Phala Jihova, o ukaza kikima kyakutonoka kana. Mwene wambe kwila, odiyala ni muhatu atokala ku kumbidila okikanenu kyâ. (Mat 19:5, 6) Makaza avulu mukilunga kya Nzambi asanguluka. Maji séku ukaza wayuka, sayi bhabha mumoneka maka. Kumundu yú o athu abanza kwila, okudisenga ni kudixisa wene o ukexilu wambote wakubatula omaka, maji etu kitutokala kubanza kiki. Kyebhi omakaza kyatena kulanga o ukaza wâ?

Tala jindunge jitanu jitena kukwatekesa.

1. Langa o muxima wé. Phala kubhanga kiki, kana kutoka dyesu kumuthu wengi kikaza dyé, kana kutala ufusa, mukonda o ima yiyi itena kuzozesa o ukaza wé.—Mat 5:28; 2Ph 2:14.

2. Kolesa o ukamba wé ni Nzambi, bhanga nguzu phala kumusangulukisa mu ukaza wé.—Jis 97:10.

3. Suluka mukubhanga nguzu yakulondesa o ukexilu wa ubhe mba idifwa ya ukidistá, ni kubhanga né mwene ima yofele ilondekesa henda kwa kaza dyé.—Ko 3:8-10, 12-14.

4. Dizwelese kyambote ni kaza dyé, muxile.—Ko 4:6.

5. Bhana kwa kaza dyé, o ima yamutokala ni henda yoso.—1Ko 7:3, 4; 10:24.

Kyoso omakaza a Jikidistá kyabhana kijingu ku ukaza, amubhana we kijingu ku Mubhangi wa ukaza, Jihova.

TALA OVIDYU, TWA TOKALA ‘KUKOLOKOTA MU KULENGA’—BELESELA O IJILA, MUKUSULUKA TAMBWIJILA O IBHWIDISU YAKAYELA:

• Sumbala odikaza ditena kumateka kyambote, ibhidi yebhi itena kumoneka?

• Kyebhi o itendelesu ya Bibidya itena kukwatekesa yó adivwa kwila o henda yâ mu ukaza yamuzonda?

• Itumu yebhi yabhana Jihova phala o ukaza?

• Ihi yatokala kubhanga odiyala ni muhatu phala o ukaza wâ kuzediwa?