O kuila ki bhonza ku bhanga o ima ia iuka?— Athu avulu amba kuila, ki bhonza. O Bibidia i tu tangela kuila, kia bhonzele kiavulu o munzangala Joziia ku bhanga o ima ia iuka. Maji muéne ua kexile ni makamba ambote a mu kuatekesele. Tu di longe ia lungu ni Joziia ni makamba mê.

O tat’â Joziia, uexile sobha ia Judá, dijina diê Amone. Amone uexile muthu ua iibha, ua kexile mu bheza iteka. Kioso kiafu tat’â Joziia, Joziia ua kituka sobha ia Judá. Maji muéne ua kexile ngó ni dinake dia mivu! O kuila muéne uexile muthu ua iibha kála kiexile tat’ê?— Kana!

Né muene kioso kiexile hanji munzangala, Joziia ua mesenene ku belesela Jihova. Kienhiki, muéne ua solo ku kala ngó ni makamba a zolele Jihova. O makamba enhó, a kuatekesa Joziia ku bhanga ima ia iuka. A nanhi exile o makamba a Joziia?

 Umoxi uexile Sofoniia. Sofoniia uexile polofeta ia dimuine o mundu ua Judá kuila, ene eji kala ni ibhidi, se a di tele mu ubhezelu ua iteka. Joziia uevu Sofoniia, iu ua bhezele ngó Jihova, o iteka kana.

O dikamba dia mukuá dia Joziia, uexile Jelemiia. Muéne ua kexile mu kitala kimoxi ni Joziia, a tungile ué bhu kididi kimoxi kioso kia kexile mu kula. Ene a di zolele kiavulu, kioso kiafu Joziia, Jelemiia ua soneka muimbu u londekesa kuila, ua kexile ni ngunzu iavulu ia kamba diê Joziia. Jelemiia ni Joziia, a di kuatekesele mudiâ mu ku bhanga o ima ia tokala, ni ku belesela Jihova.

Ihi i u di longa mu phangu ia Joziia?— Né muene kioso kiexile hanji munzangala, Joziia ua mesenene kiá ku bhanga ima ia iuka. Muéne uejidile kuila, ua tokalele ku kala dikamba dia athu a zolele Jihova. Sola ngó makamba a zolo Jihova, a ku kuatekese ku bhanga ima ia iuka!