Xinganeka kuila, uala mu Ngalileia mu izuua ia Jezú. Eie uende njila ia lebha katé ku Jeluzaleme, mu Fesa ia Jibalaka. O mbanza iezala mba ia tunguta ni abhezi amukuá a tundu makanga a mu kunda o mbanza. Eie ua mesena kubhana sata kua Jihova. Eie uala ni hombo bhu mukolo, u mateka kuenda njila tundé ku mbanza ndu mu tembulu. Kioso ki u bhixila mu tembulu, u i sanga iezala ni athu amukuá a mesena ue kubhana jisata. Mu kusuka-ku, o kithangana kié kia kubhana o hombo ku mukunji, kia bhixila. Mu kithangana kienhiki, u lembalala kuila, phangi’é uala bhu kaxi ka mundu mba mu mbanza ua luuala n’eie. Jezú ua jimbulula ihi i ua tokala kubhanga. (Tanga Matesu 5:24.) Kiebhi eie ni phangi’é ua luuala n’eie, mu tena kusota o paze, kala kia tendelesa Jezú? Mu jipondo jala ku luiji, xinda o itambuijilu ia tokala.

EIE U TENA . . .

• kuzuela ngó ni phangi’é se u mona kuila, muene ua lungu mu kuluuala kuê

• ku mu kuatekesa kulungulula o ibanzelu iê, se u mona kuila, phangi’é mukua kuluuala ni lusolo, mba-phe xikina kuila, uala ue ni kikuma

• kuivuidila ni muanhu uoso, ihi ia mu zuela phangi’é ni kiebhi kia mu dívua, bhinga muloloki ni muxima uoso, mu ima i ua bhange, né muene se ku tendela kiambote o maka

PHANGI’É U TENA . . .

• kusota kikuatekesu ku jiphange mu kilunga, mu ku a tangela o kima kia iibha ki ua mu bhange

• ku kubazela; ku kulembalesa o ima ioso ia iibha i ua mu bhange, ni ku ku bhangesa kuxikina kuila ua tondala

• kuxinganeka mu kulenduka ni nguzu i ua bhange phala kuzuela-nê, ni ku ku loloka ni muxima uoso

Sumbala o ubhezelu uetu lelu ki u bhingi dingi kusatela iama, ihi ia longo Jezú ia lungu ni kiebhi o kukala mu paze ni jiphange jetu, kua lungu ni ubhezelu u xikina Nzambi?