Mukanda wa Tiyaku 2:1-26
2 Phange jami jakazola, mu ku dikwatenena mu kixikanu kyenu kwa Ngana yetu yafuma Jezú Kidistu, o kwila mwene mulondekesa we katungu?
2 Se mu kyônge kyenu mubokona muthu wate jinela ja ulu ni izwatu yafuma, anga mubokona we ngadyama ni izwatu yaxidi,
3 o kwila enu mwanda xila ngó o muthu wate izwatu yafuma, ni kumutangela, mwixi: “Xikama bhabha bhu kididi kya fuma,” maji o ngadyama, mwixi: “Emana, mba, xikama bhoxi bhabha, bhu mbandu ya kididi kyakutula o inama yami”?
4 Se kiki kibhita mudyenu, mwa mu ditungula ni kwila mwakituka mu afundixi afundisa mu ukexilu wayibha.
5 Ivwenu jiphange jami ja kazola, Nzambi wasolo o athu a amona ku mundu kala jingadyama n’a kale jimvwama mu kixikanu, ni alundudi a Utuminu wakanena mwene kwa yó a muzolo.
6 Maji enu ki mwene muxila o jingadyama. O jimvwama ki ene, ene ku mitalesa hadi ni ku mikoka kujinzo ja kufundisa?
7 Ki ene ene muxidisa o dijina dyafuma dya mibhana Nzambi?
8 Se mwa mu kumbidila o Kijila kyabetakota, kala kyosoneke mu Mikanda Ikôla, exi: “Zola mukwenu kala ki wadizolo eye mwene,” mwa mubhanga kyambote.
9 Maji se mu suluka mu kulondekesa katungu, mwamuta kituxi, o kijila kimidikisa kwila, mu akwa kuxibhaka.
10 Mukonda se muthu utumaka o Kijila kyoso, maji uxibhaka kitumu kimoxi ku Kijila, mwene waxibhaka o Kijila kyoso.
11 Mukonda o Yó wambe wixi: “Kana kuta phánda,” wambe we wixi: “Kana kujibha mukwenu.” Kyenyiki, se eye ki wene muta phánda maji wene mujibha, wa bhukumukina o Kijila.
12 Kyenyiki, sulukenu mu kuzwela ni kubhanga o ima yoso kala mu athu anda kwafundisa bhukaxi ka Kijila kyatokala ku athu ala ni ufôlo.*
13 Mukonda woso ka londekesa o henda mu kufundisa kanda mulondekesa we henda, kuma o henda itolola o kufundisa.
14 Phange jami, phala ihi ngó o muthu kuzwela kwila wala ni kixikanu se mwene kalé ni ibhangelu yambote? O kwila o kixikanu kiki kitena ku mu bhulula?
15 Se sayi phange ya diyala mba ya muhatu wakambe izwatu,* mba kudya kwasoko phala o kizuwa kyoso,
16 anga mu mu tangela, mwixi: “Ndé ni kutululuka, usange izwatu ni kudya,” maji ki wamubhana o kima kyabhindamena phala o mukutu wê, kima kyahi ki mwabhange?
17 Kyene we kimoxi ni kixikanu, se kitubhange ima yambote, o kixikanu kyetu kyafu.
18 Maji sayi muthu wanda zwela, wixi: “Eye wala ni kixikanu, maji eme ngene mubhanga ima yambote. Ngilondekese o kixikanu kyé sé ima yambote iwene mubhanga, eme nganda kulondekesa o kixikanu kyami ni ima yambote i ngene mubhanga.”
19 O kwila uxikina kuma kwene ngó Nzambi imoxi? Se uxikina, kyawabha! Mukonda o madimonyo axikina we, ene ateketa ni wôma.
20 Eye u muthu wakime, wamesena kumona kyebhi o kixikanu sé ikalakalu yambote ki kyala ni valolo?
21 Mbalahamu Tat’etu ka mumono kwila muthu wayuka kyoso mwene kyazubhile kubhakula mon’ê Izake bhu kalatódyu?
22 Talesa kwila o kixikanu kyê, kya kalakala kumoxi ni ibhangelu yê. O kixikanu kya Mbalahamu kya yukile bhukaxi ka ibhangelu yê.
23 Kyenyiki, kya dikumbidila kyosoneke mu Mikanda Ikôla, exi: “Mbalahamu walondekesa kixikanu kwa Jihova, mukonda dya kiki, amumono kala muthu wayuka, mwene anga amwixana dikamba dya Jihova.
24 Mwamono kwila o muthu anda mumona kala muthu wayuka bhukaxi ka ikalakalu yê, kana ngó bhukaxi ka kixikanu kyê.
25 Kyene we kimoxi, o kidyanzunga Lahaba ka mumono we kala muthu wayuka bhukaxi ka ikalakalu yê, kyoso kyazubha kuzalela o alondi anga u asula mu kwatuma kuditela njila yengi?
26 Kala o mukutu sé mwenyu* wafu, o kixikanu sé ikalakalu kyafu we.
Footnotes
^ Mu Ngel.: “Kijila kya ufôlo.”
^ Mu Ngel.: “Se sayi phange ya diyala mba ya muhatu wala thuxi.”
^ Mu Ngel.: “nzumbi.”
