Jezú wa tendelesa o akayedy’ê kuya ni kubhanga maxibulu. (Mat 28:19) Phala kubhanga kiki kubhinga kuboka ni kulonga. Mu ithangana yoso twa tokala ku dibhwidisa, ‘Kyebhi ki ngi tena kubandekesa dingi o uhete wami mu kikalakalu kiki kya kubhanga maxibulu?’

Mu veji dya ku kingila kwila o athu ene a tu sanga, twa tokala ni kuswina kwoso kusota oso ‘akwá ujitu’ (Mat 10:11) Kyoso ki twa mu boka, o kwila twene mu katula mbote mu ithangana yoso, phala kuzwela ni ‘athu oso u tu takana na-wu?’ (Ik 17:17) Lidya wa kituka dixibulu mukonda dya kuswina kwa poxolo Phawlu mu kuboka.—Ik 16:13-15.

TALA O VIDYU KOLOKOTA “KUBOKA SÉ KUFULA”—KYOSO KI KU MONEKA KITHANGANA NI MU KUBOKA NZO NI INZO, MU KUSULUKA TAMBWIJILA O IBHWIDISU YA KAYELA:

• Mu kizuwa ni kizuwa, kyebhi Samuwele kya londekesa kwila wa kexile mu sota kutula o kidi ku athu?

• Mukonda dyahi twa tokala kukolokota mu kuboka mu mawkexilu oso a kuboka?

• Wa mesena kutudila o njimbu ya Utuminu mu kizuwa ni kizuwa kwa nanyi?

Phala kubhanga maxibulu ki kubhingi ngó kuxisa madivulu ku athu. Phala kwa kwatekesa kukula mu nzumbi, twa tokala kwa kunda ni kwa longa o Bibidya. (1Ko 3:6-9) Ihi i twa-nda bhanga se tu mona kwila athu ofele ngó a mu xikina né mwene ni nguzu yoso i tu bhanga mu kuboka? (Mat 13:19-22) Twa tokala kusuluka mu kusota yó ala ni muxima kála “mavu ma mbote.”—Mat 13:23; Ik 13:48.

TALA O VIDYU KOLOKOTA “KUBOKA SÉ KUFULA”—MU IDIDI MU BHITA ATHU AVULU NI MU KUBHANGA MAXIBULU, MU KUSULUKA TAMBWIJILA O IBHWIDISU YA KAYELA:

• Kyebhi Solomá ni Madiya, kya tudila o kidi kya Bibidya ku muxima wa Izekiyele ni Abingayíle?

• Ihi i twa tokala o kubhanga kyoso ki tu boka mu mawkexilu oso a kuboka katé mwene mu ididi mu bhita athu avulu?

• Kyebhi ki tu tena kutumbula o jipondo jya beta-o-kota mu kulonga o kidi ku athu ni ji tule ku mixima yâ?