Mukanda wa Tiyaku 4:1-17
4 O kuzoka ni jimvunda jenu jene mutunda kwebhi? Kijene mutunda mu jihânji jenu jayibha jilwa ita moxi dyenu?*
2 Enu mu mesena kima maji kimwala nakyu. Enu mu kolokota mu ujibhânganga wenu ni kukwatela lwimbi ku ima ya akwenu, maji ki mutena kukala ni ima yenyiyi, mwa mukolokota mu kubhânga ni kulwa ita, o yoso i mwa bhindamena kimukala nayu mukonda mwakambe ku ibhinga kwa Nzambi.
3 Kyoso ki mubhinga kima kwa Nzambi, enu ki mu kitambula mukonda mu kibhinga phala kubhanga nakyu ima yayibha, phala mu suwe ngó o jihânji jenu ja xitu.
4 Enu mu akwa jiphanda, ki mwejiya kwila o ukamba ni mundu unguma ni Nzambi? Mu kyenyiki, woso wamesena kukala kamba dya mundu, udibhanga nguma ya Nzambi.
5 Inga mwafika kwila o Mikanda Ikôla izwela mukingoho kyoso kyamba kwila: “O nzumbi yala momwetu yezala ni jihânji jayibha”?
6 Maji o ngalasa ya Nzambi yabeta dingi kota o nzumbi yala momwetu ndenge. Mukonda dya kiki o mikanda ikôla yamba: “Nzambi ka sanguluka ni akwa kudizangeleka, maji ulondekesa o ngalasa yê ku athu alenduka.”
7 Kyenyiki, tumakenu Nzambi, maji zokenu ni Dyabhu, mwene wanda milenga.
8 Zukamenu kwa Nzambi, mwene wanda mi zukama we. Sukulenu o maku menu, enu mu akwa ituxi, zelesenu o mixima yenu, enu mu akwa jiphata.
9 Mu luwala, mudikwata mukôndo, dilenu. O jingolela jenu jibhiluke kudila, o kusanguluka kwenu kubhiluke malamba.
10 Ditolesyenu bhupholo ya Jihova, mwene anga wanda mi zangeleka.
11 Jiphange jami, kanenu kudizwela kyayibha mudyenu. Woso uzwela kyayibha kwa phang’yê mba umufundisa, wa mu bhukumukina o kijila, wamufundisa we o kijila. Mu kyenyiki, se ufundisa o kijila ki wa mu kitumaka maji wadibhange u mufundixi.
12 Kwala ngó muthu umoxi ubhana o Kijila, ni Mufundixi umoxi, yó wala ni kutena kwa kubhulula ni kubwikisa. Eye-phe, eye nanyi phala kufundisa mukwenu?
13 Kindala ivwenu, enu mwene muzwela, mwixi: “Lelu mba mungu, twandaya mu mbanza yoyó, twanda bhitamu muvu, twanda bhanga wenji ni kunganyala kitadi,”
14 sumbala enu kimwejiyenu kyebhi kyanda kala o mwenyu wenu mungu, mukonda enu mwa difwangana kala o mbundu imoneka mu kakithangana anga ijimuka kumesu.
15 Muveji dya kiki mwatokala muzwela, mwixi: “Se Jihova wa kyandala, twanda kala ku mwenyu, twanda bhanga kiki, ni kyokyo.”
16 Maji enu mu akwa ukumbu, mwene mu dizangeleka kyavulu, o kudizangeleka kuku kwayibha.
17 Mu kyenyiki, muthu woso wejiya kubhanga o mbote maji ka ibhange, wamuta kituxi.
Footnotes
^ Mu Ngel.: “mu idyandu yenu.”
