Omundu yú utubhangesa kuxinganeka kwila, okyayibha kyawabha, okyawabha kyayibha. (Iz 5:20) Sayi athu abhanga ima yazembe Jihova, katé mwene odiyala dizeka ni diyala ni mukwa mba muhatu ni muhatu. Ominzangala kuxikola mba athu engi, abhangesa ominzangala yetu, kukayela o ibanzelu yá. Kyebhi ki utena kulonga monê phala kudibhana kyambote mumaka yá ni ima yamukwa?

Longa otwana twê ni kwijiya kwa itumu ya Jihova. (Ij 18:3) Bhofelebhofele, longa kutwana twê o ima izwela o Bibidya yalungu ni uyala mba uhatu, kifwa o idyandu ya ujitu. O ima iwanda atangela yatokala ilunga ni kitala kyâ, watokala we kuxinganeka se ene anda itendela. (Mate 6:7) Dibhwidise: ‘Okwila ngalongo kyá omaka alungu ni kudixaxata kutwana twami? Mukonda dyahi atokala kuta izwatu yatokala, ni kwa alonga ovalolo yakudituna ku akwata mu idyandu yâ ya ujitu? Okwila anami ejiya ihi yatokala kubhanga, sekumoneka muthu wa alondekesa ima ya ufusa mba wa abhinga phala kubhanga kima kyayibhila Jihova?’ Se twana twé ejiya o ima yiyi, ni kithangana kyasoko, kwandakwakwatekesa kulenga ibhidi yavulu. (Ji 27:12; Nd 7:12) Mukulonga otwana twé, eye ulondendekesa henda ku undundu yú wabhana Jihova.—Jis 127:3.

TALA OVIDYU, TUNGA INZO YA-NDA NANGENENA—LANGENU O TWANA TWENU KU IMA YA IBHA, MUKUSULUKA TAMBWIJILA O IBHWIDISU YAKAYELA:

• Mukonda dyahi sayi jitata akala ni hele yakuzwela ni twana twâ yalungu ni uyala mba uhatu?

• Mukonda dyahi ojitata jabhingi kulonga otwana twâ, ‘kwabazela ni kwa endesa kala kyatumu Jihova’?—Ef 6:4

• Ihi yene mubhanga okilunga kya Jihova phala kukwatekesa ojitata kulonga otwana twâ omaka alungu ni uyala mba uhatu?—w19.05 12, kaxa

• Mukonda dyahi kima kyambote ojitata kudizwelesa ni twana ande dya kumoneka maka?