Kala Kyasoneka Matesu 27:1-66
27 Mu kamene, o akunji oso a makota ni adyakimi a mundu, adyôngeka phala kumona kyebhi kyeji jibha Jezú.
2 Kyazubha ku mu kuta, a mwambata anga a mu bhakula kwa nguvulu Pilatu.
3 Juda-phe, yó wa sumbisile Jezú, kyamono kuma Jezú a mu balakala o kufwa, wadyela mu yoso yabhange, anga uvutwila o makwinyi atatu amabele* a phalata ku akunji a makota ni adyakimi a mundu.
4 Mwene wambe, wixi: “Ngate kituxi mu kusumbisa o manyinga a muthu wakambe kikuma.” Ene a mu vutwila, exi: “Yá, maka mé. Ka tu tokala etu!”
5 Mu kiki, mwene watakula o mabele* a phalata mu tembulu yu wayi. Mwene anga udinyenga.
6 O akunji a makota, abongo o mabele* a phalata, ya ambe, exi: “Ki tu tokala ku atula mu kididi kyene mu bhaka o kitadi kya tembulu, mukonda asumbu nawu manyinga.”
7 Kyazubha kudikunda mudyâ, o kitadi asumbu nakyu o kibhela kya ngumbi, phala kufunda-mu o athu akwa jixi jengi.
8 Mukonda dya kiki, o kididi kyenyókyo a k’ixana Dibhya dya Manyinga, katé mu kizuwa kya lelu.
9 Kyenyiki, o maka azwela o polofeta Jelemiya a dikumbidila, kyoso kyambe: “Atambula o makwinyi atatu a mabele* a phalata, o pelesu ya xindi phala o muthu a mu sumbisa, yó a mu te wenji kwala amoxi ku an’a Izalayele,
10 anga abhana o kitadi phala kusumba o kibhela kya ngumbi, kala kya ngi tumu Jihova.”
11 Jezú-phe, wimana bhu pholo ya nguvulu, o nguvulu anga u mwibhwidisa wixi: “Eye u Sobha ya Jijudé? Jezú wa mu tambwijila, wixi: “Éye mwene wa kitange.”
12 Maji kyoso o akunji a makota ni adyakimi a mundu kyakexile mu mu tatela, mwene kazwela kima.
13 Pilatu-phe, wa mwibhwidisa, wixi: “Eye ki wa mu kwivwa o ima ya mu ku tatela o athu yá?”
14 Maji mwene ka mu tambwijila kima, né ngó kizwelu kimoxi. Mu kiki, o nguvulu wadiwana kyavulu.
15 Mu kithangana kya fesa ya Phasu, o nguvulu wakexile mu jituna pelezu imoxi, yó eji mu sola kwala o mundu.
16 Mu thembu yenyóyo ene akexile ni pelezu imoxi a mwixana Balabaji, kifumbe kya fumanene kyavulu.
17 Kyoso o mundu kya dyôngeka, Pilatu wa a ebhwidisa, wixi: “Nanyi mwa mesena kwila, ngi mu jituna: Balabaji inga Jezú, a mwixana Kidistu?”
18 Pilatu wejidile kwila, Jezú a mu bhakula kwa mwene, mukonda a mu zembe.
19 Kyoso Pilatu kya xikamene mu kididi kya kufundisa, muhatu wê wa mu tumikisa njimbu, wixi: “Kana kudita mu maka a diyala didi dya yuka. Kuma lelu ngatale hadi yavulu ku nzoji, mukonda dya mwene.”
20 O akunji a makota ni adyakimi a mundu, aswinisa o kifuxi kubhinga phala kujituna Balabaji, ni kutumina kujibha Jezú.
21 Kyenyiki, o nguvulu wa a ebhwidisa, wixi: “Mu kiyadi kiki, nanyi mwa mesena kwila, ngi mu jituna?” Ene a tambwijila, exi: “Balabaji.”
22 Pilatu anga wa ambela, wixi: “O Jezú-phe, a mwixana Kidistu, ngi mu bhanga kyebhi?” Ene oso atambwijila, exi: “A mu phaphele ku taka!*”
23 Mwene wambe dingi, wixi: “Mukonda dyahi? Kituxi kyahi kyate mwene?” Ene oso adikola dingi ni dízwi dya swina, exi: “A mu phaphele ku taka!*”
24 Pilatu kyamono kwila, katena kubhanga kima, maji kwexile kyá jimvunda, wakatula o menya, anga usukula o maku bhu pholo ya mundu, wixi: “Kingala ni kikuma ku manyinga a diyala didi. Enu mwala ni kikuma.”
25 Mundu woso anga uvutwila: “O manyinga mê, ma kale kuthandu dyetu, ni kuthandu dya an’etu.”
26 Mwene anga u jituna Balabaji, maji watumu kubeta Jezú, yu wa mu bhana phala ku mu phaphela ku taka.*
27 O masoladi a nguvulu Pilatu, ambata Jezú ku inzo ya nguvulu, anga o kibuka kyoso kya masoladi ki mu kondoloka.
28 Kyazubha ku mu zula, a mu zwika divunga dya kusúka,
29 anga endi kitundu kya minya, ya a mu zwika nakyu ku mútwe, a mu tula mbangala bhu lukwaku lwê lwa kadilu. Anga a fukama bhu pholo yê ni ku mu sebhulula, exi: “Tana-ku, eye u Sobha ya Jijudé!”
30 Mu kiki, a mu phamena mathe, a mu tambula o mbangala, ya amateka ku mu beta nayu ku mútwe.
31 Kyazubha ku mu sebhulula, a mu katula o divunga, ya a mu zwika dingi o izwatu yê, anga a mwambata phala ku mu phaphela ku taka.*
32 Kyoso kyakexile mu tunda, atakana ni diyala a mwixana Ximá, mukwa Silene. Ene a mu jijidika kuya nawu, ni kwambata o taka.*
33 Kyoso kyabhixila bhu kididi akixana, Ngolongota, kilombolola Kididi kya Kiholongonyo.
34 A mu bhana vinyu yofunge ni ndundulu* phala kunwa, maji kya ilola, waditunu ku inwa.
35 Kyazubha ku mu phaphela ku taka,* ate jisólote phala kuwana o izwatu yê.
36 Anga akala kwenyóko, mu ku mu langidila.
37 Ene ate we kadibaya kuthandu dya mútwe wa Jezú, ni kizwelu kya ku mu tatela, exi: “Yú Jezú, o Sobha ya Jijudé.”
38 A phaphela we ifumbe iyadi ku jitaka, umoxi ku mbandu yê ya kadilu, o mukwá ku kyasu.
39 Oso akexile mu bhita, akexile mu mu sebhulula, ni kubhuka* o mítwe, exi:
40 “Eye weji bula o tembulu ya Nzambi, ni ku itunga mu izuwa itatu, dibhulule. Se u Mon’a Nzambi, tuluka ku taka!”*
41 Kyene we kimoxi, o akunji a makota ni jimesene ja kulonga o Kitumu ni adyakimi a mundu, amateka we ku mu sebhulula, exi:
42 “Mwene wabhulula athu engi, maji katena ku dibhulula! Abha ki mwene o Sobha ya Izalayele? Kiki-phe, atuluke kindala ku taka,* ni tu mu xikina!
43 Mwene wadyelela Nzambi, mu kiki-phe, Nzambi a mu bhulule, se wa mu wabhela. Mukonda wambe, wixi: ‘Eme ngi Mon’a Nzambi!”
44 Ni ifumbe we, a a phaphele-n’ê kumoxi ku jitaka, amateka ku mu sebhulula.
45 Tundé mu ola ya kasamanu,* o ixi yenyóyo ikala mwavundu katé mu ola ya kavwa.*
46 Mu kutula o ola ya kavwa, Jezú wadikola ni dízwi dya swina, wixi: “Eli, Eli, lama sabactâni?” Kiki kilombolola, “Nzambi yami, Nzambi yami, mukonda dyahi wa ngixisa?”
47 Amoxi akexile kwenyóko, kyoso kya mu ivu, ambe, exi: “O diyala didi, wa mu kwixana Elija.”
48 Umoxi mudyâ, ulenga ni lusolo ukwata xiponja, u ibonda mu vindangele, u ita ku kamuxi, anga u mu nwisa.
49 Maji a mukwá, a mwambela, exi: “Mwehyenu, ni tu mu mone se Elija wiza ku mu bhulula!”
50 Lwa mukwá dingi, Jezú udikola ni dízwi dya swina, anga ufwa.*
51 Mu kithangana kyenyókyo, o kulutina ya tembulu ya tanduka mu kaxi, tundé kuthandu katé ku lwiji, o ixi yatunguta, o matadi anga abaza.
52 O jimbila anga ji jikuka, o imbi ya jiselevende ja Nzambi ja fwile kyá ukulu yatundu
53 (kyoso kya fukununa Jezú, o athu atundu ku mbalale, a bokona mu mbanza ikôla), anga a i mona ku athu avulu.
54 Kyoso o kabhitangu ni masoladi akexile-nê kumoxi mu langidila Jezú, kya mono o kitungutu kya ixi ni yoso yabhiti, wôma wa akwata, anga ambe, exi: “Mu kidi, yú wexile mwene Mon’a Nzambi.”
55 Kwexile ahatu avulu akexile dikanga mu kutala yakexile mubhita. Ene akayela Jezú tundé mu Ngalileya, phala ku mu sidivila.
56 Bhukaxi kâ, bhwexile Madiya dya Manda, ni Madiya many’â Tiyaku ni Zuze, ni many’a an’a Nzebedewu.
57 Mu kutula mu ngoloxi, kweza diyala mvwama mukwá Dimateya, a mwixana Zuze. Mwene wexile we dixibulu dya Jezú.
58 Mwene anga uya kwa Pilatu, ubhinga o kimbi kya Jezú. Pilatu anga utuma ku mu bhana o kimbi.
59 Zuze anga ukatula o kimbi, u ki nyunga mu dilasola dya zele dya linyu ya fina,
60 anga u ki tula mu mbila yê, ya ubhe ya kandele mu ndanji. Anga ulundumuna kiditadi bhu mwelu wa mbila, yu wayé.
61 Maji Madiya dya Manda ni Madiya dya mukwá, axala kwenyóko bhu mbandu a mbila.
62 Mu kizuwa kya kayela, kya Sábhalu,* o akunji a makota ni jifalizewu a dyongeka ni Pilatu anga azwela, exi:
63 Ngana, twa lembalala kwila ka makutu yó kyakexile hanji ku mwenyu, wambele, wixi: “Mu kubhita izuwa itatu, nganda fukunuka.”
64 Mu kiki, tuma kulangidila o mbila katé mu kizuwa kya katatu, phala ki kibhite kwila o maxibulu mê eza mu munyana, n’a tangele o mundu kwila: ‘Mwene a mu fukununa mw’alunga!’ Se kiki kibhita, o makutu yâ anda kala kota, o adyangele ndenge.”
65 Pilatu-phe, wa atangela, wixi: “Ambatenu masoladi. Ndenu, mu langidile kyambote o mbila.”
66 Ene ayi, akolesa o ditadi, anga atuma o masoladi kulangidila o mbila.
Footnotes
^ Mba, “iphaka.”
^ Mba, “iphaka.”
^ Mba, “iphaka.”
^ Mba, “iphaka.”
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Kima kya lulu.
^ Tala o Dilombolwelu.
^ Mba, “kunyikisa.”
^ Tala o Dilombolwelu.
^ Tala o Dilombolwelu.
^ Kiki kilombolola, ku mediya.
^ Kiki kilombolola ku 15 kya ola.
^ Mu Ngel.: “u bhana o mwenyu wê.”
^ Mu Ngel.: “kya zubha o kizuwa kya ku pelepalala.”
