O mavuwa amukala kyá kima kya kizuwa ni kizuwa mukonda amudibandekesa dingi. Kyoso kikubhita divuwa, o kikwatekesu kyabhana kyabhingi ku isokejeka kyambote ni kuyendekesa mu ukexilu watokala. Mukonda dya kiki o Kibuka Kya Utuminu kyasolo kubhanga ku Jifiliyale joso o Departamento mba Kibuka Kikwatekesa o Jiphange Abhita mu Mavuwa.

Kyoso o jiphange jatokala mu kibuka kiki kyakwatekesa o jiphange abhita mu mavuwa, kyatonginina kwila sayi divuwa, ene axinda ni lusolo lwoso kutufunga atokala mu kididi mwabhiti o divuwa phala kwijiya se kikwatekesu kyahi kyandabhindamena o aboki. Se o aboki atokala mu mbambe yiyi katena kudibhana ni divuwa dyodyo, o Betele yandasola jiphange ala ni uhete phala kukwatekesa o jiphange abhiti mu divuwa. O jiphange jiji, atena kubhinga kikwatekesu kya jiphange adibhakula mba kima kyabhindamena o jiphange abhiti mu divuwa. O kyamukwa we, ene nange atena kusumba o ima ni kuwanena o jiphange jiji abhiti mu divuwa.

Kubhanga o ima mu ukexilu yú kubhangesa o ima kuditunda kyambote. Mukifika, kitwanda kalakala luyadi, kitwanda bhanga kavwanza, kitwanda botesa o kitadi kyetu, imbamba ni ima ibhita kyoso o jiphange kyasota kubhanga o ima mu ukexilu wâ.

O jiphange asolo ku Betele ene atena kusola se kitadi kikuxi ni athu akuxi abhingi phala kubhana o kikwatekesu kyatokala. Ene atena kudizwelesa ni yó ala kupholo dya mbanza mwabhiti o divuwa, muveji javulu ene akwatekesa o ima kwenda dingi ni lusolo. Kyenyikiphe, kana kutwama kubhongolola kitadi mudyé, kutumikisa kudya mba kuya mu kididi mwa bhiti o divuwa, katuku se akubhinga kubhanga kiki.

Maji mukidi, kyoso kikumoneka divuwa etu tumesena kukwatekesa. (Jih 13:16) Etu twazolo o jiphange! Ihi itwatokala kubhanga? O kima kyabeta kota o kusambela o jiphange abhiti mu mavuwa ni yó amukwatekesa. O kyamukwa we tutena kusangela kitadi phala o kikalakalu kumundu woso. Ni kitendelesu kya Kimbandi Kya Fiyele ni kya filiyale ene asola kyebhi kyanda ngastala o kitadi mu ukexilu watokala kyambote. Se eye wamesena kukwatekesa, watokala kudibhakula, kusoneka o Petição para Voluntário do Departamento Local de Projeto/Construção (DC-50).

TALA O VIDYU DIVUWA KU IXI YA BRAZIL, MUKUSULUKA TAMBWIJILA O IBHWIDISU YAKAYELA:

Kima kyahi kiwamono mu vidyu kyakutula kumuxima mu kikalakalu kyabhange o Jimbangi ja Jihova kumuvu wa 2020 ku Brasil kya kukwatekesa yó abhita mu mavuwa?