Kala Kyasoneka Matesu 5:1-48
-
O DISKULUSU KU MULUNDU (1-48)
-
Jezú umateka kulonga ku mulundu (1, 2)
-
Divwa dya ima izediwisa (3-12)
-
Mongwa ni mukengeji (13-16)
-
Jezú wanda kumbidila o Kijila (17-20)
-
Itendelesu yalungu ni kulanga o njinda (21-26), kuta phanda (27-30), kudisenga (31, 32), kuloka (33-37), kukamba kuvutwila phonzo (38-42), ni kuzola o jinguma (43-48)
-
5 Kyoso kyamono o mundu, mwene wabande ku mulundu. Kya xikama, o maxibulu mê a mu zukama.
2 Mwene anga wamateka o kuzwela ni kwa longa, wixi:
3 “Azediwa yó ejiya kwila abhindamena Nzambi,* mukonda o Utuminu wa dyulu wa atokala.
4 “Azediwa yó a dila, mukonda anda kwa konda o malamba.
5 “Azediwa yó alenduka, mukonda anda lundula o ixi.
6 “Azediwa yó ala ni nzala ni dinyota* dya ima yayuka ya Nzambi, mukonda anda kwikuta.
7 “Azediwa akwa henda, mukonda anda kwa kwatela henda.
8 “Azediwa yó azele o mixima, mukonda anda mona Nzambi.
9 “Azediwa yó asota o kutululuka,* mukonda anda kwa exana an’â Nzambi.
10 “Azediwa yó a mwa zukutisa mukonda dya kubhanga o ima yayuka, mukonda o Utuminu wa dyulu wa atokala.
11 “Mwa zediwa enu, kyoso kya mi lokalala ku athu ni ku mi zukutisa, kya mi tatela makutu, ni ku mi zwela ima yayibha mukonda dyami.
12 Tanenu-ku mu sanguluke, mukonda o futu yenu ku dyulu yadikota, kuma ni jipolofeta ja mi dyangele-ku kyene we kya a zukutisile.
13 “Enu mu môngwa wa ixi, se o môngwa ubhwa o kutowala kwê, kyebhi kyatena ku ubhana dingi o kutowala? Ki wala dingi ni valolo, kikale a u texi phala ku u dyota-dyota ku athu.
14 “Enu mu mukengeji wa ngongo. O mbanza yó tunge ku thala dya mulundu katena ku isweka.
15 O athu kya wika o kandeya kene mu ka futa mu kinda,* maji akatula ku thandu a meza, anga ka mwikina o athu oso ala m’onzo.
16 Kyene we kimoxi, mukengeji wenu u mwike bhu pholo ya athu, phala amone o ima yambote i mu bhanga, n’a ximane Tata yenu wala ku dyulu.
17 “Ki mu banze kwila, ngeza mu bhwisa o Kijila* mba o ulongelu wa Jipolofeta. Eme ki ngeza ku u bhwisa, maji ku u kumbidila.
18 Eme ngi mi tangela ni kidi kyoso kwila, dyulu ni ixi itena kujimuka, maji mu Kijila, né ngó o kakizwelu kofele-fele mba kambandu kakizwelu, ka kamba ku di kumbidila.
19 Kyenyiki, woso ubhukumukina kakitumu kofele ku Kijila, ni kubhangesa we akwâ ku ka bhukumukina, a kà mu ixana ndenge* mu Utuminu wa dyulu. Maji woso-phe u ka kumbidila ni ku ka longa, anda mwixana kota* mu Utuminu wa dyulu.
20 Mu kiki, ngi mi ambela kwila, se kuyuka kwenu ki kusomboka kwa jimesene ja kulonga o Kijila ni kwa Jifalizewu, ki mwanda tena kubokona mu Utuminu wa dyulu.
21 “Enu mwevu ya zwelele ku jikuku jenu, exi: ‘Kana kujibha mukwenu, maji woso ujibha mukwâ, wanda bhakula jikonda mu inzo ya kufundisa.’
22 Maji ngi mi ambela kwila, woso ukala jinga ni njinda ya phang’yê, wanda bhakula jikonda mu inzo ya kufundisa. O yó u sebhulula phang’yê, wanda bhakula jikonda mu Inzo ya Dikota ya Kufundisa. Woso-phe wamba phang’yê, wixi: ‘U kyôwa kya hatu!’ anda mu ta mu Njena* ya wama o túbhya.
23 “Mu kyenyiki, se wambata ujitu bhu kalatódyu, anga ulembalala kwila phang’yé wala ni maka n’eye,
24 ujitu wé xisa-u bhu pholo dya kalatódyu. Ndé u batule hanji o maka ni phang’yé, uvutuke kiwa, ubhane o ujitu wé.
25 “Lenguluka mu kubatula o maka ni nguma yé, kyoso ki wala hanji nê mu njila ya kuya mu inzo ya kufundisa, phala o nguma yé ka kubhane ku mufundixi, o mufundixi u kubhana ku kabhitangu, mwene anga u ku ta mu kaleya.
26 Maji ngi kutangela ni kidi kyoso kwila, o mwenyomo ki wanda tena kutunda-mu katé ki wanda futa o kakitadi ké ka suku-ko.*
27 “Enu mwevu kya zwelele m’ukulu exi: ‘Kana kuta phánda.’
28 Maji ngi mi ambela kwila, woso utonginina jinga muhatu anga ukala ni hânji ya kuzeka nê, wate-nê kyá phánda ku muxima.
29 Mu kiki, se dyesu dyé dya kadilu di kubhalesa, lokola-dyu u ditexi dikanga, mukonda kota kutexika kidyandu kimoxi, muveji dya mukutu wé woso ku utakula mu Njena.*
30 Kyene we kimoxi, se o lukwaku lwé lwa kadilu lu kubhalesa, batula-lu u lutexi dikanga. Mukonda kota o kutexika kidyandu kimoxi, muveji dya mukutu wé woso kuya mu Njena.*
31 “A kizwela we, exi: ‘Woso usenga o muhatu wê, a mu bhane o mukanda wa kusenga.’*
32 Maji-phe ngi mi ambela kwila, woso usenga muhatu wê mukonda dya kikuma kyéngi o kya undumbu* ki kyene, u mu bhangesa kukala mu kilwezu kya kuta phánda. O woso ukazala ni muhatu amusenge, uta phánda.
33 “Lwa mukwá dingi, enu mwevu ya zwelele ku jikuku jenu, exi: ‘Kana kulôka sé kukumbidila, maji kumbidila o ikanenu yé kwa Jihova.’
34 Maji ngi mi ambela: Kana kulôka mu kima kyoso-kyoso, kana kulokela o dyulu, kuma kyandu kya Nzambi,
35 né o ixi, kuma o kididi kya kutula o inama yê, né Jeluzaleme kuma yene o mbanza ya Sobha yadikota.
36 Kana kulokela o mútwe wé, mukonda kutena kubhangesa lundemba lumoxi kuzela mba kuxiketela.
37 Maji o kizwelu kyenu kya kwila kyene, kikale kyene, kana, kana, mukonda kima kyoso ki dibandekesa-ku kyatundu kwa Kadya-phemba.*
38 “Enu mwevu ya zwelele, kwila: ‘Dyesu mu dyesu, dizu mu dizu.’
39 Maji ngi mi ambela kwila: Kana kubhânga ni muthu wayibha, maji woso u kubhana huxi ku ditama dya kadilu, mu lungulwile we dya mukwá.
40 Se muthu umesena ku kwambata mu inzo ya kufundisa phala ku kutambula o kizwatu kyé, mwehele we o divunga dyé.
41 Se muthu wala ni ungana u ku jijidika kwambata kimbamba mu kilómetulu kimoxi, enda-nê jikilómetulu jiyadi.
42 Woso u kubhinga, mu bhane, kana kubhana dikunda kwa yó wamesena ku kusobha.*
43 “Enu mwevu ya zwelele kwila: ‘Mukwenu u mu zola, o nguma yé u mu zemba.’
44 Maji ngi mi ambela kwila: Zolenu o jinguma jenu, ni kusambela yó a mi zukutisa,
45 phala mu londekese kwila, mu an’â Tata yenu wene ku dyulu, kuma mwene mukwa kubhangesa o dikumbi* dyê ku mwikina athu ambote ni athu ayibha, utumikisa o mvula ku athu ayuka ni athu ayibha.
46 Mukonda se mu zola ngó o athu a mi zolo, futu yahi imwanda tambula? Ki kyene we kibhanga o akwa kutambula o lubhaku?
47 Abha se mu menekena ngó o jiphange jenu, o kwila mwabhange kima kya katunda? Manyi ki kyene we kyene mu bhanga o athu kejiya Nzambi?
48 Kyenyiki-phe, kalenu mu athu ayuka* kála kya yuka Tat’enu ya dyulu.
Footnotes
^ Mu Ngel.: “jingadyama mu nzumbi.”
^ Kiki kilombolola kumesena kyavulu.
^ Mba, “asota o paze.”
^ Mba, “kinda kya kuzongela.”
^ Kijila kya Mozé.
^ Kifwa, mwene ka fwama kubokona ku Utuminu.
^ Kifwa, mwene wa fwama kubokona ku Utuminu.
^ Kididi kya kexile bhu kanga dya mbanza ya Jeluzaleme, bhwene bhwa kexile mu toka o ixete. Tala o Dilombolwelu.
^ Mu Ngel.: “quadrante ya suku-ko.” Kakitadi mba kadibele ki kexile ni valolo yavulu.
^ Tala o Dilombolwelu.
^ Tala o Dilombolwelu.
^ Mu Ngeleku, o kizwelu kiki kilombolola o kudisenga kwa athu a kazala.
^ Mu Ngeleku, por·nei′a. Tala o Dilombolwelu.
^ Mba, “Satanaji.”
^ Kifwa, kusobha sé kukinga kutambula kibandekesu.
^ Mba, “mwanya.”
^ Mba, “tenena.”
