Kia Tersa, mu kizuua kia 11 kia Kasamanu, Jikidistá javulu a bhuila mu nzumbi a-ndaia mu Lembalasa. Ene akexile mu njila ia kutambula o muenhu, maji a bhuila mukonda dia ima iavulu, o ima ienii a i jimbulula kiambote mu kadivulu Vutuka Kua Jihova. (Jih 12:1) Maji né kiki, o athu a bhuila mu nzumbi ala hanji ni valolo phala Jihova, mukonda ua a sumbu ue ni manhinga a Mon’ê. (Ik 20:28; 1Ph 1:18, 19) Kiebhi ki tu tena ku a kuatekesa kuvutuka mu kilunga?

O tufunga mu ilunga a sota kubhanga ioso phala kukuatekesa o Jikidistá a bhuila mu nzumbi, kála kia bhanga o mubhidi ua jimbudi kia sota o kambudi ka jimbidila mba ua sondoloka ku ibhaku. (Lu 15:4-7) Kiki kilondekesa o henda ia Jihova. (Je 23:3, 4) Ko tufunga ngó, etu enioso tu tena ku a suinisa. Jihova u sanguluka kiavulu kioso ki tu bhanga nguzu phala kulondekesa o henda, tu tambula mabesá. (Ji 19:17; Ik 20:35) Mukonda dia kiki, xinganeka nanhi u tena ku mu suinisa, ni kubhanga kiki sé kulaleka!

TALA O VIDIU SUINISA IÓ A BHUILA MU NZUMBI, MU KUSUKA-KU TAMBUIJILA O IBHUIDISU IA KAIELA:

• Ku dimatekenu ihi ia bhange Abbey kioso kia sange muthu uexile Mbangi ia Jihova maji ka di ijidile?

• Mukonda diahi tua tokala kuzuela ni tufunga, se tua mesena kukuatekesa muthu ua bhuila mu nzumbi?

• Kiebhi Abbey kia disokejeka phala kukunda Laura mu veji ia kaiiadi?

• Kiebhi Abbey kia londekesa kusuina, muanhu, ni henda mu ioso ia kexile mu bhanga phala kusuinisa Laura?

• Ihi i tu tena kudilonga mu kifika kia Jezú, ki tu sanga mu divulu dia Luka 15:8-10?

• Mabesá ebhi a tambula Abbey mu nguzu ioso ia bhange phala kukuatekesa Laura?