•  Izwelu Phala Kumateka 2

•  O Valolo ya Mak’â Nzambi 3-5

  •  Diskulusu 3

  •  Tokwesa Omilongi ya Bibidya 4

  •  Kitangelu Kya Bibidya 5

•  Kumbidila o Milongi Yiyi mu Ukunji Wé 6-14

  •  Kumateka Kuzwela ni Muthu 7

  •  Kukunda Dingi o Muthu 8

  •  Kubhanga Maxibulu 9

  •  Jimbulula o Kixikanu Kyé 10

  •  Diskulusu 11

  •  O Milongi Yala-mu 12

  •  Jindunge ja Kubhana Umbangi 13

  •  Kukalakala ni Jividyu ni Madivulu 14

•  Wendelu wa Ukidistá 15-16

  •  Milongi ya Bibidya mu Kilunga 16

•  Izwelu ya Sukina 17

•  Kuximana ni Kutendelesa 18

•  Kithangana 19

•  Semana ya Kafunga ka Ilunga 20

•  Semana ya Kyônge kya Ilunga mba Kyônge Kya Dikota 21

•  Semana ya Lembalasa 22

•  Mutwameni wa Kyônge Ukexilu Wetu ni Ukunji 23

•  Mwendexi wa Kyônge Ukexilu Wetu ni Ukunji 24

•  Mukwatekexi wa Kayadi wa Kubhana Jindunge ni Itendelesu 25

•  Maxilu a Mukwá 26

•  Jividyu 27

1. O itendelesu mu mukanda yú yanda kwatekesa oso anda kala ni mbandu mu Kyônge Ukexilu wa Ukidistá ni Ukunji Wetu. Oso anda kala ni mbandu, atokala ku ki bhanga kala kyala mu kamukanda Ukexilu Uetu ni Ukunji Milongi Phala o Yônge, ni mu mukanda yú ande dya kupelepalala o jimbandu jâ. Atokala kuswinisa o aboki oso kudibhakula ni kukala polondo phala kubhanga jimbandu. Athu a mukwá a mu dilunga ni kilunga atena wa kutambula mbandu mu xikola yiyi se axikina o ilongesu ya Bibidya ni kwila se a mukwenda kala kya fwamena kwenda o Jikidistá. O Mutwameni wa Kyônge Ukexilu Wetu ni Ukunji watokala kuzwela o itendelesu ku muthu ki muboki luwa, wamesena kubhanga mbandu ku xikola, se ihi yatokala kubhanga phala kubhanga o mbandu, mukusuluka watokala kumutangela se mwene wala kyá polondo mba kana. Watokala kubhanga kiki bhupholo ya muboki wa mu mulonga o Bibidya (mba bhu pholo ya ndandu kidistá). O itendelesu yene imoxi phala yó amesena kukala aboki ka abatizala luwa.—od kib. 8 kaxi 8.

2. Kithangana kimoxi. Semana joso kyoso ki bhwa o mwimbu ni musambu, o mwendexi wa kyônge Ukexilu Wetu ni Ukunji wanda lombolola bhofele o kyônge. O mwendexi watokala kukwata dingi ku jipondo janda beta kukwatekesa o kilunga.

 3. Diskulusu: Dikwinyi dya ithangana. O dyambu ni milongi nange yanda kala ni maba a yadi mba atatu yanda moneka mu kamukanda Ukexilu Wetu ni Ukunji Milongi Phala o Yônge. O diskulusu didi atokala ku dibhanga ku kafunga mba mukwatekexi wa tufunga wala ni uhete. Kyoso ki tu mateka kutanga divulu dya Bibidya mu kitangelu kya Bibidya kya semana, anda londekesa vidyu yanda lombolola o divulu dyenyidi. O mulongexi utena kulondekesa kyebhi o vidyu yalungu ni dyambu. Maji mwene watokala kulombolola o jipondo joso jala mu kamukanda. Se bhwala hanji kithangana mwene watokala kulombolola we o jifoto jala mu kamukanda ni jivelusu jimoneka kumoxi ni jifoto, mukonda joso jiji jalungu ni maka anda bhanga mwene. Mwene utena kubandekesa milongi yamukwa se o yene yanda kwatekesa kufwamesa o jipondo jabeta kota ja diskulusu.

 4. Tokwesa Omilongi ya Bibidya: Dikwinyi dya ithangana. Mbandu yiyi ibhwidisu ni itambwijilu, ki kubhingi kutumbula izwelu kudimatekenu né kudisukilu. Atokala ku ibhanga ku kafunga mba mukwatekexi wala ni uhete. O mulongexi watokala kubhanga o ibhwidisu iyadi. O kya mukwá, mwene watokala kutalesa kyambote se o jivelusu anda jitanga mba kana. O jiphange anda tambwijila atokala kuzwela mu 30 a twithangana mba ndenge.

 5. Kitangelu Kya Bibidya: Ithangana Iwana. O mbandu yiyi atokala ku ibhanga ku diyala. O dixibulu watokala kutanga o mbandu ya mubhana sé kumateka ni kuzubha ni izwelu yengi. O mwendexi wa kyônge watokala kukwatekesa o maxibulu kutanga ni kutongolola kyambote o maka, kutanga sé kubabajala, kulungulula kyambote o dízwi, kwimana mu ididi yatokala ni kuzwela mu ukexilu wê wa kuzwela. Kuma sayi ithangana o jivelusu jitola, ithangana yamukwa jivula, o mwendexi wa kyônge Ukexilu ni Ukunji Wetu watokala wijiya o uhete wa adilongi kyoso kyanda kwa abhana o jimbandu jiji.

6. Kwinyi ni kitanu kya ithangana. O mbandu yiyi ya kyônge, a ibhange phala kukwatekesa o aboki oso kudipelepalala kyambote phala kuya mu boka ni kubandekesa o uhete wâ wa kuboka ni kulonga o Mak’â Nzambi. Se kwa bhingi ni tufunga atena wa kubhanga mbandu ya maxibulu. O maxibulu atokala kukayela o pondo ya mbandu yâ imoneka mu kadivulu Kulonga mba Zol’o Athu, imoneka ni jiparenteze mu Ukexilu Wetu ni Ukunji Milongi Phala o Yônge. Sayi ithangana, mu kididi kya jindunge phala kubhana umbangi, andatamu mbandu phala kudikunda ni jingivwidi. O mbandu yiyi atokala ku ibhanga ku kafunga mba mukwatekexi wa tufunga.—Tanga o  kaxi 15 izwela yalungu ni jimbandu ni jingivwidi.

 7. Kumateka Kuzwela ni Muthu: O mbandu yiyi atokala ku i bhanga ku phange ya diyala mba ya muhatu. O mukwatekexi watokala ukala we diyala mba muhatu mba watokala u kala ndandu yê. O dixibulu ni mukwatekexi we atokala a xikama mba emana.—Phala kwijiya dingi yalungu ni milongi mba ni mbandu yiyi, tanga o  kaxi 12 ni  13.

 8. Kukunda Dingi o Muthu: O mbandu yiyi atokala ku ibhanga ku phange ya diyala mba ya muhatu. Se a ibhana ku diyala, o mukwatekexi wê watokala ukala we diyala. (km 5/97 mba. 2) O dixibulu ni mukwatekexi wê atokala a xikama mba emana. O dixibulu watokala kulondekesa se ihi yatokala kuzwela kyoso kyamukunda muthu mu kusuluka ni maka a zwelele kyá.—Phala kwijiya dingi yalungu ni milongi mba ni mbandu yiyi, tanga o  kaxi 12 ni  13.

 9. Kubhanga Maxibulu: O mbandu yiyi atokala ku ibhanga ku phange ya diyala mba ya muhatu. Se a ibhana ku diyala, o mukwatekexi wê watokala ukala we diyala. (km 5/97 mba. 2) O dixibulu ni mukwatekexi wê atokala a xikama mba emana. O mbandu atokala ku ibhanga mu ukexilu ulondekesa kwila a mateka kyá o kudilonga. Ki kubhingi kutumbula izwelu yengi ku dimatekenu né ku disukilu, o dixibulu u bhanga ngó kiki se o pondo yatambula ya mu mubhinga kubhanga kiki. Ki kubhingi we kutanga o maka oso, o maxibulu éne ejiya se anda kibhanga mba kana.

 10. Jimbulula o Kixikanu Kyé: Kyoso o mbandu yiyi imoneka kala diskulusu, o watokala kubhanga o mbandu watokala kukala diyala. Kyoso ki imoneka kala kifika, atena ku ibhana ku phange ya diyala mba ya muhatu. O mukwatekexi watokala u kala we diyala mba muhatu mba watokala u kala ndandu yê. O dixibulu watokala kujimbulula kyambote o maka ni kubhebhuluka kwoso, ni kutambwijila o kibhwidisu ni masunga mu kukayela o milongi ya kadivulu. Mukubhanga o mbandu yê, o dixibulu mwéne usola se wanda tumbula o kadivulu mwamutunda o milongi mba kana.

 11. Diskulusu: Mbandu yiyi atokala ku ibhanga ku phange ya diyala, watokala ku ibhanga mu ukexilu wa diskulusu phala o kilunga. Se o milongi ya diskulusu yatundu ku kibandekesu A ya kadivulu Zol’o Athu, o dixibulu watokala kujimbulula kyebhi o velusu mba o jivelusu atena kukalakala naju mu ukunji. Mu kifika, mwene utena kujimbulula se kithangana kyebhi kitutena kutanga o velusu ni kyebhi ki tutena kuzwela o maka enyá ni muthu. Se o diskulusu dyalungu ni pondo ya disá dimoxi dya kadivulu Zol’o Athu, o dixibulu watokala kudikwatenena se kyebhi kitena kukumbidila o pondo yiyi mu kuboka. Mwene utena kujimbulula o kifika kimoneka mu pondo 1 ya disá mba kujimbulula velusu yengi imoneka mu disá, se yene yanda kwatekesa.

   12. O Milongi Yala-mu: O milongi imoneka mu kaxi kaka ni yakayela yalungu ni mbandu “Kumateka Kuzwela ni Muthu” ni “Kukunda Dingi o Muthu.” Se kikwala kitendelesu kyengi, mu mbandu yiyi o dixibulu watokala kuzwela kidi kya Bibidya kyanda kwatekesa o muthu wamuzwela nê ni kuzwela maka mba ku muxisa kibhwidisu phala o veji yamukwa imwanda zwela. O dixibulu utena kusola diba mba maka awabha, a fwama phala o athu mu dyembu dyê. Mwene utena kusola se wanda bhana divulu mba kana, mba se wanda londekesa vidyu ibhanga mbandu ku Jifalamenda ja Kulonga mba kana. Katokala kubhanga o mbandu yiyi kala kifika kyo pelepalale kyá, o maxibulu atokala kudikwatenena mu kuzwela kala kyene muzwela mu kizuwa ni kizuwa ni kulondekesa kwila a suwa o athu.

   13. Jindunge ja Kubhana Umbangi: O dixibulu watokala kubhanga o mbandu kala kya fwama mu dyembu dyê. Mu kifika:

1.  (1) Nzo ni Inzo: o mbandu yiyi yalungu ni kuboka nzo ni inzo—kikale pholo ni pholo, bhukaxi ka mutelembe wa kafwetele mba bhukaxi ka mukanda—ni kukunda dingi o muthu mu kusuluka mu kuzwela o maka azwelele kyá kyoso ki wamubhanene umbangi mu kuboka nzo ni inzo.

2.  (2) Kubhana umbangi Kyoso Kikumoneka Kithangana: O mbandu yiyi yalungu ni kubhangesa kwila o ima imwamuzwela, ku disukilu ikituke umbangi. Kyalungu ni kutanga velusu ni koleka ya salu, ya xikola, jivizinyu, kubhana umbangi ku maximba mba kyoso ki uya ni kubhanga o ima ya kizuwa ni kizuwa.

3.  (3) Kuboka mu Kikoka: Mu mbandu yiyi nange kwanda lunga ni kuboka ni kadikalu ka madivulu, kuboka ku athu mu ithanda mba mu maloja, kuboka mu kikoka, mu ididi mubhongolokela o athu mba mu ididi mu tutena kusanga o athu.

 14. Kukalakala ni Jividyu ni Madivulu: O dixibulu mwéne usola se wanda londekesa vidyu mba se wanda bhana kadivulu. Se mu mbandu yiyi atumbula-ku vidyu, mba se o dixibulu usola kutumbula vidyu, mwene watokala kuzwela yalungu ni vidyu maji katokala ku ixika.

15. Kyoso kyanda bhwa o mwimbu, o mbandu yakayela ya 15 ya ithangana yalungu ni mbandu imoxi mba jiyadi jatokala phala kukwatekesa o jingivwidi kukumbidila o Mak’â Nzambi. Se ka tange kima, o mbandu yiyi atokala ku ibhanga ku tufunga mba akwatekexi a tufunga ala ni uhete, maji o mbandu yalungu ni ibhindamu ya kilunga atokala ku ibhanga ngó ku kafunga. Se kumoneka mbandu ni jingivwidi, o muthu wandakwendesa o mbandu yeniyi utena kubhanga ibhwidisu yakamukwa phala kulombolola o jipondo jabetakota jala mu mbandu. Ku dimatekenu mwene katokala kuzwela kyavulu, mukonda watokala kuxisa kithangana kyasoko phala kujimbulula o jipondo jabeta kota ni kweha we o jingivwidi kuzwela. Se anda kwibhwidisa muthu, kima kyambote se o muthu amumubhanga o ibhwidisu ukala mu ditala mu veji dya kukala mu kididi bhwa xikama.

  16. Milongi ya Bibidya mu Kilunga: Makwinyi atatu a ithangana. O mbandu yiyi atokala ku ibhanga ku kafunga wala ni uhete. (Mu ilunga mwa kambe tufunga twavulu, atena kusola akwatekexi a longa kyambote phala kubhanga o mbandu yiyi.) O kibuka kya tufunga kya tokala kusola se mudyâ nanyi watokala kwendesa o Milongi ya Bibidya mu Kilunga. Oso yó anda kwa sola, atokala kwendesa kyambote o milongi, ku ibhanga mu kithangana kya xindi, kulombolola kyambote o jivelusu jabeta kota ni kukwatekesa athu oso mu kyônge kumona o valolo ya maka a mu kwivwa. Ene atena kutanga dingi o itendelesu yalungu ni kwendesa mbandu yala ni ibhwidisu ni itambwijilu. (w23.04 mban. 24, kaxa) Se jimbandu joso jasemana jabhu kyá, kikubhingi dingi kusuluka ni kuzwela. Se ki bhana, kala semana solenu mwendexi umoxi ni mutangi umoxi. Se o mwendexi wa kyônge Ukexilu Wetu ni Ukunji u tu bhinga phala tu butise o mbandu, mu kiki, o phange wa mu kwendesa o Milongi ya Bibidya mwéne wejiya kyebhi kyanda bhanga phala kusosolola o mbandu. Nange sayi jikaxi, mwene watokala kubhanga ngó o kibhwidisu sé ku ji tanga dingi.

17. Ithangana itatu. O mwendexi wa kyônge Ukexilu Wetu ni Ukunji, wanda bhitulula jipondo jabeta kota ja kyônge. Mwene watokala we kutanga jipondo ja kyônge kya semana iza-mu. Se kwala hanji kithangana, utena we kulembalesa o maxibulu anda bhanga mbandu mu semana yanda kayela. Mu ilombwelelu yê yasukina yalungu ni kyônge, o mwendexi utena kutanga jingolokela joso-joso, mba kutanga mukanda. Maji ima kala kyebhi kya tokala kuboka, kuxixila, ka tokala ku i tanga ku ditala, mu i ta mu kididi kya jingolokela. Se o kithangana mu mbandu izwelu ya sukina ki kyanda soka phala kutanga o jingolokela mba mikanda, mu kiki o mwendexi wa kyônge watokala kubhinga ku jiphange jala ni mbandu mu Wendelu wa Ukidistá phala kuxisa-ku twithangana. (Tanga o  kaxi 16 ni  19.) O kyônge ki suka ni mwimbu ni musambu.

18. Kyoso kala dixibulu kyanda zubha kubhanga o mbandu yê, o mwendexi wa kyônge Ukexilu Wetu ni Ukunji wala ni kithangana kimoxi phala kuximana ni kubhana milongi bhu kaxi ka pondo ya kudilonga yatambula o dixibulu. Kyoso o mwendexi kyanda kwixana o dixibulu, mwene ka tokala kutanga o pondo yanda kumbidila o dixibulu mu kubhanga o mbandu yê. Maji kyoso o dixibulu kyanda zubha kubhanga o mbandu yê ni kyoso kyanda mu ximana, o mwendexi watokala kuzwela o pondo ya kumbidila o dixibulu ni kulondekesa we se mukonda dyahi o dixibulu waditundu kyambote. Ni henda yoso, zwela we se mukonda dyahi o dixibulu watokala kubhanga nguzu phala kukumbidila o pondo yenyoyo. O mwendexi utena we kuximana o dixibulu mu ima ya mukwá yambote yabhange mwene mu kifika, se wamono kwila kuzwela o ima yiyi kwanda kwatekesa o dixibulu mba o jingivwidi. Se o dixibulu wabhingi dingi kikuatekesu, a tena ku mu bhana mu kaswekele ku disukilu dya kyônge mba mu kithangana kyengi kikale se mu pondo yenyoyo mba pondo yamukwá yalungu ni kuzwela, a mu kwatekesa bhu kaxi ka kadivulu Zol’o Athu, o kadivulu Kulonga mba o divulu Escola do Ministério.—Phala kwijiya o kikalakalu kya mwendexi wa kyônge Ukexilu Wetu ni Ukunji ni kikalakalu kya mukwatekexi wa kayadi, tanga o  kaxi 19,  24, ni  25.

19. Sé-ku mbandu yatokala kubhita o kithangana kyê, né mwene o izwelu ya mwendexi wa kyônge Ukexilu Wetu ni Ukunji. Sumbala o kamukanda Ukexilu Wetu ni Ukunji Milongi Phala o Yônge ixinda kya o kithangana kya jimbandu, se wazubha kya kuzwela o milongi yoso ya mbandu, kikubhingi kubandekasa-ku milongi yengi né mwene se wazubha ande dya kithangana kyóxinde. Se o jiphange a bhange o jimbandu a bhita o kithangana kyâ, o mwendexi wa kyônge Ukexilu Wetu ni Ukunji mba o mukwatekexi wa kayadi watokala kwa exana mu kaswekele phala kwa bhana itendelesu ni jindunge. (Tanga o  kaxi 24 ni  25.) O kyônge kyoso, ni mimbu ni misambu kya tokala kubhanga ola 1 ni 45 a ithangana.

20. Se o kafunga ka ilunga wa mu kunda o kilunga, o kyônge atokala ku kibhanga kala kyala mu kamukanda Ukexilu Wetu ni Ukunji Milongi Phala o Yônge, o jimbandu ka tokala ku ji bhanga, jenyiji: Milongi ya Bibidya mu Kilunga mu mbandu Wendelu wa Ukidistá, o mbandu yiyi anda ibhingana ku diskulusu dya 30 a ithangana, dyanda bhanga o kafunga ka ilunga. Ande dya diskulusu, o mwendexi wa kyônge Ukexilu Wetu ni Ukunji wanda bhitulula o kyônge ni kuzwela jipondo ja semana yanda kayela, se kwala mikanda, wanda i tanga, kyene ngó kyanda kwixana o kafunga ka ilunga. Kyoso kyanda bhanga o diskulusu, o kafunga ka ilunga wanda sukisa o kyônge ni mwimbu wasolo mwéne. Mwene utena kwixana muthu wengi phala kubhanga o musambu wasukina. Se o kilunga kyala ni maxilu amukwá, mu semana kyoso o kafunga ka ilunga kyanda kala mu kilunga, ene oso atokala kukala kumoxi ni kilunga. O kibuka kitena kubhanga yônge yâ né mwene kyoso o kafunga ka ilunga kya mu kunda o kilunga kya mu mu tambula konda (congregação anfitriã). Maji o kibuka kiki kya tokala kukala kumoxi ni kilunga phala kwivwa o diskulusu dya sidivisu dyanda bhanga o kafunga ka ilunga.

21. Mu semana ya kyônge kya ilunga mba kyônge kya dikota, o kilunga ki kyanda bhanga kyônge. O milongi ya kyônge mu jisemana jiji, o jiphange atokala kudilonga na-yu ene ubheka mba ni mwiji.

22. Se o Lembalasa yanda bhita mu kaxi ka semana, ka tokala kubhanga o kyônge Ukexilu Wetu ni Ukunji.

23. Kafunga a mu solo kwala o kibuka kya tufunga, wanda kalakala kala mutwameni wa kyônge Ukexilu Wetu ni Ukunji. O kikalakalu kyê, o kuyudika kyambote o kyônge ni kumona se a mu ki bhanga kála kya tokala. Mwene ni mukwatekexi wa kayadi atokala kudizwelesa kyambote. Kyoso o kilunga kyanda tambula o kamukanda ka mbeji Ukexilu Wetu ni Ukunji Milongi Phala o Yônge, o mutwameni wa kyônge Ukexilu Wetu ni Ukunji, watokala kubhana o jimbandu joso ja kyônge kya kaxi ka semana phala o jimbeji jiyadi. Kifwa katé ni jimbandu ki jalungu ni maxibulu mwene watokala kusola woso wanda jibhanga, watokala kusola we o endexi a kyônge kya kaxi ka semana ku yâ a asolo kwala o kibuka kya tufunga, watokala kusola we o maxibulu anda bhanga o jimbandu. (Tanga o  kaxi 3-16 ni  24.) Mu kusola o athu anda bhanga o jimbandu ja maxibulu, mwene watokala kuxinganeka mu kitala kya muthu, o uhete wê, ni kwila se wanda tena kuzwela ni kidi kyoso, ni muxima woso o maka. Kyene we kyatokala kubhanga mu kusola o athu anda bhanga o jimbandu jamukwá. Kala mbandu atokala ku i bhana semana jitatu ande dya kubhixila o kizuwa kyanda bhanga o mbandu. O kamukanda Ketu ka Kyônge Ukexilu Wetu ni Ukunji (S-89) atokala kukalakala naku phala kubhanga o jimbandu ku maxibulu. O mutwameni wa Kyônge Ukexilu Wetu ni Ukunji watokala kubhanga yoso phala o minangu ya jimbandu ja kyônge kyoso kikala mu kididi kya jingolokela. O kibuka kya tufunga atena kusola kafunga kengi mba mukwatekexi wa tufunga phala kumukwatekesa. Maji o tufunga éne ngo atokala kusola woso wandabhanga o jimbandu ki jalungu ni maxibulu.

24. Kala semana, kafunga kamoxi kanda sidivila kala mwendexi wa Kyônge Ukexilu Wetu ni Ukunji katé ku disukilu. (Se o tufunga mu kilunga twa tolo, atena kusola akwatekexi ala ni uhete phala kubhanga o mbandu yiyi.) Mwéne wanda pelepalala o izwelu yê phala kumateka ni kuzubha o kyônge. Mwéne we wanda kwixana oso anda bhanga mbandu; se ki mwala tufunga twavulu, mwene utena we kubhanga jimbandu mu kyônge bengebenge o jimbandu jalungu ni kulondekesa ngó vidyu sé kubhanga ibhwidisu ku jingivwidi. Kala mbandu kyoso ki ibhwa, o mwendexi wa kyônge, ka tokala kuzwela kyavulu. O kibuka kya tufunga éne a mona o tufunga atena kubhanga o kikalakalu kiki. O tufunga a a solo, a sidivila kála endexi a kyônge. Se ki bhana, o mutwameni wa kyônge Ukexilu Wetu ni Ukunji, atena ku mu sola phala kukala mwendexi wa kyônge mu veji javulu, tufunga twa mukwá ndenge. Se kafunga utena kwendesa o mbandu Milongi ya Bibidya mu Kilunga, mwene utena we kusidivila kala mwendexi wa kyônge. Maji twa kudyóndo, ijiya kwila o kafunga wa mu sidivila kala mwendexi wa kyônge, watokala kukwatekesa ni kuximana ni henda yoso o maxibulu a bhanga mbandu mu kyônge. O mwendexi wala we ni kikalakalu kya kubhangesa kwila o kyônge ki zubha mu ola yatokala. (Tanga o  kaxi 17 ni  19.) Se o mwendexi wa mesena ni kwila sayi kididi kyavulu, atena kuta dilaka dyamukwa bhu ditala phala kyoso mwene kyanda kala mu kwixana o phange wanda bhanga o mbandu, o phange mwenyú u kala kyá bhu ditala. Kyene kimoxi we, o mwendexi se wa mesena utena kuxikama ku meza bhu ditala kyoso o maxibulu kyanda bhanga o jimbandu, kala o kitangelu kya Bibidya ni mbandu Kumbidila o Milongi Yiyi mu Ukunji Wê. Kubhanga kiki, kwanda kwatekesa kusumba kithangana.

25. Se ki bhana, kima kyambote kusola kafunga hete mu kulonga phala kubhanga o kikalakalu kiki. O kikalakalu kya mukwatekexi wa kayadi, o kukwatekesa mu kaswekele, se kibhana, o tufunga ni akwatekexi a tufunga mu ukexilu wâ wa kulonga mba kubhanga o jimbandu jâ, katé mwene o jimbandu mu kyônge Ukexilu Wetu ni Ukunji, madiskulusu a katunda, kutanga ni kwendesa o Milongi ya Mulangidi, ni Milongi ya Bibidya mu Kilunga. (Tanga o  kaxi 19.) Se mu kilunga mwala tufunga twavulu jihete mu kuzwela ni kulonga, kafunga kamoxi utena kusidivila kála mukwatekexi wa kayadi wa kubhana jindunge ni itendelesu muvu umoxi. O mukwatekexi wa kayadi, ka bhingi kubhana ndunge mba itendelesu mu kithangana kyoso o phange kya zubha kubhanga o mbandu yê.

26. Se sayi maxibulu avulu, o kilunga ki tena kukala ni maxilu a mukwá phala kubhanga-mu o jimbandu ja maxibulu. Kala dixilu mwa tokala kukala-ku kafunga kamoxi phala kubhana milongi. Se ki mwala tufunga twavulu, mukwatekexi wa tufunga utena kubhanga o kikalakalu kiki. O kibuka kya tufunga atokala kusola o mukwatekexi wala ni uhete phala o kikalakalu kiki ni kumona we se atena kuya ni kubhinganesa o muthu yú inga kana. Oso anda mu sola phala kubhanga o kikalakalu kiki, watokala kukayela o itendelesu i tu sanga mu kaxi  kaxi ka 18. Se kwala dixilu dya mukuá, mu kiki-phe o maxibulu atokala kwa tangela phala kuya-mu kyoso kyanda bhita o mbandu Tokwesa Omilongi ya Bibidya mu mbandu ya kyônge O Valolo ya Mak’â Nzambi. O maxibulu atokala kuvutuka kudibunda ni jiphange ja mukwá mu kilunga, kyoso kyanda bhita o jimbandu jâ.

27. Anda sola jividyu jalungu ni kyônge kiki. O jividyu ja kaxi ka semana janda kala mu falamenda JW Library®, falamenda yiyi atena ku i jikula mu mitelembe yavulu.

© 2023 Watch Tower Bible and Tract Society of Pennsylvania

S-38-KIM 11/23