Mu kizanga anga mu mateka kitembu kyadikota, o báluku yezala ni menya, anga ikala muboba.
24 Kyenyiki, a mu balumuna, ya amwambela: “Mesene, Mesene, twanda fwa!” Mwene wabalumuka, wabazela o kitembu ni mabhuku a nguzu. O kitembu kibatama, anga kukala kutululuka kwadikota.
25 Jezú wambela o maxibulu mê, wixi: “O kixikanu kyenu kyala kwebhi?” Maji ene ni wôma wavulu adiwana, ya adyambela mudyâ, exi: “O diyala didi nanyi? Mukonda ubazela katé mwene o kitembu ni menya, anga a mu belesela.”
26 Ene abhixila ku ndundu mu sanzala ya akwa Jelaze, yala ku mbandu ya mukwá ya mbanza ya Ngalileya.
27 Kyoso Jezú kyatuluka mu báluku, sayi diyala mukwa mbanza wakexile ni dimonyo, wayi mu disanga-nê. O mwenyú tundé ukulu, kexile muzwata, kakexile mu kala kubhata, wakexile mukala ngó ku jimbila.
28 Kyoso mwene kyamono Jezú, wadikola, yu wafukama bhu pholo ya Jezú, anga uzwela ni dízwi dya swina: “Ihi i wamesena kokwami, Jezú, Mon’a Nzambi, o Suke-ku? Nga kudyóndo, kana ku ngitalesa hadi.”
29 (Jezú watumine o nzumbi yayibha phala kutunda ku diyala. Veji javulu o nzumbi yayibha yakexile mu mukwata, o athu akexile mukuta o diyala ni malubhambu ku maku ni ku inama, ni ku mulanga. Maji mwene wakexile mubatujula o malubhambu, anga o dimonyo dikala ku mwambata mu mukáwu.)
30 Jezú wa mwibhwidisa: “Dijina dyé nanyi?” Mwene wa mu tambwijila, wixi: “Dijina dyami Kifuxi,” mukonda madimonyo avulu a mu bokwene.
31 Ene anga a mudyonda phala ka atumikise mu dikungu dyazongo.
32 Bhenyobho bhwakexile kibhanga kyadikota kya jingulu, kyakexile mudya ku mulundu. Kyenyiki, o madimonyo a mudyondela phala kwa ehela kubokona mu jingulu, mwene anga wa ehela.
33 O madimonyo atundu moxi a diyala, ya abokona mu jingulu, o jingulu-phe ja ditakula mu dikenye* mu kizanga, anga jiboba mu menya.
34 O athu akexile mulanga o jingulu kyamono o ima yabhitile, alenge, ya ayi mutangela o maka enyá ku athu mu mbanza ni mu sanzala.
35 Athu anga atunda phala kumona o ima yabhiti. Kyoso kyazukama bhwakexile Jezú, asange o diyala a mu katwile o madimonyo, wazwata, wakexile kyá ni kilunji kyambote. Mwene waxikamene bhu inama ya Jezú, mu kyenyiki, o athu akala ni wôma.
36 O athu amwene o madiwanu enyá, atangela akwâ, kyebhi o diyala dyakexile ni madimonyo kyadisanze.
37 Athu avulu akwa Jelaze, abhingi kwa Jezú phala kuxisa o mbanza, mukonda akexile ni wôma wavulu. Kyenyiki mwene wadilôngo mu báluku, phala kutunda mu mbanza.
38 Maji o diyala a mu katwile o madimonyo, wakexile ku mudyondela phala kuya-nê, maji Jezú wa muvutula, yu wa mwambela, wixi:
39 “Ndé kubhata dyé, usuluke mu kutangela o athu, o ima yoso ya kubhange Nzambi.” Mwene wayi, yu wamateka kuboka mu mbanza yoso, o kima kya mu bhangele Jezú.
40 Kyoso Jezú kyavutuka, o mundu wa mu tambulula kyambote, mukonda ene oso akexile mu mukingila.
41 Kwabhixila diyala amwixana Jayilu, mwene wexile mutwameni wa dilombe.* Mwene wafukama bhu inama ya Jezú, yu wamateka ku mudyondela, phala kuya kubhata dyê,
42 mukonda mon’ê wa muhatu umoxyelele wakexile ni kwinyi ni kyadi kya mivu, wa kumbamene.
Kyoso Jezú kyakexile mu kwenda, o mundu wakexile mu muxina.
43 Kwakexile muhatu wakatele kibhubhe kya manyinga mu kwinyi ni kiyadi kya mivu, sé-ku dotolo watenene ku musaka.
44 Mwene wazukama kudima dya Jezú, yu wa mukwata mu kizwatu kyê. Mu kithangana kyenyókyo, o kibhubhe kya manyinga kyabatuka.
45 Jezú webhwidisa: “Nanyi wa ngi kwata?” Kuma oso akexile mudituna, Phetele wa mwambela: “Mesene, o mundu wa ku bhongolokela, yu wa mu kuxina.”
46 Maji Jezú wambe, wixi: “Sayi muthu wa ngi kwata, mukonda mu mukutu wami mwatundu kutena.”
47 O muhatu kyamono kuma katena dingi ku disweka, weza ni kuteketa, wafukama bhu pholo yê, anga utangela athu oso, se mukonda dyahi wakwatele Jezú, ni kyebhi mwene kyadisanze mu kithangana kyenyókyo.
48 Maji Jezú wa mwambela: “Mon’ami, o kixikanu kyé kya kubhangesa kudisanza. Ndé ni kutululuka.”
49 Kyoso Jezú kyakexile hanji muzwela, kwabhixila diyala dya tokala ku inzo ya mutwameni wa dilombe,* wambe, wixi: “Jayilu, mon’é wafu! Mukonda dyahi wa mu bhindamesa dingi o Mesene?”
50 Jezú kya kivu watangela Jayilu: “Kana kukala ni wôma, xikina ngó, mon’é wanda bhuluka.”
51 Kyoso kyabhixila kubhata, mwene wehela ngó Phetele, Nzwá ni Tiyaku, ni jitata ja kilumba, kubokona-nê m’onzo.
52 Maji athu oso akexile mudila ni ku dikwata mukôndo, mukonda dya kamona. Kyenyiki, Jezú wambe: “Kanenu kudila, mukonda mwene káfu, maji wa muzeka.”
53 Athu oso amateka ku mwolela, ni ku mu sebhulula, mukonda a kijidile kwila mwene wafwile.
54 Maji Jezú wa mukwata mu lukwaku, wa mwambela: “Mon’a kilumba, balumuka!”
55 Mwene anga uvutuka ku mwenyu. Mu kithangana kyenyókyo, wabalumuka, Jezú anga utuma ku mu bhana kúdya.
56 O jitata jê a sangulukile kyavulu, maji mwene wa atendelesa phala katangele muthu mu yoso yabhiti.
Footnotes
^ Mba, “kididi kya zendalala.”
^ Mba, “kididi kya ubhezelu.”
^ Mba, “kididi kya ubhezelu.”
