Kala Kyasoneka Matesu 28:1-20
28 Kyoso kyabhiti o kizuwa kya Sábhalu, kyamateka o kukya o kizuwa kya dyanga kya semana,* Madiya dya Manda ni Madiya dya mukwá, ayi mutala o mbila.
2 Kwa bhitile kitungutu kya ixi, mukonda o anju ya Jihova ya tulukile ku dyulu, i yeza, ya lundumuna o ditadi bhu mwelu wa mbila, anga ixikama ku ditadi.
3 O kidifwa kyê kyexile kala nzaji, o izwatu yê yazelele kala neve.
4 Mukonda dya wôma, o alangidi ateketa, edile kála afu.
5 O anju yatangela o ahatu: “Ki mu kale ni wôma! Mukonda eme ngejiya kwila, mwa mu sota Jezú, yó a mu jibha ku taka.*
6 Mwene kala bhabha, mukonda kála kya mi tangelele, mwene a mu fukununa. Zenu, mutale o kididi bhwa kexile.
7 Mu kiki, ndenu ni lusolo mwa kà tangele o maxibulu mê kwila, mwene a mu fukununa mw’alunga. Talesenu! Mwene wa mi twamenena ku Ngalileya, kwene ku mwanda mu mona. Ivwenu! Ngeza mu mi tangela o ima yiyi.”
8 Ene atunda bhu mbila, ni wôma ni kusanguluka kwa dikota, ya ayi mu tangela o maxibulu mê, yoso yabhiti.
9 Jezú-phe, watakana nawu, yu wa a ambela, wixi: “Nga mi menekena!” Ene a mu zukama, a mu kwata mu inama, anga a mu fukamena.*
10 Jezú wa atangela: “Ki mu kale ni wôma! Ndenu, mwa kà tangele o jiphange jami, phala aye ku Ngalileya, kwene kwanda ngi mona.”
11 Kyoso o ahatu kyexile hanji mu njila, amoxi ku alangidi, ayi mu mbanza, ya atangela o akunji a makota yoso yabhiti.
12 Kyoso o akunji a makota kyazubha ku dikunda ni adyakimi a mundu phala kumona se ihi yeji bhanga, ene abhana ku masoladi nzungule dya mabele* a phalata
13 ya a ambela, exi: “Muzwela, mwixi: ‘Mu usuku, kyoso ki twakexile mu zeka, o maxibulu mê eza, ya a mu nyana.’
14 Se o nguvulu u k’ivwa, twanda mu jimbulwila* o maka, enu ki mu bhingi ku tandanganya.”
15 Ene anga atambula o mabele* a phalata, ya abhange kala kya atendelesa. Mu kiki, o musoso yú wene mu di mwanga ku Jijudé joso, katé mu kizuwa kya lelu.
16 Kyenyiki, o dikwinyi ni umoxi dya maxibulu ayi ku Ngalileya, phala ku disanga ni Jezú ku mulundu wa atangelele.
17 Kyoso kya mu mono, a mu fukamena,* maji amoxi mudyâ, akala ni jiphata.
18 Jezú wazukama, anga wa atangela, wixi: “O kutena kwoso a ngi bhana-ku eme, ni mu dyulu ni mu ngongo.
19 Mu kiki-phe, ndenu mwa kà longe maxibulu ku akwá jixi joso, ni kwa batizala mu dijina dya Tata, ni dya Mona, ni dya nzumbi ikôla,
20 ni kwa longa kubelesela o ima yoso i nga mi tumu. Ijiyenu-kyu kwila, eme nganda kala ni enu izuwa yoso, katé ku dizubhilu dya mundu.”*
Footnotes
^ O kizuwa kiki, lelu twene mu kixana, Kya Lumingu. Kyexile o kizuwa kya dyanga kya semana phala o Jijudé.
^ Tala o Dilombolwelu.
^ Mba, “a mu ximana.”
^ Mba, “iphaka.”
^ Mu Ngel.: “ku xikinisa.”
^ Mba, “iphaka.”
^ Mba, “a mu ximana.”
^ Tala o Dilombolwelu.
