Etu tukalakala kyambote ni nguzu yetu kyoso kituxinda jimbambe phala kubhanga dingi mu sidivisu ya Jihova. (1Ko 9:26) O jimbambe jitukwatekesa kukalakala kyambote ni kithangana kyetu andi dya dizubhilu dya mundu yú kubhixila. (Ef 5:15, 16) Mukithangana kya ubhezelu ku mwiji, o kwila mutena kudizwelesa se jimbambe jebhi jimutena kuxinda phala o muvu wa ubhe wa sidivisu? Phala kukukwatekesa mu maka yá, mukamukanda Milongi Phala O Yônge wandasangamu jindugi javulu ja jimbambe ji utena kubhinga bhu kaxi ka musambu.—Tiy 1:5.

Mukifika, o kwila o mwiji utena kukalakala kumoxi phala kukwatekesa muthu ku mwiji kukituka muboki wa thembu yoso? Se eye wala ni hele ya kutenesa o jiola, zwela ni aboki a thembu yoso adibhana ni ibhidi i wamudibhana nayu. (Ji 15:22) Nange eye utena kwibhwidisa muboki wa thembu yoso mu ubhezelu wé ku mwiji. Mukusuluka xinda o programa yandakukwatekesa. Se eye wexile muboki wa thembu yoso, tala se o mukithangana kiki eye utena kukala dingi muboki wa thembu yoso.

O kwila sayi athu ku mwiji wé atena kukalakala kala aboki a thembu yoso mu mbeji imoxi mba mu jimbeji? Se eye kiwala dingi ni nguzu yasoko, eye utena kukala muboki wa ithangana ni ithangana mukubhanga tu ithangana mu kizuwa ni kizuwa mu ukunji. Se eye kiwala ni kithangana kyasoko mukaxi kasemana mukonda dya salu, xikola, nange eye utena kusola mbeji yala ni kizuwa kya kuyoha mba mbeji yala ni semana jitanu ja disukilu dya semana. Mu kalendario ké soneka o kithangana kiwaxinganeka kumateka kukalakala kala muboki wa ithangana ni ithangana.—Ji 21:5.

TALA OVIDYU SWINA . . . EYE U MUBOKI WA THEMBU YOSO, MUKUSULUKA TAMBWIJILA O KIBHWIDISU KYA KAYELA:

• Phangu ya phange Aamand itulonga ihi yalungu ni henda ya Jihova mu kulanga yó adibhakula phala kukala aboki athembu yoso?