Kala Kyasoneka Matesu 24:1-51
-
KIJIMBWETE KYA KUTUKULUKA KWA KIDISTU (1-51)
24 Kyoso Jezú kyakexile mutunda mu tembulu, o maxibulu mê a mu zukama, anga a mu londekesa o tembulu ni ilumbu yê.
2 Mu kyenyiki-phe mwene wa atangela, wixi: “Enu mwa mu mona o ima yiyi? Ngi mi tangela o kidi kwila, bhenyabha kibhwanda xala ditadi dimoxi kuthandu dya mukwá, sé ku di lundumuna.”
3 Kyoso kya xikamene ku Mulundu wa Midiva, o maxibulu mê a mu zukama ubheka wâ, ya a mu ibhwidisa, exi: “Tutangele. Ima yiyi yanda bhita thembu kuxi? Kyebhi o kijimbwete kya kutukuluka* kwé, ni kya dizubhilu dya mundu?”*
4 Jezú-phe wa atambwijila, wixi: “Dilangyenu, phala kibhukale muthu u mi nganala,
5 kuma avulu anda kwiza mu dijina dyami, kwila: ‘Éme ngi Kidistu.’ Ene anda nganala athu avulu.
6 Mwanda kwivwa ita ni jingolokela* ja ita, mu ididi yavulu. Alukenu-phe, phala kimukale ni wôma, mukonda o ima yiyi yatokala kubhita mwene, maji kidyene luwa o dizubhilu.
7 “Mukonda akwa ixi imoxi, anda bhânga mu ita, ni akwa ixi ya mukwá, kwanda kala nzala ni kutunguta kwa ixi mu ididi yavulu.
8 Ima yoso yiyi, dimatekenu ngó dya malamba.*
9 “O athu anda mi talesa hadi, ni ku mi jibha, anda mi zemba kwala akwa jixi joso, mukonda dya dijina dyami.
10 Avulu we a keha o kixikanu kyâ kwa Nzambi, anda disumbisa mudyâ ni kudizemba mudyâ.
11 Kwanda moneka jipolofeta javulu ja makutu, anda nganala athu avulu.
12 Mukonda dya kuyibha ku dibandekesa, avulu o henda yâ yanda zoza.
13 Maji woso ukolokota katé ku dizubhilu, mwéne wanda bhuluka.
14 O njimbu yiyi yambote ya Utuminu wa Nzambi, abhingi ku iboka mu ngongo yoso, mu kubhana umbangi ku akwa jixi joso, kyene ngó kyanda kwiza o dizubhilu.
15 “Mu kiki, kyoso ki mu mona o kisunji kibhekela o kibwikilu, kyatangele polofeta Daniyele, kyemana bhu kididi kikôla (woso utanga atongolole),
16 mu kyenyiki-phe, oso akala mu Judeya, amateke kulengela ku milundu.
17 Woso wala kuthandu dya inzo yê, katuluke phala kukatula o imbamba yala m’onzo.
18 Woso wala ku dibhya, kavutuke phala kutakana o kizwatu kyê.
19 Lamba dya ahatu anda kwimita ni yó anda kwamwisa mu izuwa yenyóyo!
20 Kolokotenu-phe mu kusamba, phala o ima yiyi, ki ibhite mu thembu ya mbambi* mba mu kizuwa kya Sábhalu.
21 Kuma kwanda kala hadi yadikota, kiluwa ibhita tundé ku dimatekenu dya ngongo katé kindala, ku hádya we ki yanda bhita dingi.
22 Mu kidi, se o izuwa yenyóyo ka itolesele, sé-ku muthu weji bhuluka. Maji mukonda dya yó a asolo kwa Nzambi, o izuwa yenyóyo anda itolesa.
23 “Mu kiki, se bhu kala muthu u mi tangela, wixi: ‘Talesenu! Kidistu yú bhabha,’ mba ‘yú koko,’ kanenu ku mu xikina.
24 Mukonda kwanda moneka Jikidistu ja makutu, ni jipolofeta ja makutu. Ene anda bhanga isumwa yavulu ni madiwanu, phala kunganala o athu, katé mwene ni yó a asolo kwa Nzambi.
25 Ivwenu! Eme nga dyangele kyá ku mi dimuna.
26 Se athu a mi tangela, exi: ‘Talesenu! Mwene wala mu mukáwu,’ kanenu kutunda. Mba a mi tangela, exi: ‘Talesenu! Mwene wala m’onzo,’* kanenu kuxikina.
27 O kutukuluka* kwa Mon’a muthu, kwanda kala kála o nzaji itunda kwa mu tundila o dikumbi, anga imwikina katé ku fwila o dikumbi.
28 Bhwoso bhu kala o kimbi, bhene bhwanda bhongolokela o jiholokoko.
29 “Kyoso kyanda bhita o hadi ya izuwa yenyóyo, o dikumbi dyanda vunda, o mbeji ki yanda bhana mukengeji, o jithéthembwa ku dyulu janda lawuka, o ima ku dyulu yanda tunguta.
30 Kyenyiki, kwanda moneka o kijimbwete kya Mon’a muthu ku dyulu, athu oso mu ngongo anda dila ni kudikwata mukôndo, anga anda mona o Mon’a muthu kwiza ku matuta, ni kutena ni fuma yoso.
31 Mwene wanda tuma o jianju jê ni dízwi dya koloneta, jene janda bhongolola o athu ósole, ku mbandu jiwana ja ngongo,* tundé kwatundu o dyulu, katé ku dya suku.
32 “Ku muxi wa mufiku, dilongyenu-ku o kifika kiki: Kyoso ki mu mona kwila, o jithangu ja ubhe ja mateka ku bwingita, mwejiya kwila o thembu ya mvula ya zukama.
33 Kyene we kimoxi, kyoso ki mu mona o ima yoso yiyi kubhita, ijiyenu-kyu kwila, mwene wazukama, wala kyá bhu mwelu.
34 Ni kidi kyoso ngi mi ambela kwila, o mwiji yú ki wanda bhita, katé kyanda dikumbidila o ima yoso yiyi.
35 O dyulu ni ixi yanda bhita, maji o maka mami, anda nangenena katé ku hádya ni hádya.
36 “Yalungu ni kizuwa kyenyókyo ni kithangana,* sé-ku muthu wa kijiya. Né o jianju ku dyulu, né o Mona, maji Tata ngó, wakijiya.
37 Mukonda, kala kyakexile mu izuwa ya Nowé, kyene we kyanda kala, o kutukuluka* kwa Mon’a muthu.
38 Mukonda mu izuwa yenyóyo, ande dya diluvyu, o athu akexile mu dya ni kunwa, o mala akexile mu kazala, o ahatu akexile mu abhana mu ukaza, katé o kizuwa kyabokona Nowé mu álaka.
39 Ene kabhana mátwi, katé o diluvyu ki dyeza, anga dya kungulula ene oso. Kyene we kyanda bhita, mu kutukuluka kwa Mon’a muthu.
40 Kiyadi kya mala anda kala mu dibhya. Umoxi anda mwambata, o mukwá anda mu xisa.
41 Kiyadi kya ahatu, anda kala mu huha bhu ditadi. Umoxi anda mwambata, o mukwá anda mu xisa.
42 Mu kiki, kolokotenu mu kudilanga, mukonda o kizuwa kyanda kwiza Ngana yenu, ki mwa kijiya.
43 “Ijiyenu-kyu kwila, se o mukwá dibhata wejidile o kithangana* kyeji kwiza o mwiyi, mwene keji zeka, keji kwehela we kubula o inzo yê.
44 Mukonda dya kiki, enu wenu kalenu polondo, kuma o kithangana kyanda kwiza o Mon’a muthu ki mu kijiya.
45 “Nanyi o kimbadi kya fiyele kya dimuka,* ngana yê wa mu tumina kutambula konda ya akwa dibhata dyê, phala kwa bhana o kudya mu kithangana kyatokala?
46 O kimbadi kiki, kyanda zediwa se o ngana yê kyoso kyanda kwiza u musanga wa mubhanga kiki!
47 Ngi mi ambela o kidi kwila, mwene wanda mu sola phala kutambula konda ya jimbote jê joso.
48 “Maji, se o kimbadi kiki kyayibha, ki xinganeka ku muxima wê kwila: ‘Ngana yami wa mu laleka,’
49 anga umateka kubeta o jiselevende ni akwá, ni kudya ni kunwa kumoxi ni jihôlwa,
50 o ngana ya kimbadi kiki, wanda kwiza mu kizuwa ni mu kithangana mwene ka kifikile.
51 Mwene wanda mubhana kibetu, ni ku mubhana kididi mw’axaxi ka akwa mangonya. Kwene kwanda kala o kudila kwê ni kudikokota ku mazu.
Footnotes
^ Tala o Dilombolwelu.
^ Tala o Dilombolwelu.
^ Mba, “minangu.”
^ Mu Ngel.: “jindolo ja kuvwala.”
^ Mba, “kixibhu.”
^ Mba, “mu dixilu.”
^ Tala o Dilombolwelu.
^ Mu Ngel.: “itembu iwana.”
^ Mu Ngel.: “ola.”
^ Tala o Dilombolwelu.
^ Mba, “kithangana kya usuku.”
^ Mba, “njimu.”
